немесе ұлттық ұғымдағы жеңсік ас
Соңғы екі-үш жылда әлем жұртшылығы табиғи азық-түлік өнімдерін тұтынуға ден қоя бастағаны айқын сезілуде. Осы жолда әлем ғалымдары тарапынан терең ізденіске түсіп, сан түрлі идеялар мен ұсыныстар айтылуда. Соның бірі – нидерландтық ізденушілер көп қабатты тұрғын үйлердің жертөлесінен өнім алу тәсілін ойлап тапса, АҚШ ғалымдары алақандай жерден аз күнде көкөніс түрлерін өсіру арқылы, оның пайдалылығын 40 пайызға дейін арттырудың жобасын таныстыруда.
Әлемге әлі кең тарай қоймаған бұл жобалардың жүзеге асуы бүгінде Қазақстанда да қызу қолға алына бастағаны қуантады. Атап айтқанда, Астана іргесіндегі Аршалы ауданының Арнасай ауылының тұрғындары әлем халқы әлі де болса терең ұғына қоймаған жаңашылдықты игеруге ұмтылуда. Яғни, аскөк пен жуа, сарымсақ, сәбіз, шалқан, қияр, қызанақ сынды сан түрлі бақша өнімдерін үлкен қалалардағы көп қабатты тұрғын үйлердің жертөлесінде өсіру мен шағын қорапта жеті тәулік ішінде жетілдіріп, өнімді талғажау етудің қыр-сырын меңгеруде. Біз жуырда ғана «Жасыл» экономиканы қолдау мен G-Global-ды дамыту коалициясы» заңды тұлғалар бірлестігінің демеуімен жүзеге асып жатқан осындай игі істердің куәсі болдық.
Осы мақсатта Арнасай ауылында аумағы 1000 шаршы метрді құрайтын Кеңес заманынан бері қаңырап бос тұрған екі қабатты ғимарат күрделі жөндеуден өткізіліп іске қосылды. «Бұл жерден біз осындай жылыжай өндірісі арқылы жыл он екі ай бойы өнім алудың сан түрлі тәсілі мен оның қыр-сырын үйрететін халықтық орталық аштық. Көздегеніміз – ел тұрғындарын үнемшілдік пен тиімділікке үйрету», – дейді «Жасыл» экономиканы қолдау мен G-Global-ды дамыту коалициясы» ЗТБ басқарма төрайымы Салтанат Темірқұлқызы.
Ұйымдастырушылардың айтуына қарағанда, бұл орталықта осы салада кәсіп ашып, нәпақа табам деушілерге қолдау көрсетіледі. Сонымен қатар, заманауи озық технологиялар мен инновациялар енгізілген тың жобаларды жүзеге асыру да оқытылады. Атап айтқанда, үлкен қалалардағы қараусыз жатқан жертөлелерді аз шығынмен мол табыс көзіне айналдыру әдісін кеңінен қолданысқа енгізуге баулиды. Яғни, көпқабатты тұрғын үй жертөлесін желдетіп, жарықтандыру арқылы бау-бақша өнімдерін өсіру. Аталған ұйым Нидерланд елінен қажетті құралдарды алып келіп, бүгінде жарықдиодты шамдардағы қызыл-жасыл сәуленің көмегімен қараңғы жертөледен өнім өндіруге қатысты құрылғыларды іске қосқан. Күн көзі түспейтін қараңғыда қияр қалай өседі дейтін шығарсыз? Бұл өзі тұнып тұрған инновация. Сондықтан да, байыппен түсіндірейік. Жертөледе қияр өсіру үшін үш негізгі қажеттілік: жылу мен желдету жүйесі және 10 кВт инфракүлгін түсті жарық болса жеткілікті. Осы үш негізгі қағида бұзылмаса, өзге қажеттіліктерді іс барысында реттеп алуға болатын көрінеді. Яғни, диаметрі 120 мм. пластикалық құбырлардың беткі қабатын төрт елі ендікте тіліп түсіп, тұқымды арнайы топыраққа отырғызу арқылы оны сумен қамтамасыз ету мәселесі шешіледі. Сонымен бірге, ұзындығы 6 метрге дейін созылатын қияр сабағын жоғары-төмен байлау әдісі арқылы оның еркін өсіп, мол өнім беруіне мүмкіндіктер жасалады. Оған қоса, өсімдікті байлау бағаналарының биіктігі мен енінің өлшемін есептеу негізінде әлгі қажеттіліктің бірі – жарықдиодты шам ілінеді. Жаны мен жоғары-төменнен түскен жарықтың өсімдікке оң әсерін тигізетін жарықдиодты LED шам құрылғысы екі түрлі түс шығарады. Қызыл мен жасыл түстің шағылысуы нәтижесінде пайда болатын инфракүлгін сәуленің құрамында қиярдың өсіп-жетілуіне қажетті энергияның бәрі бар.
