27 қазан күні Тәуелсіздік сарайында балама энергетика мен «жасыл экономика» саласына қатысты ең үздік 100 стартап жұртшылық назарына ұсынылмақ. Осы халықаралық стартаптар сайысында 100 жобаның ішінен суырылып шыққан 30 жоба ЭКСПО-2017 көрмесінде павильондарға қойылады. Бұл туралы кеше Орталық коммуникациялар қызметінде өткен брифингте айтылды.
Энергетика министрлігінің қолдауымен «Мұнай және газ ақпараттық қолдау орталығы» АҚ жүзеге асырып жатқан NEWENERGY global startap fest халықаралық байқауына АҚШ, Қытай, Ұлыбритания, Германия, Франция, Австрия, Нидерланд, Италия, Түркия, Үндістан сынды әлемнің 36 елінен 800-ге жуық стартап ұсынылған. Кремний алқабының, Тель-Авив университетінің, BR энергетикалық компаниясының өкілдерінен, сондай-ақ, қазақстандық энергетик мамандардан, ғалымдардан жасақталған халықаралық қазылар осы 800 жобаның ішінен үздік жүздікті іріктеп алыпты. Енді Тәуелсіздік сарайында өтетін ақтық сайыста осы жүздіктің ішінен отызы іріктеледі.
«Мұнай және газ ақпараттық талдау орталығы» АҚ бас директорының міндетін атқарушы Асқар Мұнараның айтуынша, шараның басты мақсаты – жаңғыртылмалы энергия көздерін табу, «жасыл экономика» технологияларының жетілуіне ат салысу.
– Біріншіден, бұл байқау арқылы еліміздің энергетика саласына үлес қосуға тырыстық. Екінші мақсатымыз – келер жылы елордада өтетін ЭКСПО-2017 халықаралық көрмесін халықаралық аренада насихаттау, танымалдығын арттыру. Сондай-ақ, осы арқылы елімізде инновацияның және стартап мәдениеттің дамуына ықпал етеміз деген үмітіміз бар. Мұндай шара Қазақстанда ғана емес, Еуразия көлемінде бірінші рет өтіп жатыр. Стартап байқаулар көп, әрине. Бірақ тек қана энергетика саласында 800 жаңа жобаны бір жерге шоғырландыру бұрын-соңды болмаған, – дейді ол.
Асқар Мұнара айтып өткендей, шикізат бағасы түскен сайын, балама энергия көздеріне деген сұраныс та арта береді. Тіпті, көмірсутегі бағасының құлдырауына әсер етіп жатқан факторлардың бірі осы жаңғырмалы энергия алу технологиясының жетілуі деуге де болады. Демек, Қазақстан алдағы уақытта өзінің энергетикалық қауіпсіздігін, экологиясын сақтау үшін жаңғырмалы энергия көздеріне иек артуды үйренуге тиіс.
Байқауға ұсынылған стартап жобаларға тоқталар болсақ, олардың басым көпшілігі жаңғырмалы және балама қуат көздері саласындағы жобаларды жүзеге асыратын компаниялардан келіпті. Сондай-ақ, «ақылды қала» және тұрақты инфрақұрылым қалыптастыру, энергия және экология, жаңа энергия көздері, зиянды ресурстарды тиімді тұтыну сынды категориялар бойынша ұсынылған жобалар көп екен.
Жасыратыны жоқ, қоғамда стартаптардың пайдасына қатысты күмәнді ойларға жетелейтін пікірлердің айтылып жүргені де рас. Мәселен, жүздеген стартап жобалардың арасынан бірді-екілісі ғана іс жүзіне асып, қалғаны шығынға ұшыратуы мүмкін. Бұл дамыған елдерде, стартап жобалар сұранысқа ие мемлекеттердің өзінде жиі кездесетін құбылыс. Алайда, NEWENERGY global startap fest фестивалінің жөні басқа. Біріншіден, әлемнің ондаған елінің өнертапқыштарын тарту арқылы жоба өз миссиясының бір бөлігін орындады деуге болады. Екіншіден, жобаға мемлекеттік бюджеттен қаражат жұмсалмайды. Стартап жобалардың байқауын толықтай «ERG S.A.R.L» және «Jupiter Energy» компаниясы қаржыландырады.
Арнұр АСҚАР,
«Егемен Қазақстан»