– Мемлекет басшысы Қасым-Жомарт Тоқаев Үкіметке теміржол билеттеріне жасанды тапшылықты, әсіресе жазғы кездегі жолаушылар пойызында заңсыз билет сатуды жоюды тапсырған болатын. Бұл негізінен халыққа қолайсыздық туғызып, ішкі туризмді дамытуға кедергі келтіретінін Президент атап көрсетті. Осыған байланысты Қазақстанның Премьер-Министрі Асқар Мамин Индустрия және инфрақұрылымдық даму министрлігіне және «Қазақстан темір жолы» ҰК» акционерлік қоғамына бұл мәселені шұғыл шешу жөнінде тапсырма берді, – деді кеңесті ашқан ИИДМ министрінің орынбасары Берік Қамалиев.
Мемлекет басшысы Үкіметке тапсырма бере отырып, туиттердегі парақшасында «Егеменде» жарық көрген «Қолдан жасалған билет тапшылығы» атты мақалаға сілтеме жасаған болатын.
Сонымен ИИДМ өткізген кеңес жұмысына министрліктің осы салаға қатысты құрылымдары мен комитеттерінің басшылары, Сыбайлас жемқорлыққа қарсы іс-қимыл агенттігінің жанындағы арнайы мониторингтік топ пен «Адал жол» жобалық кеңселерінің мүшелері және облыс әкімдіктерінің, барлық тасымалдаушылар мен темір жол мен автомобиль жолына қатысы бар мекемелер мен ұйымдардың басшылары қатысты.
Кеңесте алғашқылардың бірі болып сөз алған «ҚТЖ» ҰК» АҚ басқарма төрағасының бірінші орынбасары Қанат Алмағамбетов жиналғандарды билет сату жүйесіне енгізілген жаңашылдықтар мен өзгерістерден хабардар етті.
Ұлттық тасымалдаушы компания өкілі жаз мезгілінде пойыз құрамдарына қосымша вагондар тіркелетінін, сұраныс жоғары бағыттарға қосымша пойыздар шығарылып отырғанын айтты. Ал билет сату жүйесіндегі алып-сатарлармен күресте шілде айынан бастап енгізілген «Mobius» жүйесіне үміт артатындықтарын жеткізді. Оның ішінде теміржолшылар «Күту парағы» деп аталатын ілкі қадам билет сату жүйесін делдалдардан тазалайды деп сенеді.
«ҚТЖ» басшылығы жасанды билет тапшылығына көбіне жеке кассалардың қатысы барын және оларға шара қолдану өз құзыреттеріне кірмейтінін айтады. Бірақ кеңеске қатысқан арнайы мониторингтік топ мүшелері жеке кассалар бақылаусыз қалмауы керек деген пікір білдіріп, «ҚТЖ» басшылығы да осы уәжбен келіскендей болды.
Алайда кеңес жұмысына қатысқан Бас көлік прокурорының міндетін атқарушы Жасұлан Еламанов алып-сатарлардың бұл жүйені де айналып өтетін жол тапқанын мәлімдеді. Прокурорлар бұқаралық ақпарат құралдарындағы мақалаларда келтірілген деректер бойынша тексеру жүргізу барысында Шымкент және Алматы вокзалдарында кассада жоқ билетті алып-сатарлардың сатып жүргенін анықтап, ұсталғандарға шара қолданған.
– Аталған деректер мақтаулы «Mobius» жүйесін де айналып өтіп, қитұрқылықтарға жол табылатынын көрсетіп отыр. Қазір бұл мәселе зерделеніп жатыр. Алдағы уақытта барлық уәкілетті органдармен бірлесе отырып шара қолданудың амалдарын қарастырамыз, – деді Ж.Еламанов.
Жалпы, ел ішіндегі билет тапшылығы мен жолаушылардың наразылығы жөнінде қоғамдық бақылау ұйымдарының өкілдері де өткір сын айтты. Әрине жуырда енгізілген мақтаулы «Mobius» жүйесіне көлік прокуратурасының өзі күмән келтіріп отырғандықтан, «ҚТЖ» тарапынан вокзалдарға алаяқтарды жолатпау үшін перронға тек билеті бар жолаушыларды ғана өткізудің де қарекеті жасалмақшы.
Осы орайда Қ.Алмағамбетов: «Биыл осы қанатқақты жоба бойынша елордадағы «Нұрлы жол» вокзалы мен Қарағанды вокзалының перрондарына билетсіз адамдардың жақындауына шектеу қойылады. Мұндай бастаманы бұрын да көтергенбіз. Алайда қоғам тарапынан көптеген наразылық болған. Бұл бастаманы құқық қорғау органдары да қолдап отыр. Біз де дұрыс деп санаймыз. Тым болмағанда ірі вокзалдардың перрондарына осындай шектеу қойып бастау қажет», деді.
Қоғамның ықпалымен осындай ілкі қадам жасауға бет алған Ұлттық тасымалдаушы бұл жобаның өміршеңдігі мен күрделі жолын қаншалықты есепке алып отырғаны белгісіз. Өйткені «ҚТЖ» өкілі бұрын да осындай ілкі қадам жасауға оқталғандарымен, прокуратура мен Ұлттық қауіпсіздік комитеті тарапынан айтылған адамдардың құқықтары мен қозғалыстарын шектеуге жол берілмейді деген ескертуден соң, жабулы қазанды жабулы күйінде қалдыра салған.
Ал қазір тек Әкімшілік құқық бұзушылық кодексінің 449-бабы – «Қоғамдық орындарда тиісу» бойынша ғана жауапқа тартылып келген алып-сатарлардың дәурені қашанға дейін созылары да беймәлім. Бәлкім бұл мәселе билетке сұраныс азая түсетін қыс мезгілінде тағы ұмытылып кете ме? Бірақ құзырлы орындар Президент тапсырмасын орындауға бел шеше кіріскен тәрізді.
Серік ӘБДІБЕК,
«Egemen Qazaqstan»
