Қазақстанда Білім және ғылым министрлігінің ұйымдастыруымен BARCEF (Bolashak Alumni Reunion Conference аnd Education Fair) халықаралық конференциясы өткізіліп тұрады.
Қазақшаға дәл аудармасын ұйымдастырушылар айтпағанымен, оның «Болашақ» стипендиясымен шетелдік ЖОО-ларда оқитын түлектерінің жиыны екенін анықтадық. Сонымен қатар, онда шетелдік жоғары оқу орындарының өкілдері өздерін таныстырып, көрме немесе тұсаукесер де жасайды.
Кеше Астанада BARCEF-тің ІІІ конференциясы болып, оны Білім және ғылым министрі Ерлан Сағадиев ашып, жүргізіп отырды. Жиынды ашқандағы сөзінде министр конференцияға әлемдік және қазақстандық жоғары оқу орындарының 60-тан аса өкілі, сондай-ақ, халықаралық сарапшылар мен Қазақстанның «Болашақ» стипендиясының студенттері мен мектеп оқушылары қатысып отырғанын айтты.
Алғашқы құттықтау сөз Мемлекеттік хатшы Гүлшара Әбдіқалықоваға берілді. Жастарға сапалы білім беру ісі еліміздің ең негізгі басымдықтарының бірі болып табылады.
Сондықтан Тәуелсіздіктің алғашқы күнінен бастап білім саясаты адами капиталды арттыруға, мемлекеттің мәртебесін биіктетуге бағыт алды. Бүгінгі алқалы басқосуда білім саласын биік деңгейге көтеру және осы бағытта атқарылған ауқымды жұмыстардың нәтижелері талқыланғанын қалаймын, деді ол өзінің кіріспе сөзінде.
Елбасы Нұрсұлтан Назарбаевтың бастамасымен осыдан 23 жыл бұрын қолға алынған «Болашақ» бағдарламасы бойынша шетелдердің үздік ЖОО-ларында 8,5 мыңнан астам маман даярланған екен. Барлық бөлінген стипендия 12 мыңнан артық.
Жаһандану дәуірінде Қазақстанның әлемдік қауымдастықтан оқшауланып жеке өмір сүре алмайтындығын, сондықтан халықаралық қауымдастықтың білімі мен тәжірибесін, мәдениеті мен тілін еркін меңгеру керектігін ескерген Елбасы Н.Назарбаев үздік мектеп оқушыларының бәрін конкурспен таңдап алып, шетелге барып оқуға мүмкіндік тудырғаны экономикаға салынған адам капиталы болғанын бүгін көріп отырмыз.
«Болашақ» – Президенттің әлемдік деңгейдегі мамандар мен басқарушылардың жаңа буынын өсіруге салған инвестициясы болды. Осы бағдарламаның арқасында еліміздің еңбек және ғылыми әлеуеті жыл сайын жоғары біліктілікті мамандармен толығып отыр. Олар өздерінің күнделікті еңбектерімен қазақстандық ғылым мен экономикаға елеулі үлестерін қосуда, деді Г.Әбдіқалықова. Мысал ретінде ол Голландияның докторантурасында оқитын Қазыбек Төлеубаевты атады. Жас ғалым өсімдіктер карантині мен қорғалуы саласында тамаша жаңалық ашқан екен. Ол ауыл шаруашылығын отандық экономиканың драйверлері қатарына қосуға елеулі үлес қосатын көрінеді. Сонымен қатар, Мемлекеттік хатшы Назарбаев Университетте ғылыми қызметкер болып істейтін Дамира Қанаеваның да ғылыми жаңалығын ауызға алып өтті. «Болашақ» бағдарламасымен АҚШ университетінің докторантурасын бітірген қыз туберкулез бен қатерлі ісікті тез және дәл анықтайтын оптикалық биосенсер ойлап тапқан екен. «Болашақтың» тағы бір түлегі Дмитрий Горбунов Германияның университеттік клиникасында оқып келгеннен кейін екі мыңнан артық баланың жүрегіндегі тума ақауларына ота жасап, емдеп шығарыпты. Ал Францияның өнер магистра-
турасында білім алған апалы-сіңлілі Мәдина, Фатима және Диана фортепиано, скрипка және виолончельден Қазақстанды әлемнің айтулы сахналарында көрсетіп жүрген көрінеді.
Сөзінің соңында Г.Әбдіқалықова «Болашақтың» алдағы табыстары бұдан да қомақты боларына сенім білдірді.
Мемлекеттік хатшыдан кейін сөз кезегі Парламент Сенатының Әлеуметтік-мәдени даму және ғылым комитетінің төрайымы Бірғаным Әйтімоваға берілді. Сенатор «Болашақ» бағдарламасымен өзінің Білім және ғылым министрі болып жүрген кезінде тікелей айналысқанын атап өтті. Ал оның алғашқы жемістерін шетелде қызмет етіп жүргенде көргенін жеткізді.
Конференция аясында көрме ұйымдастырылып, әлем университеттерінің өкілдері өздерінің ЖОО-ларын таныстырды.
Жақсыбай САМРАТ,
«Егемен Қазақстан»