Еnergyprom сайтының мәліметтеріне қарағанда, былтырғы жеті айда денсаулық сақтау мен әлеуметтік қызметтер саласына салынған инвестиция көлемі 50,6 млрд теңгені құраған. Биылғы инвестиция 57 млрд теңгеге жетіп, өсім мөлшері 12,7 пайыз болды. Салаға инвестиция салудағы өсім соңғы үш жыл бойы жалғасып келе жатқанын ескерсек, бұл көрсеткіш жыл соңына дейін әлі де өсуі мүмкін. Дегенмен, денсаулық сақтау мен әлеуметтік қызметтер саласына салынған инвестиция көзінің республикалық бюджет екенін де ескеру қажет. Биылғы қаңтар-шілде айларында республикалық бюджеттен аталған салаларға 21,8 млрд теңге аударылды. Былтыр бұл көрсеткіш 10,9 млрд теңге болатын. Ал жергілікті бюджеттен бұл салаларға инвестиция салу азайып, 11,9 млрд теңгені құраған. 2018 жылдың жеті айында жергілікті бюджеттерден 17,2 млрд теңге инвестиция салынған еді. Биыл бұл мөлшер 30,9 пайызға төмендеп кетті. Бірақ аталған салалардағы бизнестің жеке қаржысында өсім байқалған. Сөйтіп жылдық өсім 1,6 пайызға жетіп, қаржы мөлшері 20,9 млрд теңге болды. Ал бұл салаларға банктер берген несиелер мен заем қаражатының көлемі көп емес. Несие көлемі 1,4 млрд болса, заемдар мөлшері – 1 млрд теңге.
Өңірлер тұрғысынан қарастырсақ, биылғы 7 айда еліміздің 10 аймағында аталған салаларға инвестиция тартудың өскен байқалды. Шығыс Қазақстан облысында бұл көрсеткіш 3,1, Жамбыл облысында 2,5 және Нұр-Сұлтан қаласында 2,4 есе артты. Қаржы көлемі тұрғысынан да жеті айда 13,2 млрд теңге инвестиция салған Шығыс өңірі топ бастап тұр. Одан кейін 8,6 млрд теңге салған Алматы қаласы мен 6,7 млрд теңге құйған Алматы облысы алдыңғы үштіктің құрамына кіреді. Бір атап өтер жайт, осы үш өңірдің салаға құйған инвестиция көлемі жалпы соманың 50 пайызын құрайды.
