Ауыл мәселесіне арналған жүздесулер

Парламент Мәжілісінің депутаты Мұрат Теміржанов жұмыс бабындағы сапармен Аршалы ауданына келді. Ол аудан әкімі Азамат Тайжановпен бірге «Питковский» шаруа қожалығының өндірістік алаңы мен Аршалы аудандық «Нұр Отан» партиясының филиалы кеңсесінде ЖШС басшылары мен ауыл шаруашылығы құры­лым­дарының және нұротан­­дық белсенді топпен кездесті. «Питковский» шаруа қожалы­ғын­дағы кездесуде шаруашылық бас­шы­лары П.Питковский, В.Балашов, Н.Саламатов, Э.Әлиев аудан шаруа­ларын толғандырып жүрген біраз мәселені алға тартты. Мұрат Барит­ұлы қойылған барлық сұрақтарға толық­қанды жауап берді. Ал кездесуге келген белсенділердің көбі агро­өнеркәсіптік секторға қызмет ететін агроөнеркәсіптік банк құрудың маңыздылығын атап көрсетті. «Нұр Отан» партиясы филиалының кеңсесіндегі кездесуде Елбасының «Нұрлы Жол» бағдарламасына арнал­ған лекция тыңдалып, «100 нақты қадам» Ұлт Жоспарының жүзеге асырылу барысы талқыланды және сұрақтар бойынша ашық әңгіме жүргізілді. Сонымен қатар, «Жұмыспен қамтудың жол картасы-2020» бағдарламасына қатысты сұрақтар да қаралды. Аудан шаруаларын несие алудағы қағазбас­тылық, талап етілетін анықта­ма­лық құжаттардың көптігі толған­ды­рады. Әлеуметтік жұмыс орындарына байланысты ережелердің ашып көр­се­тілетін тұстары бар. Осының бәрі жұ­мысты дұрыс ұйымдастыруға кері әсерін тигізеді. Несиені ресімдеу кезінде туындайтын мәселелер де бар­шы­лық. Кепілдікке қойылатын мүлікті бағалау коэффициенті өте төмен. Бұл ауыл өндірісі үшін тиімсіз екені белгілі. Әңгімелесу кезінде бірқатар ұсы­ныс­тар да түсті. Мәселен, мал басын асылдандыру, оны тектік сәйкестендіру жұ­мысын жақсарту үшін қаржы көлемін ұлғайту керек. Мәжіліс депута­ты Халыққа қыз­мет көрсету орта­лық­тарында (ХҚО) «Үкімет азаматтар үшін» атты бағ­дарлама іске асырылып, несие алуды ресімдеген кездегі бірқатар құжаттар саны қысқартылатынына назар аударды. Кепілдік саясаты оңтай­ланды­рылып, оның ашықтығы мен қолжетім­ділігі қамтамасыз етіледі. Жалпы, Қазақстанда адамдардың өмір сүруін жақсарту үшін көптеген мем­ле­кеттік бағдарламалар құрыл­ғанын айтты. Соған сәйкес, түсінік пен насихат жұмысын күшейту қажеттігі атап көрсетілді. Бақберген АМАЛБЕК, «Егемен Қазақстан» Ақмола облысы