Басқа басылымдардан: Оңтүстік Корея 30 жылдан кейін конституцияға өзгеріс енгізді

«Бүг­ін мен Конституцияны қайта қарау ту­ралы жобаны ұсынамын. Мен халыққа мем­лекеттің негізгі заңын өзгертемін деп сөз берген едім. Осы уәдемді орындайтын кез жетті», деді Мун Чжэ Ин. 

Ол Біріккен Араб Әмірліктерінде ресми сапарда жүргендіктен құжаттың элек­трон­ды нұсқасына қол қойған. Заң жобасын Ұлттық жиын қолдаса, одан кейін референдум өткізілетін болады. Әзірге ре­ферендум 13 маусым күні өтеді деп жос­парланып отыр. 

Егер Конституцияның жаңа нұсқасы қа­былданса, президенттің өкілеттілік уақыты 5 жылдан 4 жылға дейін қысқа­ра­ды. Бірақ қазіргі президент өз кандидатурасын келесі сайлауда ұсына алатын құқыққа ие болмақ. Соңғы рет Корея Республикасының конституциясына 1987 жылы өзгеріс енгізілген болатын. 

Каталонияда Пучдемонның қамауға алынуына қарсы шеру өтті

Германияда каталониялық сепара­тис­тердің көшбасшысы Карлес Пучдемонның қамауға алынғанына наразы халық шеруге шықты. Соңғы деректер бойынша Барселонадағы үш күнге созылған наразылық акциясына 55 мың адам қатыс­қан. Сондай-ақ Пучдемон мэр болған Жирон қаласында, Таррагон мен Льейд қалаларында да наразылық шеруі өткен. 

Шеру барысында полициямен қақ­ты­ғыстан 90 адам зардап шекті. Полиция 4 адам­ды қамауға алды. Алдағы дүйс­ен­бі кү­ні Пучдемон Германияда сот алдын­да жауап беретін болады. Ол Фин­лян­­дия­дан Бельгияға бара жатқанда ұстал­ған еді. Ал өткен жұма күні Испания со­ты Пучдемонның қамауға алынуына еуро­па­лық ордер берді. Билікке қарсы шығып, бүлік шығарғаны үшін ол 30 жылға дейін бас бостандығынан айырылуы мүмкін. 

АҚШ-Қытай сауда соғысы қаржы нарығының құлдырауына ықпал етті 

Өткен аптада АҚШ Президенті Дональд Трамп жалпы құны 60 млрд долл­ар­­дан асатын Қытайдан келетін тауарлар импортына салық енгізетінін айтқан болатын. Сондай-ақ Америка билігі Қытай компанияларын технологиялар ұрлаумен айналысады деп айыптауда. Бұған жауап ретінде Қытайдың сауда министрлігі Америкадан жеткізілетін 128 тауар импортына салықты 25 пайызға арттыруды жоспарлап отырғанын хабарлады. 

Қаржы сарапшыларының айтуынша, экономикасы ең ірі әрі өзара сауда айналымы жүздеген миллиард доллардан асатын екі мемлекет арасындағы сауда соғысы бүкіл әлем бойынша қаржы нарығының құлдырауына әсер еткен. Сонымен қатар мамандар инвесторлардың АҚШ пен Қытай валютасына қызығушылығы да күрт төмендегенін айтты. 

Қарсылық акциясы

АҚШ-тың 800 қаласында, оның ішінде Вашингтон, Нью-Йорк, Бостон, Чикаго жә­не Хьюстон секілді ірі қалаларда «Өмі­­рі­міз үшін шеру» акциясына жинал­ған ха­лық атыс қаруын сату және алып жүруге бақы­лауды күшейтуді талап етті. Нара­зылық акциясының ұйымдастырылуына биыл ақпан­да Парк­лен­­дтегі мектептің бұрынғы түлегінің оқушыларға оқ атып, 17 адам­ның мерт болғаны түрткі болды. «Өміріміз үшін шеру» ұранымен өткен наразылық акциясына шыққандардың дені – мектеп оқушылары мен жастар. 

Washington Post газетінің хабарлауынша, 1999 жылдың сәуір айынан бері АҚШ-та 190 мыңнан астам оқушы сабақ кез­ін­де атыс-шабысқа тап болған.  Шеруді ұйымдастырушылар қару ұс­тау­ға бақылауды күшейту проблема­сына назар аудартуды мақсат етті. Бұдан бөлек олар жас­тарға қарашада өте­тін конгресс сайлауы­на тіркеліп, қа­ру ай­налымына қатысты ере­женің өзге­руі­не атсалысуға шақырды. 

Шолуды әзірлеген  Гүлнұр Қуанышбекқызы, «Егемен Қазақстан»