«Технодом» мен Универсиада дирекциясы арасында ынтымақтастық туралы шартқа қол қойылды.
2017 жылғы Универсиада өткеннен кейін «Технодом» компаниясы 500 данадан астам техниканы спорт мектептеріне тапсырады.
11 қазанда Алматыда 2017 жылғы 28-ші Дүниежүзілік қысқы Универсиаданы дайындау және өткізу жөніндегі дирекциясы мен «Технодом» компаниясы ынтымақтастық туралы шартқа ресми түрде қол қойды. Аталған шарт аясында Универсиаданы ұйымдастыру комитетінің жұмысын жабдықтау мақсатында 500 данадан астам техника мен жабдық беріледі, олар Универсиада өткізілгеннен кейін Алматы қаласындағы спорт мектептеріне тапсырылатын болады.
Қол қою рәсіміне «Технодом» компаниясының президенті Ренат Исмаилов пен 2017 жылғы Универсиада дирекциясының жетекшісі Наиль Нұров қатысты.
– «Технодом» компаниясының әлеуметтік-корпоративтік саясатындағы басты басымдықтардың бірі – Қазақстан спортын қолдау, еліміздің болашақ мұрасына деген, балаларымызға деген қамқорлық, сонымен қатар саламатты өмір салтын насихаттау және осындай ынтымақтастыққа қол қою – компаниямыздың елеулі оқиғасы болып отыр. «Технодом» компаниясы спортты белсенді қолдаумен бірге қоқысты жинау бойынша эко-жарықтар, электрондық қалдықтарды жинауға арналған арнайы эко-бокстарды орнату сияқты түрлі эко-жобаларды енгізіп және іске асыра отырып, еліміздің экологиясының жақсаруына да қамқорлық жасап отырғаны, сондай-ақ, полиэтиленді пакеттерді қолданудан бас тарту бойынша жобаны енгізуді жоспарлап отырғаны туралы айта кеткім келеді. Өйткені, біздің басты мақсатымыз – Қазақстанның болашақ ұрпағына деген қамқорлық, – деді «Технодом» компаниясының президенті Ренат Исмаилов.
– Біз Универсиаданы ұйымдастыруға қолдау көрсетіп отырған «Технодом» компаниясына алғысымызды білдіреміз. Бұл – Алматы қаласы бизнесінің әлеуметтік жауапкершілігінің айқын көрсеткіші. Ойындар қорытындысы бойынша Универсиада-2017 мұрасы аясында барлық жабдық Алматы қаласындағы спорт мектептеріне тапсырылатын болады, – деп мәлімдеді Наиль Нұров.
Универсиада дирекциясының жетекшісі сондай-ақ, шетелдік және қазақстандық компанияларды ынтымақтастыққа шақырды. Универсиаданың маркетингтік мүмкіншіліктері өзінің серіктестерін 12 жарыс күнінің ішінде 1 миллиардтан астам телекөрермендер аудиториясына көрсетуге мүмкіндік береді. Қазақстан тарихында бірде-бір халықаралық оқиға мұндай теледидарлық қамтуға ие болмаған еді.
Өз кезегінде Ренат Исмаилов Универсиада дирекциясы мен «Технодом» компаниясы арасындағы ынтымақтастық жарыстың ең жоғарғы ұйымдастырушылық деңгейде өтуіне мүмкіндік беретініне, ал серіктестік нәтижелі және өзара тиімді болатынына айрықша сенім білдірді.
Сапарбай ПАРМАНҚҰЛОВ,
«Егемен Қазақстан»
АЛМАТЫ