Облыстық экология департаментінің басшысы Мұрат Құрманбаев көптеген әлеуметтік нысандарда лас су жинақтайтын септик салынғанымен кейбір ауданда әлі де қалдыққа арналған кәріз жүйесі шешімін таппай отырғандығын айтты. Департамент басшысы экологиялық ахуалға әсер ететін осындай жауапсыздықтарды ретке келтіру жөніндегі өз ұсыныстарын баяндап берді. Қатты қалдықтарды өңдеу мәселесінде түйткілді тұстар жоқ емес.
Қызылорда облысының табиғи ресурстар және табиғатты пайдалануды реттеу басқармасының басшысы Айдар Әбдуәлиев аймақтың экологиялық мәселелерінің ішіндегі маңыздысы полигондарды экологиялық және санитарлық талаптарға сәйкестендіру екендігін айтты.
– Барлық аудан мен қала әкімдіктері өндіріс және тұтыну қалдықтарын орналастыруға 145 жер учаскесін белгілеп, тиісті құжаттарын толығымен ресімдеді. 2013-2015 жылдары Қармақшы, Қазалы аудандарының орталықтарында полигон құрылыстары жүргізілді. 2018 жылы 1-ші кезекте облыстық бюджеттен Арал қаласына полигон салуға қаржы бөлінді. Қалған қаражат 2019 жылғы нақтыланған бюджетке ұсынылды. Мемлекет-жекешелік әріптестігі аясында Қызылорда қаласында тұрмыстық қатты қалдықтарды сұрыптау кешені мен полигон құрылысын іске асыру жобасы басталды. Аталған жұмыстарды жалғастыру мақсатында Сексеуіл мен Тереңөзек кентіне полигон құрылыстарына бюджетке өтінім ұсынылды. Қалған Жаңақорған, Шиелі, Жалағаш аудандары полигонның жоба-сметалық құжаттарын әлі күнге дейін созуда, – деді ол.
Облыстың барлық ауданында қалдықтарды өңдеу бойынша тиісті жұмыстар өз деңгейінде жүргізілмейді. Облыс бойынша 2018 жылы жинақталған 147,0 мың тонна қатты тұрмыстық қалдықтардың 4700 тоннасы өңделген. Яғни, бұл салада атқарылатын жұмыс жеткілікті.
Бақтияр ТАЙЖАН,
«Егемен Қазақстан»
Қызылорда облысы
