Рудныйдағы жер сілкінісінің себебі анықталды

ҚОСТАНАЙ. 5 сәуір. Мамандар Рудныйда болған жер сілкінісінің себебін айтты. Бұл туралы alau.kz сайтына сілтеме жасаған egemen.kz тілшісі хабарлады. 3 сәуір күні түнгі 1сағат 50 минутта Рудный қаласының тұрғындары жер асты дүмпулерін байқады. Алматыдағы Геофизикалық зерттеулер институтының ғылыми орталығы мамандары жер сілкінісінің себептерін түсіндірген. Институттың сейсмикалық стансасы жерасты дүмпуінің күшін анықтады. Ресми мәлімет бойынша, жер асты дүмпуінің себебі сол ауданның сейсмикалық белсенділігінде болса керек. Сейсмологтар жер асты титаникалық плиталарының қозғалысы жер сілкіндіретінін айтып отыр. Алайда, орталық директоры Наталия Михайлованың айтуынша, оның күші көп болмайды, сондықтан оның зардаптары орын алмады. Орталық директоры Наталия Михайлова: «3-4 балдық жер сілкінісіне ғимараттар құламайды. 6 баллға дейін ғимараттар шыдайды», – деді. Геологтар Қостанайдағы бұл бірінші жер сілкінісі емес деп отыр. 2004 жылы да Рудныйға жақын маңда 2 жерасты дүмпуі болыпты. Олардың күші 3 баллдан аспаған. Нәзира Жәрімбетова. Дерек, сурет: alau.kz.