Саясат • 17 Наурыз, 2020

Коронавирус қауіпсіздікті нығайтуды талап етеді

571 рет
көрсетілді
6 мин
оқу үшін

Коронавирус инфекциясының жер жүзіне өте жылдам қарқынмен таралуы әлем жұртшылығын қатты алаңдатып отыр. Оның үстіне аурудың асқынуынан қайтыс болғандардың саны өсе түскені де ешкімді бей жай қалдырмайды. Бұл жаһандық дертке айналып тұр. Ендігі жерде алаңсыз, санитарлық-эпидемиологиялық шараларды сақтамай болмайтынын ұғындырып отыр.

Коронавирус қауіпсіздікті нығайтуды талап етеді

Президент Қасым-Жомарт Тоқаев 15 наурыз күні Дү­ние­­жүзі­лік денсаулық сақтау ұйымы­ның жаңа COVID-19 коронавирусын пан­­демия деп жариялауына байла­­ныс­ты елімізде төтенше жағдай ен­гізу туралы Жарлық шығарды. Мем­лекет басшысының Жарлығында азаматтардың өмірі мен денсаулығын қорғау мақсатында Қазақстанның бар­лық аумағында 16 наурыздан бастап 15 сәуірге дейінгі аралықты қам­титын кезеңде қандай шаралар жүзе­ге асырылатыны жан-жақты көрсетілген.

Кеше Мемлекет басшысы халыққа жолдаған Үндеуінде әлемде қалып­тас­қан күрделі ахуалға, яғни корона­вирустың таралуына қатысты елімізде төтенше жағдай енгізілгенін, ондай шешімнің бүкіл халықтың денсаулығы үшін қабылданғанын жеткізді. Сон­дай-ақ Президент татулық пен тұтас­тықтың арқасында кез келген қиын­дық­тан шығуға болатынын айтты.

Халқымызда «Ауырып ем ізде­ген­ше, ауырмайтын жол ізде» деген на­қыл сөз бар. Сондықтан қатерлі ауру­дың алдын алып, оның кең етек алып кетуіне жол бермеу үшін бәріміз жұ­мыла күрессек, алынбайтын асу бол­майды. Президенттің елімізде төтенше жағдай енгізу туралы осы шұ­ғыл шешімін мемлекетіміз бен хал­қымыздың тағдырын ойлайтын әрбір азамат қолдайтыны анық.

Қауіпті вирус қауіпсіздікті нығай­туды талап етеді. Аталған вирусқа қар­сы күрестің басты шарттарының бірі – тазалық сақтау. Жолаушылар тасымалдайтын ұшақтардың ішін, вагондарды және автобустардың ішін зарарсыздандыру шаралары қолға алынып отыр. Бұл өте дұрыс. Өйткені қандай аурудың да вирустары тазалық сақталмаған жерлерде өсіп-өнетіні белгілі. Сондай-ақ кинотеатрлар мен театрлардың залдарын зарарсыздандыру ұдайы жүргізіліп тұруы тиіс. Шынын айту керек, соңғы жылдары аталған қоғамдық-мәдени орындарда осындай тазалық шаралары өз деңгейінде жүргізілмейтінін көріп жүрміз. Мысалы, қазіргі таң­да кинотеатрлар үлкен сауда орта­лықтарында орналасқан. Таза ауамен желдетіп тұратын терезелері жоқ. Күн де түспейді. Желдеткіш шах­талары арқылы ауаны тазартқанымен, ол жеткіліксіз. Бүгінде қолға алынып жатқан сақтық шаралары осы кезге дейін ескерілмей келген көптеген кемшіліктің бетін ашып, оларды жоюдың жолдарын көрсетіп беретіні анық. Қандай болса да, жұқпалы ауру­лардың алдын алуға өз септігін тигізетіні сөзсіз.

