Оған «Сарыағаш» ЖШС-дегі озық технологиямен жұмыс істейтін тауарлы сүт фермасы кепіл болады
Қазақы шаруаның «сиырдың сүті – тілінде» деген қағидасы бар. Ауыл шаруашылығын индустрияландыру жүріп жатқан қазіргі кезде сиырдың сүті тілінде ғана емес, күтімде екеніне жұрттың көзі жете бастады. Денисов ауданындағы Перелески ауылында орналасқан «Сарыағаш» жауапкершілігі шектеулі серіктестігі сүт сауу фермасының бірінші кезеңін іске қосты. Ферма тұтастай компьютермен басқарылады. Уақыттың жылдамдығына, заманауи технологияға ілесу деп осыны айтар болар. Әйтпесе, бұл өңірге сиыр да, сүт фермасы да таңсық емес. Кеңес Одағы дәуірінде мал шаруашылығы дүрілдеген кеңшардың бірі осы «Перелески» болатын. Сауын фермасының төбесі көрінгеннен алдымен мал қиының иісі өкпені қабар еді. Сауыншы еңбегі жеңіл болмайтын. Шелегін қарына ілген әйелдер сылпылдап фермада ертеден кешке дейін жүретін. Ал бүгінгі сауыншылардың еңбегі қалай дерсіз?
Маңдайшасында «Сүт сауу орталығы» деп жазып қойған жазуды оқымаса, сырттан келген кісі мұның сүт фермасы екенін бірден біле қоюы, әй, неғайбыл. Өйткені, тазалығына шыбын тайып жығылғандай, көңнің иісі сезілмейді. Аяқ астының барлығы керамикалық плиткалар, жалтырап жатыр. Фермаға аяғыңды сүртіп кіресің. Ғимараттың екінші қабатына көтерілдік, онда сауыншылар, операторлар отыратын бөлме бар. Кәдімгі офис дерсің. Терезеден «карусельге» қарап, отырып, оператор осы жерден компьютермен басқарады. «Каруселі» – сиыр сауатын кешенді аппарат. Қорадан айдап әкелінген сиырлар біртіндеп «карусельге», яғни жерден бір-екі метрдей биіктіктегі үлкен айналма шарбаққа өтеді де, бөлініп қойған бір-бір орынға тұра қалады. Төменде жүрген сауыншылар таза майлықтармен сиырлардың желінін сүртіп, сүт сауу аппараттарын үрпіне кигізіп, іске қосады. Сүт құбырларымен ақ бұлақ аға бастайды. Осы жұмыстың барлығы да компьютермен бақыланатынын тағы да айтқымыз келеді. Нөмірленіп белгіленген әр сиырдың күнделікті салмағы, рационы, қанша сүт бергені көз алдыңда тұр. Сиырдың түрлі аурулардан амандығы да тексеріліп отырады.
– Алғашқы уақыттарда сиырларды осында айдап кіргізуде де шамалы қиындықтар болды. Себебі, малдың аты – мал емес пе, жағалай темір шарбақтардан, тайып жығылардай плиткалардан сескенген болар. Бірақ сиыр да күтімді жек көрмейді екен, жануарлар аз уақыттың ішінде қалыптасқан тәртіпке үйренісіп кетті. Таңертең, кешке сауын кезінде монтаңдап келіп, айналып тұрған карусельдегі орындарына біртіндеп өте береді. Сауыншылар желінінің үрпіне аппаратты кигізісімен иіп, сүт бұлағын селдетеді, – дейді «Сарыағаш» жауапкершілігі шектеулі серіктестігінің аға зоотехнигі Жансары Ахметов. Сүт сауу цехында, яғни «карусельдегі» барлық жұмысты бар-жоғы төрт сауыншы ғана атқарады. Плитка төселген цехтың іші сиыр сауылып болысымен жуылады. Сиырдың желінін сүрткен майлықтарды кір жуатын мәшинеде жуып, сауыншыларға сол мезетте қайта береді.
