«Eskimez Film Production Company» компаниясының директоры Кәміл Кочтың фильмографиясында «Асфальт гүлдері», «Темір етік, темір таяқ», «Біздің ауылдың әйелдері» көркем фильмдері мен «Түрік фильмінің ғасыры», «Соңғы кезеңдегі түрік фильмі» деректі фильмдері бар.
«Қазақфильм» киностудиясымен, жалпы, қазақ кинематографиясымен танысу мақсатында келген қонақтарды «Қазақфильм» киностудиясының президенті Бақыт Қайырбеков қабылдады.
Кездесу барысында Кәміл Коч түркі халықтары фильмдерін түсіру мен қаржыландыруға бағытталған Қор құру туралы ұсыныс тастап, Қожа Ахмет Ясауи жайында фильм түсіруге қызығушылық танытатынын және бұл жобаны «Қазақфильммен» бірлесіп іске асырғысы келетіндігін айтты.
Бақыт Қайырбеков ұлттық киностудия шетелдік студиялармен бірлескен жобаларды іске асырып жүргендігін айта келе: «Келешекте түсірілетін мұндай фильмдер ортақ тарихымыздан хабар береді. Киностудияның меншігінде Смағұл Елубай жазған «Ясауи» атты дайын сценарий де бар. Бірлесіп жұмыс жасайтын жағдайда сіздерді автормен таныстырамыз. Сондай-ақ, біздің фильмдер Түркияның кинофестивальдарына, атап айтқанда, қонағымыз Кәміл Коч мырза басқаратын «Босфор» фестиваліне жылда қатысып, жүлдемен оралатынын айтқым келеді», деді.
Айнаш ЕСАЛИ,
«Егемен Қазақстан»
АЛМАТЫ