Осы орайда, ел Президенті Қасым-Жомарт Тоқаев өз Жарлығында қо­ғам­дық тәртіптің сақталуына баса ма­ңыз беріп отыр. Сондай-ақ ірі сау­да объектілерінің жұмыс істеуіне шек­­­теу қою, сауда ойын-сауық орта­лықтарының, кинотеатрлардың, театр­лардың, көрмелердің және адамдар көп жиналатын басқа да объектілердің қызметін тоқтату қажеттігін алға тар­тып, тиісті шаралар қабылдау жөнінде құзырлы органдарға тапсырма берді. Сонымен қатар ойын-са­уық, спорттық және басқа да бұ­қаралық іс-шараларды, сондай-ақ от­басылық, салт-дәстүр іс-шараларын өткізуге де тыйым салды. Бұған әрбір қа­зақстандық азамат түсіністікпен қарап, қатаң іс-шараларды ортақ мүддеміз жолындағы бірлескен күш-жігеріміз деп қабылдауы қажет.

Халқымыз «Бірлік бар жерде тір­­лік бар» дейді. Президент жа­рия­­лаған төтенше жағдай кезінде бар­лық іс-шараларды орнымен жүзеге асыра білсек, барлығымыз тәртіпке ба­ғы­нып, осы іске атсалыссақ, қауіпті ви­рустың таралуына жол бермейміз.

COVID-19 коронавирус дерті бә­рімізді де әрі қарай басқаша өмір сүруге итермелеп отыр. Әр адамның таза­лыққа, адалдыққа баса мән бе­руіне өз әсерін тигізеді. Тамақтану мә­дениетін дұрыс қалыптастыруға кө­мектеседі.

Қазір дүние жүзі тазалыққа бет бұруда. Халқымыз «Тәні сау­дың – жаны сау», дейді. Тазалық бол­­ған жерде адамның денсаулығы да мық­ты болады. Сондықтан да «Та­залық – сау­лық негізі, саулық – бай­лық не­гізі» деп бекер айтылмаған. Әр­бір адам күнделікті әрекетінде осы жағы­­на көбірек мән беруі керек.

Коронавирус инфекциясына қарсы дүние жүзі елдері бірігіп, іргелі жұ­мыс атқарып жатыр. Алайда тағы бір ескеретін жайт бар. Әлемнің бар­лық елдері соғыс қаруларын шығаруға жә­не қажеттілігіне жылына 1,5 трлн дол­лардай қаражат жұмсап келеді. Ал осы тұста әлемде 1 миллиардтай адам әрбір таңын аштықпен қарсы алады. Дүниежүзілік денсаулық сақтау ұйымы (ДДҰ) мен ЮНИСЕФ-тің жаңа баяндамасының деректері бо­йын­­ша әлемдегі он адамның үшеуі (2,1 миллиард) тұрғылықты жері бойын­ша қауіпсіз және жеңіл қолжетімді сумен қамтамасыз етілмеген.

Осыған байланысты әлем елдері бірігіп, әр жерде болып жатқан со­ғыс­тар мен қақтығыстарды тоқ­татып, қа­ру­лануға жұмсалып жатқан қара­жатты денсаулық саласына ба­ғыттаса, сондай-ақ ашаршылық жағ­дайында отырған елдердің хал­қына гумани­тарлық көмек көр­се­туге және қатерлі індеттерге қар­сы кү­ресуге бөлетін болса, оның нә­ти­жесі ғаламат болар еді. Әрі мұн­дай жаһандық маңыз­ды бет­бұ­рыс­тың қай құрлықта орна­лас­қа­нына қа­рамастан, қай мемлекетке де тиім­ді болатыны ақиқат.

Қазір адамдардың өзара қарым-қатынасы өзгере бастаған сияқты. Бір-бірін қолдап, көмек беруге деген ықыластары мен қамқоршылық сезімдері арта түскені байқалады. Бәрінің санасында осы қатерлі ауруға қарсы күресті бірлесіп жүргізу идея­сы орнығып отыр. Ғалымдардың пікі­рін­ше, коронавирус ауруының таралуы жазға қарай, күн ысыған кезде тоқ­тайды. Бірақ қорғану шарасын қатаң сақ­та­ғанымыз абзал. Елімізде жасалып жатқан жұмыстар, қауіпсіздік шаралары өз нәтижесін береді деп сенемін.

 

Ерсұлтан Бектұрғанов,

Парламент Мәжілісінің депутаты, Nur Otan партиясы фракциясының мүшесі