Екіжақты кездесу барысында Президент Н.Назарбаев өткен жылдың өзінде Қазақстанда поляк капиталының қатысуымен 10 кәсіпорын іске қосылып, 100 миллион долларға жуық инвестиция салынғанын атап өтті.
«Биыл Польша экономикасы Қазақстан экономикасы сияқты 4%-ға дейін өсуі мүмкін. Бұл өсім бізге болашаққа зор үмітпен қарауға мүмкіндік береді. Қазақстан мен Польшаның трансформациялану жолдары ұқсас. Нәтижесінде, халықтарымыздың әл-ауқаты артып отыр», деді Елбасы.
Сонымен қатар, Нұрсұлтан Назарбаев Қазақстанда бизнесмендер мен инвесторлар үшін жасалып жатқан жағдайларға назар аударып, сауда-экономикалық саладағы кооперацияны одан әрі кеңейтудің маңыздылығына ерекше көңіл бөлді.
«Қазіргі кезде халықаралық ұйымдар Қазақстандағы инвестициялық климат ең қолайлы деп санайды. Бізде шетелдік инвесторлармен жұмыс істейтін «Қазақ Инвест» компаниясы құрылды. Сондай-ақ, ЭКСПО көрмесі аяқталған соң «Астана» халықаралық қаржы орталығы жұмысын бастайды. Онда ағылшын құқығы қолданылатын болады. Әлемдік қаржы институттарының барлығы дерлік «Астана» халықаралық қаржы орталығымен жұмыс істеуге келісім беріп отыр», деді Қазақстан Президенті.
Мемлекет басшысы Қазақстан Польша үшін өңірдегі басты сауда серіктесі әрі Орталық Азия мен Еуразиялық экономикалық одақ елдері нарығына шығатын сенімді алаң болып саналатынын айтты.
Сондай-ақ, өз кезегінде Анджей Дуда Нұрсұлтан Назарбаевтың өткен жылы Польшаға жасаған сапары екі мемлекет арасындағы сауда-экономикалық қарым-қатынасты жақсартуға серпін бергенін тілге тиек етті.
«Біз бірлесе күш жұмылдыруымыздың арқасында тауар айналымының жоғары деңгейіне қол жеткізе алатынымызға сенімдімін. Сондай-ақ, ЭКСПО-2017 көрмесіне қатысып, Польша мен Қазақстан павильондарын көруге мүмкіндік жасалғаны үшін ризашылық білдіремін. Бұл көрме жаңғырмалы энергия көздеріне және шикізаттың дәстүрлі көздерін қоршаған орта үшін қауіпсіз қолдануға байланысты заманауи технологияларды көрсетуге мол мүмкіндік береді», деді Польша Президенті.
Кеңейтілген отырыстан кейін екі ел басшылары бұқаралық ақпарат құралдарының өкілдері үшін арнайы бірлескен брифинг өткізді. Қазақстан Президенті журналистер алдында сөйлеген сөзінде Қазақстан мен Польша арасындағы өзара қарым-қатынас 25 жыл ішінде дипломатиялық байланыстар орнаған сәттен бері дамып келе жатқанына көңілі толатындығын білдірді.
«Бүгінде біздің елде Польша капиталының қатысуымен 115 кәсіпорын жұмыс істеуде, 200 миллион доллардан астам тікелей инвестиция салынды. Машина жасау, ауыл шаруашылығы, энергетика, химия, көлік, құрылыс салаларының перспективасы зор», деді Қазақстан Президенті.
Сонымен қатар, Нұрсұлтан Назарбаев Азия мен Еуропа арасында жүкті жедел жеткізу үшін заманауи көлік инфрақұрылымын қалыптастыруға бағытталған жобаларды бірлесе іске асыру жөнінде ойын ортаға салып, ғылым мен білім беру және мәдени-гуманитарлық салаларда екі ел арасындағы байланыстарды дамыту мәселелеріне тоқталды.
Бұдан бөлек, Қазақстан Президенті Польша Президентіне Қазақстан Республикасының Еуропалық одақпен кеңейтілген серіктестігі және ынтымақтастығы жөніндегі келісімді ратификациялағаны үшін алғыс айтып, Польшаның 2018-2019 жылдардағы БҰҰ Қауіпсіздік Кеңесінің тұрақты емес мүшелігі кезеңінде халықаралық күн тәртібіндегі өзекті мәселелерді шешу үшін бірлесе жұмыс атқарудың маңыздылығын атап өтті.
ің бірлескен іс-қимылы экономикалық қарым-қатынастарды ілгерілетіп, оны жаңа деңгейге көтеруге мүмкіндік беретініне сенім артатындығын жеткізді.
«Біз Қазақстан–Польша қарым-қатынастарын жақсартуға бағытталған жолмен жүріп келеміз. Мен Қазақстан Президентіне Польшаның кандидатурасын БҰҰ Қауіпсіздік Кеңесінің тұрақты емес мүшелігіне сайлауға қолдау білдіргені үшін алғыс айтамын. Біз осы ұйымдағы жұмысымызда Қазақстанның тәжірибесін пайдаланатын боламыз. БҰҰ Қауіпсіздік Кеңесіндегі Қазақстанның рөлі аса маңызды. Әсіресе, Сіздің елдің Сириядағы қақтығысты бейбіт реттеу жөніндегі тиімді миссиясын ерекше атап өткім келеді», деді А.Дуда.
Айта кетейік, Польша Президентінің Қазақстанға ресми сапары аясында «Жасыл көпір» әріптестік бағдарламасы туралы» хартияға және Ұлттық экономика министрлігі мен Польша Республикасы Даму және қаржы министрлігі арасындағы экономикалық ынтымақтастық туралы келісімге қол қойылды. Екі ел арасындағы үкіметаралық және ведомствоаралық деңгейдегі құжаттар Қазақстан тарапынан Энергетика министрі Қ.Бозымбаев пен Ұлттық экономика министрі Т.Сүлейменовтің, ал Польша тарапынан Қоршаған орта министрі Я.Шишко мен Даму және қаржы вице-министрі – Экономикалық әріптестік жөніндегі қазақ-поляк үкіметаралық комиссияның тең төрағасы Т.Кощчинскийдің қолымен бекітілді.
Естеріңізге сала кететін болсақ, былтыр Мемлекет басшысының Варшаваға жасаған сапарының нәтижесінде Қазақстан-Польша бизнес-форумы өтіп, шара аясында құны 1 миллиард долларға жуық 15 коммерциялық құжатқа қол қойылған еді. Сондай-ақ, Қазақстан мен Польша арасында тікелей әуе қатынасын орнату жөнінде уағдаластыққа да қол жеткізілген.
Нұрлыбек ДОСЫБАЙ,
«Егемен Қазақстан»