Дастанның ерлік дастаны

Дастан Базарбаев – Курчатов қала­сындағы 3514 әскери бөлімінің бө­лім­ше командирі. Кеңестік кезеңнен әскери өндіріске бейімделген қалада маңызды стратегиялық нысандар аз емес. Әлбетте, мемлекеттік маңызы жо­ғары нысандарды қорғау Қазақстан Рес­публикасының Ұлттық ұлан сарбаздарына жүктеледі. Яғни, Ұлттық ұланда қызмет ету кез келген қазақстандық сарбаз үшін биік құрмет саналатыны бекер бол­маса керек. Міне, осы Ұлттық ұлан жауынгеріне тән батырлық көрсеткен Дастан Тәңірбергенұлы 2015 жылдың 13 мамыры күні сағат 14.00 шамасында кездейсоқ тілсіз жаудан құдайы көршісін құтқарып қалды. – Біз бір күні күндізгі кезекте, бір күні түнгі кезекте алма-кезек қызмет етеміз. Бірде түнгі кезекшіліктен ке­ліп демалып жатқан едім, зайыбым ас­тыңғы қабаттағы пәтердің балконы өртеніп жатқанын жанұшыра жеткізді. Тура біздің үйдің астыңғы қабатындағы бал­кон қызыл жалынға ораныпты. Үйден жүгіріп шықтым. Біз төртінші қабатта тұрушы едік. Үшінші қабаттағы көршіміз Хватик ныспылы зейнеткер адам болатын. Есігін қағып едім, ешкім ашпады. Есікті сындырып кірсем, қа­рия төсегінде қаперсіз ұйықтап жатыр. Үйдің іші көк ала түтін. Қарияны көтеріп тысқа алып шықтым да, шелек алып, өртті сөндіруге кірістім. Төтенше оқиғаны байқаған басқа көршілеріміз дереу өрт сөндіру қызметін шақырыпты. Абырой болғанда, олар да тез келіп жетті, – дейді Дастан Тәңірбергенұлы сол оқиға туралы әскери қызметкерге сай байыптылықпен. Өрттен аман қалған көршісі қала басшылығына ажалдан арашалаған сержантқа ризашылық білдіріп, хат жа­­зыпты. Курчатов қаласының әкі­мі Нұрбол Нұрғалиев салтанатты шара­лардың бірінде бейбіт күннің батырына сый-сыяпат тапсырып, құрмет көр­сетті. Көп ұзамай Ұлттық ұланның бас қолбасшысы, генерал-лейтенант Рус­лан Жақсылықовтың бұйрығымен «Ұлттық ұлан үздігі» медалімен марапатталды. 1988 жылы Шығыс Қазақ­стан облы­­­сын­­дағы Бесқарағай ауданы­ның Жеті­жар ауылында дүниеге келген Д.Базарбаев қарапайым отбасында өсті. Әкесі жол қызметінде еңбек етсе, анасы аспаз болды. 2007-2008 жылдары Аягөз қала­сында әскери борышын өтеген соң тәуелсіз елдің Қарулы Күштері қата­рын­да қызмет етуге бел буған жас сарбаз Курчатов қаласында еңбек жолын бас­тады. Сержант өз әңгімесінде Курчатов қа­ла­сының шағын шаһар екенін, бі­рақ маңызды стратегиялық нысандар­ды қорғаудың жауапкершілігі жо­ғары болғандықтан, әскери өмір босаң­су­ды көтермейтінін ерекше атап өтті. Қа­зақ халқының біртуар батыры Б.Мо­мышұлының еңбектерін оқығанды жақ­сы көретінін жеткізді. 2009 жылы Боро­дулиха ауданының Жезкент қала­сына ағасына қыдырып барып, бо­ла­шақ жары Әйгеріммен танысқан екен. Қазір екеуі Әмина есімді бүлдіршін тәр­биелеп отыр. – Бүгінгі таңда қазақстандық әскери қызметшілерге барлық қажетті жағдай жасалып отыр. Мемлекет маусымдық әскери киімдермен толық қамтама­сыз етеді. Басқа да қолдаулар аз емес. Сон­дықтан, біз, әскери қызметкер­лер өзімізге жүктелген жауапкершілікті тың­ғылықты орындап, Отанға адал қызмет етуге бар күш-жігерімізді арнаймыз, – деді Дастан. Думан АНАШ, «Егемен Қазақстан» Шығыс Қазақстан облысы, Курчатов қаласы