Парламент Сенаты Халықаралық қатынастар, қорғаныс және қауіпсіздік комитетінің хатшысы Икрам Адырбеков бастаған Қазақстан Парламентінің делегациясы ЕҚЫҰ Парламенттік Ассамблеясының Венада өткен Қысқы сессиясына қатысты. Делегация құрамында сенаторлар Нұртай Әбіқаев, Мұхтар Алтынбаев, Михаил Бортник, Ләззат Қиынов, Дулат Құсдәулетов және Парламент Мәжілісінің депутаты Құралай Қаракен бар.
Делегация Саяси мәселелер және қауіпсіздік, Экономикалық істер, ғылым, технологиялар және қоршаған орта, Демократия, адам құқықтары және гуманитарлық мәселелер жөніндегі жалпы комитеттердің отырыстары аясындағы пікірсайыстарға белсенді қатысты. Халықаралық терроризм және радикалданумен күрес, адам құқықтарының сақталуы, климаттың өзгеруі күн тәртібіндегі негізгі мәселелер болды. Одан басқа, Минск келісімдеріне сәйкес, Украина төңірегіндегі жағдайды реттеудің келешегі, сондай-ақ ЕҚЫҰ кеңістігіндегі басқа да текетірестер талқыланды.
Экономикалық істер, ғылым, технологиялар және қоршаған орта жөніндегі жалпы комитеттің отырысында ЕҚЫҰ Экономика-экологиялық комитетінің төрағасы, Қазақстан Республикасының Венадағы халықаралық ұйымдар жанындағы Тұрақты өкілі Қайрат Сарыбай ЕҚЫҰ-ның екінші өлшемі жөніндегі жұмыстардың негізгі бағыттарын парламентшілер назарына ұсынды.
Сенатор М.Бортник пен Мәжіліс депутаты Қ.Қаракен әскери-саяси және қауіпсіздіктің гуманитарлық мәселелері жөніндегі пікірсайыста қауіпсіздікті нығайтудағы ЕҚЫҰ-ның экономикалық-экологиялық өлшемдерінің маңызды рөлін атап өтті. Қ.Қаракен сондай-ақ, «елдер өзара тұрақты байланыстарға қол жеткізуге ұмтылуы тиіс. Экономикалық байланыстарды дамыту ЕҚЫҰ мен оның аясынан тыс жерлерде жалпыға бірдей қауіпсіздікті ілгерілету тұрғысында сенім мен ынтымақтастықты нығайтуға оң ықпал етеді», деді.
М.Бортник өзі тарапынан «Қазақстан Еуразиялық экономикалық одаққа белсенді қатысушы ретінде интеграциялық бірлестіктермен және жекелеген мемлекеттермен өзара тиімді ынтымақтастық қалыптастыруға мүдделі. Бұл тұрғыда Еуроодақпен сауда-экономикалық ынтымақтастықты қалыптастырудың маңызы зор болып отыр», деп атап өтті. Ол, сондай-ақ, Қазақстан «жасыл экономиканы дамыту» мәселелеріне баса назар аударып, «Жасыл көпір» әріптестік бағдарламасының әзірленуіне және Астанада «Болашақтың энергиясы» тақырыбы бойынша ЭКСПО-2017 халықаралық көрмесін өткізу туралы шешім қабылдануына қол жеткізгенін айтты.
Шара аясында парламенттік делегацияның басшысы И.Адырбеков ЕҚЫҰ ПА Төрағасы, Австрия Парламентінің депутаты Кристин Муттоненмен және ЕҚЫҰ ПА Бас хатшысы Роберто Монтелломен екіжақты кездесу өткізді. Тараптар Сириядағы шиеленіс жөніндегі Астанада өткен келіссөздердің нәтижелерін, Орталық Азия аймағы аясындағы ынтымақтастықтың келешегін, украин дағдарысын реттеу мәселелерін талқылады. К.Муттонен, атап айтқанда, текетірестерді бейбіт реттеуді ілгерілету аясында Қазақстанның тиімді бітімгер ретіндегі маңызды рөлін атап өтті. Биылғы қаңтарда Президент Н.Назарбаев жария еткен конституциялық реформаға ерекше назар аударылды. И.Адырбеков Парламенттің рөлін күшейту, Президент пен Парламент алдында Үкіметтің есептілігін ұлғайту туралы бастамалар туралы хабардар етті. Алдағы уақытта Мемлекет басшысының биліктің өкілді және атқарушы тармақтарына 40-қа жуық міндеттерді беретіні күтіліп отыр.
Делегацияның Ұлттық кеңестің Екінші президенті Карл-Хайнц Копфпен кездесуінде Қазақстан мен Австрияның парламентаралық байланыстарын дамыту келешегі талқыланды. Ол Қазақстан басшысының бастамаларын «маңызды қадам әрі жақсы белгі» деп сипаттай отырып, демократияны дамыту – бірте-бірте қадам басатын әрі тұрақтылыққа зиян келтірмейтін үрдіс болуы керек екенін атап өтті. Қазақстан мен Австрия арасындағы екіжақты ынтымақтастықты одан әрі нығайту мәселелері талқыланып, энергетика саласындағы, әсіресе жаңартылатын энергия көздерін дамытудағы тәжірибесі көп австриялық фирмалар үшін Астанада өтетін ЭКСПО-2017 халықаралық көрмесі зор мүмкіндік екені атап өтілді.
Осыған байланысты Вена мен Астана арасындағы авиарейстерді қалпына келтіру мәселесі аса маңызды болып отыр.
Қазақстан делегациясының басшысы Австрия Парламентінің басшысын көрмеге келуге шақырды.
Тараптар халықаралық саладағы, атап айтқанда, миграция үдерістеріне байланысты кейбір маңызды мәселелерді талқылап, оларды шешу жөніндегі ойларын ортаға салды, деп хабарлады Сенаттың баспасөз қызметі.