Құранда «Жақсылық пен жамандық бір Алладан» деген аят бар. Оны қазақта «пешене» дейді. О бастан ата-бабаларымыз «Маңдайға не жазса, соны көресің» деп өткен. Ал қияметке дейін үзілмейтін жақсылық пен жамандық пенделердің ниеті мен амалдарына қарай беріледі. Сол тәрізді біздің қазақ халқының тағдыры өз Отанымыздағы ахуалмен тікелей байланысты.
Дүниені ұстап тұрған бес себеп бар. Халқының әділ басшысы, ғұламалар білімі, қуаттының жомарттығы, кедейлердің дұға-тілегі. Алғашқысы – әділ басшы. Ол – Алланың аманаты мен адалдығына бекем дара тұлға. Ал енді осы төртеуінің басын бір жерге түйістірген «Қазағыма жақсылық бере гөр!» деп көз жасымен тілеп өткен бабалар баталарының шарапаты! Елінің еркіндігі мен халқының ынтымағын көксеген аталарымыздың дұға шарапаты бүгінгі таңда ат үстіндегі азаматтарды желеп-жебей берсін дейік.
«Иншалласыз» ісін бастамаған қазақ, бұл сөздің Құранға жанасарын білгендей. Пайғамбарымыз (с.ғ.с.) алдына сауалмен келген адамдарға «Ертең жауап беремін» деп айтқанда, Жебірейіл періште он бес күннен кейін пайғамбардың «Иншалла» деп айтпағаны үшін осыншама уақытқа кешіккендігі туралы хабар бергендігі «Кахф» сүресінде баяндалады.
Мұхаммед (с.ғ.с.) пайғамбарымыз үш адамға, яғни жолда және қиындықта қалушыға, ата-ана мен үлкен кісілерге жақсылық жасауды бұйырған. Экономикамыздың өркенімен жыл сайын қарттардың зейнетақысы жоғарылап, биылғы жылы 30 пайызға көтерілді. Бұл – үлкендерімізге үлкен қуаныш пен құрмет. Жұмысқа жарамсыз, сал мүгедектердің күнкөріс төлемақылары жарты жыл сайын үстемеленуде. Жолда бейнетке түсіп, қаржы және ем – дәрілік көмекке қажет болғандарға аэромобильді тікұшақтармен көмек ету жағдайы белгіленген. Қазақтың санын көбейтуде әр туған балаларына қарай отбасындағы жас аналарға ынталандыру төлемақылары тағы бар.
Ата-баба дәстүрімен әлемдік және дәстүрлі діндер жетекшілері еліміздің төріне дөңгелене жиналып, діндераралық және ұлтаралық қатынасқа сыйластық пен түсіністікті құрақ етуге шақырылып жүр. Кезінде Мұхаммед (с.ғ.с.) пайғамбарымыз Хұдайбия жерінде кәпірлермен он жылға соғыспау туралы келісімге келген. Одан сол кезеңде мұсылман жамағаты көп жеңіске жетті. Ол жылдар мұсылмандардың алға басу кезеңі болды. Жуырда ғана елімізде Еуропадағы қауіпсіздік және ынтымақтастық ұйымына (ЕҚЫҰ) мүше мемлекеттердің басшылары ат тізгіндете бас қосқан Астана саммиті дүниелік тарихқа алтын әріппен мәңгілікке қашалып жазылды. «Бір ел мен жерге алыстан не жақыннан қонақ келсе, өзімен бірге қырық несібесін ала келеді. Қырықтың бір бөлігін өзі жеп, қалғанын сол мекенге қалдырады», – деген хадис бар. Не болмаса күні кеше Азия ойындарында саламатты өмір салтының туын салтанатпен тігуі үлкен дәреже. Осының бәріне Қазақстан бірлігінің, тұтастығының, бір тудың астына жиналуының арқасында қол жеткізді. Түрлі бағыттағы табыстарымыз жылма-жыл арта берсін. Алла тағала соған нәсіп етсін.
Нұрлан АСАНОВ, Қазақстан мұсылмандары діни басқармасының Жезқазған аймақтық өкіл имамы.
Жезқазған.