Дүниежүзі қазақтарының V құрылтайындағы Елбасы Н.Ә.Назарбаевтың сөйлеген терең мазмұнды сөзінде: «...Біз Тәуелсіздік жылдарында алыстағы ағайынды қолдауды естен шығарған жоқпыз. Шетелден 1 миллионға жуық қандастарымыз, бауырларымыз елге көшіріп алынды, оларға қолдан келер барлық көмек көрсетілді. Ол көш еш тоқтаған емес...», дегенде ел егемендігінің сонау алғашқы жылдарындағы Мемлекет басшысының қабылдауына Халифа Алтай ақсақалмен бірге барғаным есіме түсті.
Ол оқиға 1994 жылдың 24 қарашасында болған еді. Бұл ыстық ықыласты кездесуді Президенттің сол кездегі көмекшісі, белгілі қоғам қайраткері, саясаткер-ғалым Ақан Бижанов ұйымдастырған болатын. Ол тұста мен Үкімет құрамындағы Дін істері жөніндегі кеңестің жауапты хатшысы қызметін атқарамын. Маған күллі ислам жамағатының әйгілі діндар ғалымы, Құрани-Кәрімді тұңғыш қазақша сөйлетіп, Мәдина-Мүнаууаррада 1 миллион таралыммен бастырған, атажұртты аңсап келген қандасымыз, қадірменді Халифа Алтайды алып келіп, арнайы қабылдауда бірге болу тапсырылды.
Сөйтіп сағат төрттің шамасында Президент резиденциясына бардық. Елбасының жұмыс кестесінің әрбір сағаты, әрбір минуты санаулы екенін білеміз. Одан ақсақал да хабардар. Жасыратыны жоқ, айтар сөзімізді, ойымызды алдын ала жұптап, жоспарлап дегендей, әзірленіп алғанбыз. Қабылдау сағат дәл 17.00-де басталды.
Президент бізді бір сағаттан астам уақыт бойы жеке қабылдап, емен-жарқын еркін әңгіме-дүкен құрды. Сол әсерлі кездесуде дін, діни тәрбие, ұлттық құндылықтар, ұлттар арасындағы рухани келісім, әлемдегі бейбітшілік пен татулық жолында барлық дәстүрлі діндер мен діни конфессиялардың күш-жігерін біріктіру қажеттігі, өзара діни сыйластық, төзімділік, ынтымақтастық ұстанымдарын қалыптастыру саясатының өзекті мәселелері жөнінде әңгіме өрбітті. Қазақстанда Әлемдік діндердің келісім орталығын құру, өз еліміздің барлық деңгейдегі оқу орындарына арнайы «Дінтану» пәнін енгізу, сол пән бойынша мамандар даярлау жайы да назардан тыс қалған жоқ. Әсіресе сан ғасырлық тарихы бар әртүрлі іргелі діндер, рухани мәдениеттер мен өркениеттер арасындағы бейбіт байланысты жүзеге асыру қажеттігіне, олардың өзара үнқатысуын, ынтымақтастығын біздің мемлекетімізде ұйымдастырудың маңыздылығына да Елбасы айрықша тоқталған еді.
Міне, содан бері 23 жыл зымырап өте шығыпты. Сол кездегі ордалы ойлардың бүгінде кезек-кезегімен іске асырылып жатқанын көргенде еріксіз риза боласың. Ресми қабылдауда сексеннен асқан қария Халифа Алтай Мемлекет басшысының аса биік өрелі азаматтығына, ерекше ілтипатына, кішіпейілділігі мен қарапайымдылығына, пайым-парасатына дән риза болып, ақжарма ақ батасын берген еді.
Кейіннен діндар ғалым «Ел мен Елбасы» (2003 ж.) кітабындағы «Атажұртпен қауышу» атты көлемді мақаласында сол терең мазмұнды кездесу жайлы шынайы көңілмен алғысқа толы жылы лебіздерін айтып, игі тілектерін білдіріпті. Онда менің де аты-жөнімді атап, бірге болғанымызды жазыпты. «Білек түр де еңбек ет, етек түр де елге жет», деп баяғы бабаларымыз айтпақшы, бұл да қазыналы қарттан қалған үлгі-өнеге.
Бақтияр СМАНОВ,
Ұлттық ғылым академиясының академигі
