Кеше Қазақстан Республикасы Президенті Әкімшілігі Басшысының орынбасары Т.Донақовтың төрағалығымен Президент жанындағы Құқықтық саясат жөніндегі кеңестің кезекті отырысы болып өтті.
Кеңес отырысында бизнес пен жеке меншікті заңсыз тартып алуға (рейдерлікке) қарсы іс-қимыл саласындағы заңнамаға қатысты мәселелер қаралды.
Сондай-ақ Кеңестің отырысында бағалау қызметі туралы заңнаманы дамытудың келешегі айқындалды және халыққа құқықтық тәрбие беру жүйесін жетілдіру мен құқықтық мәдениетті көтеру мәселелері талқыланды.
Аталған мәселелер бойынша Экономикалық қылмысқа және сыбайлас жемқорлыққа қарсы күрес агенттігінің (қаржы полициясы) және Әділет министрлігінің ақпараты тыңдалды.
Құқықтық саясат жөніндегі кеңес ұсыныстары Қазақстан Республикасындағы заңнаманы және құқық қолдану қызметін әрі қарай жетілдіруде ескерілетін болады.
“Егемен-ақпарат”.