«Сарыарқа» хоккей клубы маусымды жеңіспен бастады
Қарағандының «Сарыарқа» хоккей клубына биыл 10 жыл толды. Өзінің алғашқы мерейтойын «Қарағанды-Арена» мұз айдынында атап өткен кеншілер командасының қуанышына Премьер-Министрдің бірінші орынбасары, Қазақстан хоккей федерациясының президенті Асқар Мамин арнайы келді. Салтанатты шарада мәртебелі мейман ұжымды құттықтап, жаңа биіктерді бағындыра беруге тілектестік білдірді.
Спорттық мерекелік шара аяқталған соң қарағандылық шеберлер Бүкілресейлік ашық турнир – «Жоғары хоккей лигасы чемпионатының» 2016/2017 жылдардағы маусымының алғашқы ойынын Мәскеу түбіндегі Балашиха қаласының «Динамо» клубымен өткізді. Бұл матчта айдын иелері күшті тегеурін танытып, қонақтарды 3:1 есебімен тізе бүктірді.
«Сарыарқа» хоккей клубы 2006 жылы Қарағанды облысының сол кездегі әкімі, Қазақстан Парламенті Мәжілісінің қазіргі таңдағы Төрағасы Нұрлан Нығматулиннің мұрындық болуымен құрылған еді. Өзінің алғашқы маусымында-ақ кеншілер командасы Бүкілресейлік доданың «Сібір-Қиыр Шығыс» дивизионында үшінші орын алып, мамандарды таңдай қақтырған болатын. Сонымен бірге, жас ұжым Ресей біріншілігінен бөлек, Қазақстанның ішкі чемпионатында да өнер көрсетті. 2009 жылы Қазақстан Президентінің бастамасы бойынша ерлер командалары арасында шайбалы хоккейден тұңғыш рет толыққанды ел чемпионаты ұйымдастырылып, сол турнирде «Сарыарқа» жасағы алтын медальды жеңіп алды.
2011 жылдың 1 желтоқсанында Қарағанды командасы Ресейдің Жоғары хоккей лигасында (ЖХЛ) ойнауға өтінім түсірді. Келесі жылы тілек орындалып, «Сарыарқа» аталған турнирде өнер көрсете бастады.
ЖХЛ-дағы алғашқы маусымында қарағандылық хоккейшілердің толайым табысқа қол жеткізгенін де айта кету керек. Команда 2012 жылдың 31 қазанынан 2013 жылдың 14 қаңтарына дейінгі аралықта тұрақты чемпионаттағы 23 матчта қатарынан жеңіске жетіп, лиганың рекордын жасады. Ал келесі 2013/2014 жылдардағы маусымда тағы да таңғаларлық нәтижеге қол жеткізіп, «Братина» Кубогының плей-офф ойындарында қатарынан 12 рет жеңіс тойын тойлады. Сөйтіп, тағы да рекорд жаңартты. Сол жолы ұжым шешуші кезең ойындарының барлығында қарсыластарынан басым түсіп, финалға жолдама алды. Ақтық айқаста Арқа хоккейшілері Түменнің «Рубин» командасын ұтып, өз тарихында тұңғыш рет Жоғары хоккей лигасының бас жүлдесі – «Братина» Кубогын жеңіп алды.
Жалпы, «Сарыарқаның» табысын клубтың директоры Арғын Нығматулиннің есімімен тығыз байланыстырған жөн. Команда құрамын кәсіби шеберлігі жоғары хоккейшілермен жасақтап, ұжымға қолынан іс келетін білікті жаттықтырушыларды тарта білетін басшының ұйымдастырушылық қабілетін бұл күнде мамандардың барлығы мойындайды.
«Сарыарқа» алға сілтеген сайын жергілікті спортсүйер қауымның хоккейге деген қызығушылығы артып келеді. Мысалы, былтырғы маусымда қарағандылық ұжымның өз мұз айдынындағы әрбір ойынын орта есеппен бес мыңға жуық жанкүйер тамашалаған. Бұл – Жоғары хоккей лигасындағы ең үздік көрсеткіш. Міне, жерлестерінің осындай жан-жақты қолдауына арқа сүйеген Арқа хоккейшілері биыл да сенімнің үдесінен шығамыз деп уәде беріп отыр.
Қайрат ӘБІЛДИНОВ,
«Егемен Қазақстан»
ҚАРАҒАНДЫ