«Мемлекет пен медицина қызметкерлерінің арқасында өңірлердегі медицина-демографиялық ахуалды айтар болсақ, пандемия уақытында елімізде бала туу көрсеткіші жоғарылаған. Сондай-ақ өмір сүру ұзақтығының өсуі де байқалады. 2020 жылдың қорытындысы бойынша нәресте өлімінің көрсеткіші 3%-ға төмендеді, керісінше бала туу көрсеткіші 3 пайызға өскен», деді министр есеп беру кездесуінде.
Цойдың айтуынша, қатерлі аурулардан болатын өлім көрсеткіші де 3 пайызға төмендеген. Сонымен қатар жазатайым оқиғалардан, әртүрлі жарақаттардан, уланудан болатын өлім көрсеткіші 15 пайызға азайған. Туберкулез секілді қауіпті аурулардан болатын өлімнің көрсеткіші төмендеген.
«Айтылған сандардың артында адам өмірі, медицина қызметкерлерінің ерен еңбегі, сондай-ақ ішкі істер қызметкерлерінің, жергілікті атқару органдарының да жұмыстарын айта кеткен жөн. Тіпті өлімнің 1 пайызға азайғанының өзі үлкен жеңіс екенін айта кеткен жөн», деді Денсаулық сақтау министрі.
