Ол қандай болу керек?
Алматы қаласының орталықтандырылған кітапханалар жүйесі – мәдени астанадағы 23 руханият ордасының басын біріктіріп отырған мекеме. Миллионға жуық маңызды кітап қоры қалыптасқан жүйенің 90 мыңнан астам тұрақты оқырманы бар. Оның ішінде он бес жасқа дейінгі 45 346 жасөспірім керегін тауып қайтатын құтты шаңыраққа айналған.
Қазіргі күні орталықтандырылған жүйе бойынша 154 кітапханашы кітапқұмарларға қызмет көрсетуде. Жыл сайынғы оқу мен ізденуге берілетін кітаптар саны 1 743 247 дананы құрап отыр.
Орталықтандырылған кітапханалар жүйесінің оқырманға қызмет көрсетуін жетілдіру мақсатында түрлі бағыттағы ізденістерге кең жол ашылған. Әсіресе, еліміздің барлық аймағындағы әмбебап, көпшілік кітапханалар мен жақын шетелдердегі әріптестермен тәжірибе алмасу жұмыстары үнемі жүргізіледі. Күні кеше ғана Алматы қаласы әкімдігінің қолдауымен «ХХІ ғасыр кітапханасы қандай болу керек? Кітаппен – болашаққа» атты екі күндік конференция ұйымдастырылды. Тәуелсіздіктің 25 жылдығы, мегаполистің 1000 жылдығы және С. Бегалин атындағы балалар кітапханасының 65 жылдығына орайластырылған бұл шараға облыстардан бөлек, ТМД елдерінен арнайы қонақтар келді.
– Болашақтағы кітапхана қандай болуы керек? Бұл сұрақ тек кітапханашыларды ғана емес, жалпы қоғамды толғандырып отыр. Өркениет заманында қағаз өнімдеріне сұраныс азайғанымен оқып, білуге, ақпарат алуға деген ынта-ықылас еш толастамайтыны анық. Біз де өз жұмысымызды жандандырып, инновациялық бағытта дамыту үстіндеміз. Өзіміздегі үлгілі жұмыстарды әріптестердің тезіне салып, өзгелердің өнегесінен үйреніп отыруымыз шарт. Қалалық кітапхана болсақ та, халықаралық ауқымдағы конференцияны ізгі мақсатпен өткіздік, – дейді іс-шараның маңызына тоқталған Алматы қаласы орталықтандырылған кітапханалар жүйесінің директоры Роза Қабиева.
Қалмаханбет МҰҚАМЕТҚАЛИ,
«Егемен Қазақстан»
АЛМАТЫ