Ал оның өсу мерзімі мен өнім беру кезеңі әдеттегідей жағдайда өтеді. Өнімнің көлемі мен құрамында қандай да бір өзгешелік орын алады деу артықтау. Тиімділігі сол, мегаполис қалалардағы жертөлелер арқылы табиғи таза өнімдер қолжетімді болмақ. Мұның өзі ебін тауып, кәсіп көзіне айналдыра білгендер үшін әлеуметтік жағдайын түзеп алуына бірден-бір сеп болады. «Біздің орталығымызға Нидерланд елінен мамандар келіп, жарықдиодты шамдарды кепілдігімен қосып, жұмыс істеу тәртібін жергілікті тұрғындарға үйретті. Мұның тілін толық меңгерген мамандарымыз елімізде осы кәсіпке қызығушылық танытқан кез келген азаматты оқытып, арнайы курстардан өткізудеміз», – дейді орталықты ұйымдастыру жұмысының жетекшісі Татьяна Николаева.
Сонымен қатар, игі істі қолға алып жүрген мамандардың сөзіне қарағанда, орталық қызметі арқылы елдегі шағын кәсіпкерліктің жандануына мүдделілік танытып жүрген барлық мемлекеттік мекемелер мен өзге де үкіметтік емес ұйымдармен тығыз әріптестік орнату көзделген. Мәселен, қазірдің өзінде «Даму» кәсіпкерлікті қолдау қоры» мен жергілікті атқарушы органдардың көмегімен жылыжай баптап, жыл он екі ай өнім алуға ынталы кәсіпкерлер арнайы 3 күндік оқытудан өткізіле бастаған.
Арнасай ауылында жүзеге асып жатқан тың жаңалықтың тағы бірі – шағын қораптарға көкөніс өнімдерін егіп, өсіру арқылы адам ағзасын пайдалы дәрумендермен қамтамасыз ету. Мұндағы жаңашылдықтың ерекшелігі сол – ені 20x40 см шамасында, ал биіктігі 10-15 см болатын қораптарда аскөк, шалқан сынды түрлі ас мәзірлеріне қосылатын дәмдеуіштерді өсіру мүмкіндігі. Және оны отырғызу, топырағын ауыстыру немесе тасымалдау өте қолайлы. Бұл жерде назар аударуды қажет ететін бір мәселе – тұқымды топыраққа себу мен оны кесіп алғанға дейін бар-жоғы жеті тәуліктің жеткілікті болуы. Ал өнімнің адам ағзасына пайдалылық әсері 40 пайыздық көрсеткішке тең келеді. Мұны АҚШ ғалымдары зерттеп, дәлелдеп, соңғы 2-3 жыл ішінде әлемдік нарықта кеңінен қолданысқа енгізе бастаған. Ал осы орайда «Бұл жоба біздің елге қайдан келді?» деген сұрақ туындауы сөзсіз.
