Мемлекет басшысы Нұрсұлтан Назарбаев Байланыс және ақпарат министрі Асқар Жұмағалиевті қабылдады, деп хабарлады Қазақстан Республикасы Президентінің баспасөз қызметі.
А.Жұмағалиев Мемлекет басшысын министрліктің ағымдағы жұмысы, атап айтқанда, “электронды үкімет” үшін инфрақұрылымды жетілдіру саласындағы жұмысы туралы және мемлекеттік органдардың бизнеске электронды қызмет көрсету үдерісін автоматтандыру барысы туралы хабардар етті.
Министр бүгінгі күнге дейін 800 мыңнан астам электронды анықтама берілгенін мәлімдеді.
Президент министрліктің басшылығына халыққа электронды қызмет көрсетуді кеңейту жөніндегі жұмысты жалғастыруды, электрондық лицензиялау жүйесіне ерекше көңіл бөлуді, бизнесмендердің рұқсат ету құжаттарын алу ресімін жеңілдетуді тапсырды.
Кездесу барысында сондай-ақ ақпараттық кеңістікті дамыту саласындағы жұмыстар туралы, атап айтқанда, сандық телевизияны енгізу туралы әңгіме болды.
– Мемлекет басшысының тапсырмасы бойынша, 2010 жылдың соңында Қазақстанда спутниктік сандық телевизияны іске қосу қажет. Аталған шара жекелеген өңірлердің тұрғындарын қосқанда еліміздің барша халқына қазақстандық телебағдарламаларды көруге мүмкіндік береді. Сандық спутниктік телехабарларын тарату жобасы ақпараттық теңсіздікті еңсеруге бағытталған, – деді журналистерге арналған брифингте А.Жұмағалиев.