Кездесулер барысында Президент Қасым-Жомарт Тоқаевтың Парламент палаталарының бірлескен отырысында Үкіметтің алдына қойған экономиканы дамыту мен жаңа инвестициялық циклды жүзеге асыру жөніндегі міндеттері тұрғысында ынтымақтастықты одан әрі кеңейту перспективалары талқыланды.
ЕҚДБ президенті Одиль Рено-Бассомен кездесуде құрылыс және әлеуметтік, көлік, өнеркәсіп, инженерлік инфрақұрылымды жаңғырту, цифрландыру және жасанды интеллект саласындағы инвестициялық ынтымақтастықты арттыру, сондай-ақ қаржы саласындағы өзара іс-қимылды нығайту және бизнесті қолдау шаралары жөніндегі мәселелер қаралды.
Премьер-министр Банктің еліміздегі инвестициялық ахуалды жақсартудағы және ел экономикасының тұрақты дамуындағы маңызды рөлін атап өтті. Бірлесе жұмыс істеген жылдарда ЕҚДБ портфелі шағын және орта бизнес, қаржы, тұрғын үй-коммуналдық шаруашылық, энергетика, ауыл шаруашылығы және ақпараттық технологиялар салаларында жалпы сомасы 12,7 млрд доллар болатын 354 жобаға жетті.
Одиль Рено-Бассо биыл ЕҚДБ-ның Қазақстан экономикасына инвестиция көлемі тарихи деңгейге жететінін хабарлады: бүгінде елімізде 800 млн еуродан астам сомаға жобалар қаржыландырылды. Жалпы, жыл қорытындысында инвестициялар ағыны 1,3 млрд еуродан асуы мүмкін деп күтіліп отыр.
Кездесу қорытындысында тараптар ынтымақтастықты одан әрі кеңейтуге және жаңа бірлескен жобаларды жүзеге асыруға дайын екенін атап өтті.
ExxonMobil аға вице-президенті Питер Ларденмен келіссөздер барысында қазіргі өндірістік көрсеткіштер мен одан әрі технологиялық даму мәселелері қаралды. ExxonMobil ірі бірлескен жобаларды – Теңіз, Қашаған, Каспий құбыр консорциумын жүзеге асыруға қатысады. Тараптар ынтымақтастықтың жемісті сипатын атап өтіп, өзара іс-қимылды одан әрі нығайтуға дайындығын растады.
Marubeni Corporation басқарушы атқарушы директоры Сатору Ичинокавамен кездесуде қазақ-жапон экономикалық ынтымақтастығын одан әрі дамыту перспективалары талқыланды. Марубени еліміздің энергетика және өнеркәсіптік өндіріс саласындағы ұзақмерзімді және сенімді серіктесі болып саналатыны атап өтілді. Тараптар іскерлік байланыстарды одан әрі нығайтудың және екі елдің бизнес-қауымдастықтары арасындағы практикалық өзара іс-қимылды кеңейтудің маңыздылығын сөз етті.
Кездесулердің қорытындысында тараптар өзара тиімді ынтымақтастықты одан әрі нығайтуға, қолданыстағы жобаларды жүзеге асыруға және ел экономикасының басым секторларында жаңа инвестициялық бастамаларды пысықтауға мүдделі екенін білдірді.
