Жамбыл облыстық Мәдениет және тілдерді дамыту басқармасының ұйтқы болуымен Тараз қалалық мәдениет үйінде ұйымдастырылған іс-шарада Ұлттық киноны қолдау орталығы түсірген «Жамбыл. Жаңа дәуір» фильмі көрсетілді. Тарихи байопиктің сценарисі әрі қоюшы-режиссері – Жандос Құсайынов. Шығармашылық топ туындыға кіріспес бұрын архивтерді ақтарғанын ескеру керек. Ол үшін тіпті Мәскеудегі мұрағаттар зерттелген.
«Тарихыңды білмесең, келешекті болжай алмайсың» деген сөз бар. Біздің де Жамбыл облысында «Жамбыл. Жаңа дәуір» фильмін ұсынуымыз бекер емес. Биыл 6 жылдығын атап өткен Ұлттық кино орталығының негізгі миссиясы – өткеннен сыр тартып, осындай тарихи тұлғаларымыздың жарқын мұрасын жас ұрпаққа насихаттау. Фильм аты айтып тұрғандай, қазақ ауыз әдебиетінің айтулы тұлғасы, жыр алыбы Жамбыл Жабаев туралы. Фильмде ақынның өміріне әсер еткен айтулы оқиғалар суреттелген. Атап айтқанда, ақындар слеті, ақын өлеңдерінің баспасөзде жариялануы. Сондай-ақ Жамбыл Жабаевтың Ораз Жандосовпен және басқа да көрнекті қайраткерлермен кездесуі көрсетіледі. Бұл іс-шара еліміздің өзге өңірлерінде де жалғасады. Біздің мақсат – ауыл-аймақтағы көрерменді отандық киномызбен, Орталықтың фильмдерімен таныстыру», деді Ұлттық киноны қолдау орталығының басқарма төрағасы Құрманбек Жұмағали.
Орталық басшысы атап өткендей, бұл үрдіс еліміздің өзге қалалары мен ауылдық округтерінде де ұйымдастырылады деп жоспарланып отыр. Бастама аясында ел тарихы мен мәдениетін айшықтайтын фильмдерді таныстыру жалғасады. Мәселен, Кино күндері аясында көрсетілетін «Қажымұқан» ұлттық рухымызды асқақтатса, «Дос-Мұқасан» фильмі арқылы тұлғалардың жүріп өткен жолына қанығуға мүмкіндік беріледі. «Набат операциясы», «Время патриотов» құқық қорғаушылардың еңбегін көрсетіп, Отанға деген сүйіспеншілікті арттырады. «Бауырына салу» деп аталатын кинода ұлттық дәстүр дәріптеледі. Кішкентай көрермендерге арналған «Тайқазан» деп аталатын анимациялық фильм, «Алматы, мен сені жақсы көремін!», «Соңғы үкім», «Дала қасқыры», «Тоқта, түн», «Шулама» фильмдерінің де көрерменіне айтар ойы бар.
