видеодан алынған кадр
Туыстарының айтуынша, оқиға кезінде ауа райы қолайлы болған, қатты жел де, жаңбыр да болмаған. Ағаш қыздың анасы мен бауырларының көз алдында құлаған.
Салдарынан бойжеткеннің бас сүйегі ауыр жарақат алған, жамбас сүйегі және аяғы сынған, сондай-ақ денесінің түрлі бөліктерінде көптеген жарақат бар. Қазір ол алтыншы тәулік бойы комада жатыр. Дәрігерлер оның өмірі үшін күресіп жатқанымен, миының ісіну қаупі әлі де жоғары екенін айтады.
Жәбірленушінің жақындары құлаған ағаштың толықтай қурағанын айтып отыр. Оқиғадан кейін олар тоғайды аралап, құлауға шақ тұрған басқа да қураған ағаштарды байқаған. Осыған байланысты отбасы қала билігін аумақты толық тексеріп, тұрғындарға қауіп төндіретін ағаштарды шұғыл түрде кесуге шақырды.
Олардың пікірінше, егер қайғылы оқиғаның алдын алуға мүмкіндік болғаны анықталса, жауапты тұлғалар заң алдында жауап беруге тиіс.
Алматы қаласы әкімдігі аталған дерек бойынша полиция сотқа дейінгі тергеуді бастағанын хабарлады. Сондай-ақ тоғай аумағында ағаштардың құлау қаупі туралы ескерту тақтайшалары орнатылғанын мәлімдеді.
Алматыда ағаш құлап, көліктер мен электр желілерін зақымдады
Әкімдік мәліметінше, 2026 жылы қалада 2 мың қураған, ауруға шалдыққан және апатты ағашты кесуге рұқсат берілген. Қазіргі таңда олардың шамамен мыңы жойылған. Ең алдымен балалар және спорт алаңдарының маңындағы қауіпті ағаштарды кесу жұмыстары жүргізілген.
Қала билігінің мәліметінше, Бауым тоғайы 1877 жылы отырғызылған. Осыған байланысты ағаштардың 70 пайыздан астамы қартаю кезеңіне жеткен. Мамандардың айтуынша, мұндай ағаштар сырт көзге сау болып көрінгенімен, кез келген уақытта құлап кетуі мүмкін.
Айта кетейік, бұған дейін Шымкентте үстіне ағаш құлаған 4-сынып оқушысы қаза тапты.
Айта кетейік, Алматы облысы Еңбекшіқазақ ауданында қатты дауылдың салдарынан үлкен ағаш жол жиегіне құлап, екі жеңіл автокөлікті зақымдап, төрт адам зардап шекті.
