«Қазақстандық кәсіпкерлердің патриоттық және отансүйгіштік қасиеттерінің ерекше екендігін «Парыз» байқауы арқылы анық байқауға болады. Бұл – Еңбек және халықты әлеуметтік қорғау министрлігінің Энергетика министрлігімен, «Атамекен» ұлттық кәсіпкерлер палатасы және Кәсіподақтар федерациясымен бірлесе отырып, бизнестің әлеуметтік жауапкершілігіне байланысты жыл сайын дәстүрлі түрде өткізетін байқауы. Биыл байқау оныншы рет ұйымдастырылып отыр. Сондықтан осыны ескере отырып, «Парыз – табыстың 10 жылы» тақырыбында өткізуді жөн көрдік. Өйткені, соңғы он жылда Қазақстан кәсіпкерлерінің табысы айтарлықтай ұлғайды. Олар сонымен бірге, бизнестің әлеуметтік жауапкершілігін терең сезіне бастады», деді Біржан Нұрымбетов.
Бизнестің әлеуметтік жауапкершілігі жөніндегі «Парыз» байқауы ірі, орта және шағын кәсіпкерлік субъектілер арасында «Үздік әлеуметтік жауапты кәсіпорын», «Еңбек қорғау саласындағы үздік кәсіпорын», «Үздік ұжымдық шарт», «Экологияға қосқан үлесі үшін» аталымдары бойынша өткізіліп келеді.
Байқау 2008 жылы бастау алды. Содан бергі уақыт аралығында еліміздің барлық өңірінен 4000-нан астам кәсіпорын осы сайысқа қатысқан. Олардың арасында шоқтығы биік көрініп, жеңімпаз атанғандары да аз емес.
– Қоғамның әлеуметтік тұрақтылығы бизнестің өркендеуіне кепіл бола алады. Еліміздің өсіп-өркендеуіне де дәл осы жағдай бірден-бір себеп, − деді Еңбек және халықты әлеуметтік қорғау вице-министрі.
Бұл ретте «Парыз» республикалық байқауының орны бөлек. Оған қатысуға ниет білдірушілер қатарының биыл да аз болмайтыны анық. Сондықтан оларға қазірден бастап қамдана беруге болады. Бизнестің әлеуметтік жауапкершілігі жөніндегі биылғы «Парыз» байқауы бастау алды. Оны баспасөз мәслихатында Еңбек және халықты әлеуметтік қорғау вице-министрі Б.Нұрымбетов мәлім етті.
Жұмыс берушілердің әлеуметтік жауапкершілігімен қатар кәсіпорын табысының ұлғаюы қарапайым еңбек адамдарына да тікелей байланысты екенін Мемлекет басшысы ұдайы айтып келеді. Елбасының «Жалпыға Ортақ Еңбек Қоғамына қарай он қадам» идеясының түп-төркіні де еңбек адамдарын асқақтату, оларға лайықты құрмет көрсету. Осы орайда Еңбек және халықты әлеуметтік қорғау министрлігі былтырдан бастап еңбек әулеттері мен өндіріс еңбеккерлері арасында «Еңбек жолы» республикалық байқауын қолға алған еді. Бұл байқау да қазіргі кезде кең сипат алды. Негізгі мақсат – ел экономикасының өсіп-өркендеуіне қазақстандықтардың серпінді үлес қосуына жол ашып, ерен еңбегімен ерекшеленгендерге лайықты құрмет, сый-сияпат көрсету.
Байқау үш аталымнан тұрады: «Үздік еңбек әулеті», «Өндірістің үздік жас маманы», «Жұмысшы жастардың үздік тәлімгері». Байқауға қатысуға өтінімдер 20 мамырдан басталмақ. «Еңбек жолы» байқауының жеңімпаздарын іріктеу өңірлік және республикалық деңгейдегі екі сатыдан тұрады. Әр аталым бойынша онлайн дауыс беру арқылы үздік үштік анықталады. Жеңімпаздарды марапаттау республика аймақтарында Еңбек күніне орайластырылып өткізіледі. Ал републикалық байқаудың қорытындысы қазан айында белгілі болады.
Ғалым ОМАРХАН,
«Егемен Қазақстан»
