Ауылдар мен көшелерді абаттандыру сенбіліктермен ғана шектеліп қалмауы керектігін, еңбек ұжымдары мен азаматтар түрлі бастамалардың қолдаушысы, жалғастырушысы болуы тиістігін атап көрсетті.
Бас шаһарды көгалдандыру мен абаттандырудың жаңа тұжырымдамасы жайлы қала әкімі Марат Тасмағанбетов әңгімеледі. Биыл 70 шақырымға 17 500 түп көшет отырғызу міндеті тұр. Олардың 7 500-і қарағай, 2 000-ы терек, 2 000-ы алма ағашы, 2 000-ы шетен, 2 000-ы жөке, 3 000-ы қайың. Алғашқы сенбілік күні
2 000 көшет отырғызылды. Бұдан басқа білім беру мекемелері – 1 200, ПИК төрағалары мен жол құрылысы ұйымдары 600 түп көшет екті. Арнайы құрылған бригадалар ескі ағаштарды отаумен де айналысады. Бұдан тысқары жаңадан бой көтерген «Береке» шағын ауданында бір мың түп ағаш көшеті отырғызылады, деді М.Тасмағанбетов. Көгалдандыру жұмыстары аясында аула аумақтарын абаттандыру да қоса қамтылады. Бүгінде қаладағы «жанды қоршаулардың» ұзындығы 10 шақырымды құрайды. Негізінен олар алма ағашы мен оның жабайы түрлерінен жасалады. Енді ұсақ, жұмсақ жапырақты өскіндер де пайдаланылмақ. Сонда жалпы ұзындығы 25 шақырымға созылады.
Жыл сайын осынша көлемде ағаш егілетін болса, Петропавл аз уақытта жасыл желек жамылған әсем қалаға айналады. Өсімдік – қаланың өкпесі. Оның үстіне біздің аймақта өсетін ағаштарға көп күтімнің қажеті жоқ, ылғал жеткілікті, деді өңір басшысы 16 мың шаршы метр аумақ гүлзармен көмкеріліп, биыл 4 мың шаршы метрге көбейтілді.
Қ. Ақсақалов ақпаратты тыңдай келіп, ұсынылған тұжырымдамаға бірқатар түзетулер енгізді. Негізгі көшелер қамтылған, саны да ұлғайған. Мұның бәрі жұртшылық үшін жасалатын акция болғандықтан, «Коммунхоз» мекемесімен қоса кәсіпкерлерді де жұмылдырған жөн, деді Құмар Іргебайұлы. 1 мамырдан бастап пәтер иелері кооперативтері үйлер мен аула аумақтарын абаттандыру қажеттігін еске салды. Тұрғындар үйлерін, аулаларын жеке қаражат есебінен жөндеуі керек. Біз жиектастармен, басқа да материалдармен көмектесеміз. Өз қолдарымен жасаған дүние әрдайым жақсы болады және ұзақ сақталады. Бұдан былай Наурыз және 1 мамыр мерекелерін аулаларда қарсы алуды дәстүрге айналдырамыз. Осындайда адамдар бір-бірімен араласады, қуаныштарын бөліседі, тәжірибе алмасады. Оны көріп өскен жастардың бойында елге, жерге деген отаншылдық рух орнығады.
Кеңесте Қазақстан Конституциясы көшесін қайта жаңғырту мәселесі де талқыланды. Аталмыш учаскеде 24 мың шаршы метр аумақтың өрнектасы жаңаланады. 32 орындық пен 32 қоқыссалғыш ауыстырылады. Лотос үлгісіндегі шырақшамдар, жаңа энергия үнемдеу шамдары орнатылады.
Облыс әкімі абаттандыруға жергілікті кәсіпорындарды тартуды, бағаның қолжетімділігін назарда ұстауды тапсырды.
Қайта жаңғыртудан кейін өрнектастарды ауыстыру жаппай үрдіс алуы керек. Қаланың сәнін бұзып, сиқын кетіріп тұрған аумақтар аз емес. Былтыр ғана ауыстырылған кей өрнектастардың жарамсыз болып қалғаны – сапаның төмендігінен. Сырлау технологиясын да жете меңгерген абзал. Көгалдандыру мен абаттандыруға жаңаша сипат берудің барлық мүмкіндіктерін қарастыруға тиіспіз, деді жиынды қорытындылаған өңір басшысы.
Өмір ЕСҚАЛИ,
«Егемен Қазақстан»
Солтүстік Қазақстан облысы
