Қазақстан • 02 Наурыз, 2021

Қыс басталғалы қар құрсауынан 1242 адам құтқарылды

9 рет көрсетілді

Қыс кезеңінің басынан бері еліміз бойынша барлығы 1 063 дауылды ескерту жарияланды, тас жол учаскелері 682 рет жабылды, жүк және жолаушылар автокөліктері үшін қозғалысқа 233 рет шектеу енгізілді. Орталық коммуникациялар қызметінде өткен брифингте Төтенше жағдайлар министрі Юрий Ильин соңғы статистикамен бөлісті, деп хабарлайды Egemen.kz.

Жанболат Кенжеғұл

«Құтқару бөлімшелері өзара іс-қимыл жасайтын қызметтермен бірлесіп 1242 адамды, оның ішінде 74 баланы құтқарды және эвакуациялады. 97 жылыту пункті іске қосылды, 439 бірлік техника шығарылды. Авариялық-құтқару жұмыстарына ТЖМ, ІІМ, ЖАО және жол қызметтерінің бөлімшелері тартылды – 5 мыңнан аса адам», - деді ведомство басшысы.

Сондай-ақ, оның айтуынша, қар құрсауында қалатын көліктер саны айтарлықтай азайған. Мұның бәрі уақтылы ескертудің арқасында мүмкін болды. Төтенше жағдайлар мен оқиғалар қаупі туралы халықты ескерту мақсатында азаматтардың ұялы телефондарына ауа райының нашарлауы туралы 3 708 СМС-хабарлама жіберілді. «Дәрмен» мобильді қосымшасы арқылы тұрғындарға 1 057 хабарлама жіберілді.

«Дегенмен, мен келтіріп өткен фактілер адамдардың ТЖ қаупінің болуы, циклондардың орын алуы мүмкін екендігі туралы хабарламаларды мұқият тыңдамайтынын көрсетеді, тиісінше өз өмірлеріне қатер төндіріп, жолға шығады, бұл құтқару жұмыстарын жүргізуге әкеледі. Өткен аптада ауа райы қолайсыз болды, автомобиль жолдарының көп бөлігі жабылды және қазіргі кезде 9 аймақ бойынша дауылды ескерту алдық, 3 өңір аумағында жол учаскелері жабылды. Азаматтарымыздан жолдардың жабылуы туралы алдын ала жіберілген ескертулерді елеп, республикалық және облыстық маңызы бар жолдарда орнатылған блокпосттарды айналып өтуге тырыспауларын сұраймын», - деді елдің бас құтқарушысы.

Синоптиктердің болжамынша, таяу күндері Қазақстанның орталық бөлігіне жаңа циклон жақындайды, күн жауын-шашынды болады, желдің жылдамдығы артады, тиісінше қар құрсауы туындауы ықтимал.

Күннің маңызды және өзекті жаңалықтарын «Егемен Қазақстан» телеграм каналынан оқыңыз