Экономика • 29 Сәуір, 2023

Әлихан Смайылов АҚШ-тың Қазақстандағы елшісімен кездесті

242 рет
көрсетілді
2 мин
оқу үшін

Премьер-министр Әлихан Смайылов пен АҚШ елшісі Дэниел Розенблюм Қазақстан Республикасы мен Америка Құрама Штаттары арасындағы екіжақты ынтымақтастықтың өзекті мәселелерін талқылады, деп хабарлайды Egemen.kz Үкімет басшысының баспасөз қызметіне сілтеме жасап.

Әлихан Смайылов АҚШ-тың Қазақстандағы елшісімен кездесті

Тараптар сауда-экономика саласындағы қазіргі жағдайды және энергетика, көлік-логистика, ауыл шаруашылығы, денсаулық сақтау, білім беру, экология салаларындағы қарым-қатынастарды нығайту перспективаларын және басқа да мәселелерді талқылады.

Премьер-министр Қазақстан АҚШ-ты екіжақты және көпжақты форматтағы стратегиялық серіктесі санайтынын атап өтті. Бүгінде Қазақстанда 900-ден астам бірлескен кәсіпорын табысты жұмыс істеп жатыр.

«Біз Америка Құрама Штаттарымен бұған дейінгі тиімді ынтымақтастығымызды күн тәртібіндегі кең ауқымды  өзара іс-қимыл бойынша одан әрі тереңдетуге және нығайтуға ниеттіміз», деді Әлихан Смайылов. 

Үкімет басшысы былтыр елдер арасындағы тауар айналымы шамамен 40%-ға өсіп, 3,1 млрд доллар болғанын атап өтті. Осы ретте Қазақстан сауда көлемін одан әрі арттыруға әлеуетті және құны 800 млн доллар болатын 90 тауар түрінің экспортын арттыруға дайын. 

АҚШ — Қазақстанға тікелей инвестиция тарту бойынша көшбасшы елдердің бірі. Былтыр америкалық инвестиция екі есеге жуық өсіп, 5,1 млрд доллардан асты. Бұл — пандемияға дейінгі рекордтық деңгейге тең көрсеткіш. 

Өз кезегінде, Дэниел Розенблюм Қазақстан-Америка қарым-қатынастарын ортақ мүдде негізінде одан әрі дамытуға зор әлеует бар екенін атап өтті. 

«Біз инвестициялық көрсеткіштерді нығайтып, екіжақты тауар айналымын арттырғымыз келеді. АҚШ компаниялары Қазақстанда түрлі салалардағы қызмет ауқымын кеңейтуге мүдделі. Бұл тау-кен металлургия кешені, ауыл шаруашылығы, денсаулық сақтау саласы, ақпараттық-коммуникация және жасыл технологияларға, сондай-ақ көлік саласына қатысты», деді Дэниел Розенблюм.  

Сондай-ақ ол биылғы жазда түрлі секторда қызмет ететін 20-ға жуық америкалық компания іскерлік мақсатта Қазақстанға келуді жоспарлап отырғанын айтты.  

Кездесу қорытындысы бойынша тараптар ынтымақтастықтың өзара тиімді барлық бағыты бойынша байланыстарды белсенді түрде жалғастыруға дайын екендіктерін растады.