Сурет: instagram @madeniet__aqparat__ministrligi
Жиынға Парламент депутаттары, Қазақстан халқы Ассамблеясының, орталық мемлекеттік органдардың өкілдері, сондай-ақ отандық және халықаралық ғылыми-сарапшылық қоғамдастықтың мүшелері қатысты. Конференция Президенттің биылғы Жолдауында көрсетілген басым бағыттар аясында этносаралық келісім мен ұлттық бірлікті нығайтудың заманауи үрдістері мен тәсілдерін талқылаудың алаңына айналды.
Келелі отырыста сөз тізгінін ҚХА Ғылыми-сарапшылық кеңесінің төрайымы, Қолданбалы этносаяси зерттеулер институты директорының орынбасары Айгүл Сәдуақасова ұстады. Қазақстан халқы ассамблеясы төрағасының орынбасары Марат Әзілханов пен Мәдениет және ақпарат вице-министрі Айзада Құрманова сөз бастап, ассамблеяның ұлттық бірлікті қалыптастыру саясатын жүзеге асырудағы рөлінің маңызын атап өтті. Сондай-ақ олар елдегі этносаралық келісімді сақтауға бағытталған стратегиялық міндеттерді одан әрі жүзеге асыру үшін мемлекеттік органдардың, этномәдени бірлестіктердің және азаматтық қоғамның өзара іс-қимылын күшейту қажеттігін алға тартты.
Конференцияда спикер ретінде Парламент Сенатының депутаты Нұрия Ниязова, Мәжіліс депутаты Еркін Әбіл, «Қоғамдық келісім» республикалық мемлекеттік мекемесінің директоры Элина Масагутова, Президент орталығы директорының орынбасары Ботагөз Каипова, Шет тілдері университеті жанындағы Ханкук Халықаралық аймақтық зерттеулер орталығының (Корея) ғылыми профессоры Янгмин Чю ой-пікірін ортаға салды.
Жиын қорытындысы бойынша қарар қабылданып, онда қатысушылар алдағы жұмыстың бірқатар негізгі бағытын белгіледі. Қаулыда этносаралық қатынастар саласындағы мемлекеттік саясатты ілгерілету және ағартушылық қызметті жандандыру бойынша ақпараттық жұмысты күшейту қажеттігі аталып өткен. Сондай-ақ мемлекеттік этносаясатты ғылыми және қоғамдық қолдауды нығайту үшін этномәдени бірлестіктердің мемлекеттік органдармен және сарапшылар қауымдастығымен өзара іс-қимылын кеңейту барысы белгіленді. Құжатта Қазақстан халқы ассамблеясының 30 жылдығы қарсаңында этносаралық қатынастар құралы ретіндегі мемлекеттік тілдің рөлін арттыру, этномедиация тәжірибесін кеңінен енгізу және басқа елдермен тәжірибе алмасу үшін этносаясат саласында халықаралық ынтымақтастықты жалғастыру сияқты маңызды бағыттар атап көрсетілген.