Қазір сүт сауу орталығында күніне 441 сиыр сауылады. Мамандардың айтуынша, қорадағы сиырлар бұзауласымен оларды «карусельге» әкелу жалғаса береді. Осылай жаңа технологиямен сауылатын сиырлар қатарын көбейтіп, алдағы жылы «карусельде» сауылатын сиырдың қатары 1200-ге жеткізіледі.
– Қолда барлығы 900 сауын сиыр бар. Әр сиырдан жылына есептегенде 4000 литр сүт сауып отырмыз. Бұл қазіргі мүмкіндігімізге қарай жаман көрсеткіш емес. Біздің шаруашылық сүт саууды бастағанда әр сиырдан 1600 литрден алғанбыз. Жергілікті қара ала сиырдың тұқымын асылдандыру жұмысы үздіксіз жүргізіліп келеді. Озық технологияға негізделген жоба толық іске асқанда бұл көрсеткішті 5000-5500 литрге жеткізетін боламыз, – дейді Жансары Ахметов. Айтпақшы, бұл шаруашылықта бұзаулар да жаңа технология бойынша күтіледі.
Облыстың индустрия картасына енген бұл инвестициялық жоба «ҚазАгроФинанс» акционерлік қоғамының қолдауымен мүмкін болды. Өзгелердегі озық үлгіні әкелу оңай да, арзан да емес. Сүт сауу орталығында құрастырылған «карусель» жабдығы Германиядан алдырылды. Бұл жабдық қазір Қазақстанда бар-жоғы бесеу ғана болса, соның екеуі Қостанай облысының шаруашылықтарында жұмыс істеп тұр. «Сарыағаш» жауапкершілігі шектеулі серіктестігіне «ҚазАгроФинанс» акционерлік қоғамы 504,9 миллион теңге қарыз берсе, қалған 111,4 миллион теңгені шаруашылық құрамына кіретін «Арай» холдингі салды. «Сарыағаш» жауапкершілігі шектеулі серіктестігінің директоры Өтеген Мұртазин осы қаржының барлығы 6-7 жылда өтелетінін айтып отыр.
– Ең басты мақсатымыз – тиімділік пен пайдаға қол жеткізу. 2014 жылы жоба толық қуатында жұмыс істейді. Сонда жобаға жұмсалған шығын да дер уақытында өтелетін болады, – дейді ол. Перелески ауылының 24 тұрғыны жаңа тауарлы сүт фермасында жұмыс орнын табады.
Жалпы, «КазАгроФинанс» акционерлік қоғамы елімізде тауарлы сүт фермаларының дамуы үшін жасалған инвестициялық жобаларды қаржыландыру операторына айналып отыр. 2007 жылдан бері осы бағытта 16 жоба қаржыландырылып, оған 13 миллиард теңге жұмсалды. Қазір 14 тауарлы сүт фермасы толықтай жұмыс істеп тұр. «КазАгроФинанс» қаржыландырған «Сарыағаш» ЖШС-ға қарайтын сүт фермасында тағы да қосымша қора салынғаннан кейін, жоба 2012 жылы толық аяқталады.
– Ауыл шаруашылығын, оның ішінде, мал шаруашылығын индустрияландыру, озық технологияларды әкелу ауыл адамдарын да жаңаша ойлауға бейімдейді. Сауын сиырларына таяқ көтеруге, тіпті ұрысуға, шулауға болмайды. Оның күтімі, жылы, таза орын сүт молшылығына әсер етеді, – дейді шаруашылық басшысы Өтеген Мұрзин.
«Сарыағаштың» тауарлы сүт фермасы болашақта еліміздегі мал шаруашылығы көкжиегінің кеңейе түсерін көрсеткендей.
Нәзира ЖӘРІМБЕТОВА,
Қостанай облысы,
Денисов ауданы,
Перелески ауылы.