Алматы облысының тумасы Мамырхан Қасымов АҚШ-қа «Болашақ» бағдарламасымен оқуға барып, сол жақта осы саламен айналысатын мамандармен бірлесіп, Қазақстанда оның жүзеге асуына білек түре кірісіпті. Осы мақсатпен ол америкалық досы Уолтер Грейберді Арнасай ауылына шақырып, ауыл тұрғындарына жаңашыл идеяның қыр-сырын үйретуде. «Бұл жоба АҚШ-тың өзінде енді-енді өріс ала бастады. Етсең – еңбек, жесең – азық. Осы жобаны қалада өсіп жатқан балаларды еңбекке баулу әдісі ретінде де пайдаланатын ата-аналар бар. Мұның сыртында табиғи әрі дәруменге бай көкөністерге қолжетімділіктің өзі неге тұрады?», – дейді идея авторлары.
Қазақ – қағылез халық. Осы орайда тиімділік тұрғысынан бір мысалды тілге тиек етсек. Осындай игілікті істің барын Интернеттен көрген соң Астана қаласындағы №52 балабақша тәрбиешісі Рима Сайлыбайқызы топтағы балалармен бірлесіп аскөк өсіруді қолға алады. Бүлдіршіндерді еңбекке баули отырып ойнатуды ұйғарған оның өсімдік өсіру тәжірибесі нәтижесіз болмаған. Бүлдіршіндердің нұсқаулыққа сай топыраққа тұқым сеуіп, өсіріп, ертеңгілік сабағында аскөкті қиып, ата-анасына сыйға тартуы оларды ерекше қуанышқа кенелткен. Мұның астарында ғажап тәлім-тәрбие мен таным-түсінік жатқаны айтпаса да түсінікті. Ендеше, бұл әдісті неге кеңінен қолданбасқа?!
Расымен де, игеріп іске асыра білгенге бұл тың идея. Себебі, біздің қоғамда кеңселер мен үй терезелерінің алдында гүл өсіріп, соған мейір-шапағатын төгіп жататындар аз емес. Ол енді әсемдік, яки эстетикалық талғам үшін қажет те болар. Бірақ, мынаның артықшылығы өнім беруінде. Ал енді оны қалай іске асыру керек? Айталық, жұмыртқа тасымалдауға арналған қорап көлеміндегідей ыдысқа арнайы әзірленген биогумус топырағын салып, аскөк тұқымын себесіз де, бетін жарық ішіне енбейтіндей етіп жауып, үш тәулік сақтайсыз. Осы мерзім өткен соң, қорапты ашып, күн сәулесіне 4 тәулік қоясыз (ол көпқабатты тұрғын үй балконы немесе терезе жақтауы болса да). Осы аралықта аскөк 13-18 см шамасында биіктеп өскенде, қажетіңізше кесіп, турап, асыңызға қосасыз. Бар болғаны осы ғана. Алайда, қорап бірнеше пайдалануға жарамды болғанымен, оның топырағын әр тұқым себерде ауыстырып тұрған жөн. Себебі, өсімдік тамырдан нәр алатындықтан, топырақтың құнарлы болғаны жөн. Осылайша, үлкенді-кішілі сан түрлі ас мәзіріне қосатын дәмдеуіш өсімдіктерді үй жағдайында өндіруге болады. Тіпті, қызанақ пен қиярды да осындай тәсілмен өсіруге болатын көрінеді. Асылында, мұндай көкөністерді барынша үлкейтіп өсірмей-ақ, шағындау кезінде қолданса, оның құнарлылығы мол болатыны бар.
Қалай десек те, бұл өзі қазақтың сүйсініп жейтін жас малдың етінен жасалатын жеңсік асы немесе дәмі таңдайда қалатын марқа қозының етіне баланатындай дүние. Яғни, айналып келгенде, түп-төркіні өзіміздің ұлттық болмысымыздың о жақ, бұ жағындағы ұғым болғанымен, америкалықтардың артықшылығы осы жобаны ғылыми тұрғыдан зерттеп, саралап, қағазға қаттап-құнттап, патенттеп заманауи айналысқа енгізгені болса керек.
Нұрлыбек ДОСЫБАЙ,
«Егемен Қазақстан»
Ақмола облысы