Елбасы қай кезде де өз халқымен бірге. Тұңғыш Президенттің өз халқымнан, соның ішінде елордалықтардан бөліп жаратын ештеңем жоқ деген жүрекжарды сөзі әрбір қазақстандықты терең ойға қалдыра алды. Тұңғыш Президентіміздің Қазақстанның, болашағы жарқын, келешегі кемел болуы үшін тындырған істері ұшан-теңіз. Сондай-ақ елорданың еңсесі биік болып, сәні мен сәулеті келісім табуы жолында да атқарған қызметтеріне ешқандай баға жетпейді.
Ол өзінің қажымас қайраты мен мол күш-жігері арқылы әлем картасындағы өзге бірде-бір қаланың көшірмесі бола алмайтын, қайталанбас ажары мен келбеті бар Қазақ елінің елордасын өз қолымен тұрғыза білді. Бұл ретте оның аса биік, әрі түпсіз терең архитектуралық қабілет-қарымы мен талантына бас имеу, оны мойындамау мүмкін емес.
Тағы бір айтарым, өз басым соңғы отыз жылдың ішінде қадасы мен кірпішінен бастап тұтастай жаңа астана тұрғызған ел-жұртты есіме түсіре алмай отырмын. Мұның басты мысалы бүгінгі Нұр-Сұлтан қаласы десек қателесе қоймаспын.
Елордамыздың Нұр-Сұлтан қаласы деп аталуына алғашқылардың бірі болып үн қосып қолдау білдірген ақтөбеліктер екенін де айта кетудің артықшылығы жоқ деп білемін. Осы орайда жүздеген, мыңдаған жерлестерімнің қатарында Нұр-Сұлтан атауына қолдау білдіріп, өз ой-пікірім мен үнімді білдірген болатынмын. Бұл Елбасының өлшеусіз еңбегіне сай өте орынды жасалған қадам. Тағы бір айтарым, Нұр-Сұлтан атауы жазылуға да айтылуға да өте ыңғайлы. Ән сөзіндей әуезді естіледі.
Елбасы Нұрсұлтан Назарбаев өткен жылдың қоңыр күзінде Ақтөбеге келген сапарында «өсе бер, өркендей бер, құтты мекен – Ақтөбе» деп, ақ батасын беріп кеткен еді. Бұл тілек барлық ақтөбеліктерді жаңа табыстар мен жетістіктерге талпындыра түсетіні анық. Әрі Елбасы тарапынан айтылған мұндай биік бағаның салмағы мен жауапкершілігі де жоғары болмақ. Қорыта айтқанда, Нұрсұлтан Назарбаев елордамыздың әлем картасынан орын алуына әрі оның қаз басып қалыптасуына өлшеусіз еңбек сіңірген қайталанбас тұлға деп білеміз.
Келдібай ЕСПАҒАМБЕТОВ,
еңбек ардагері
АҚТӨБЕ
