Сурет: primeminister.kz
Акцияның негізгі мақсаты – кәсіпкерлерге практикалық қолдау көрсету, салықтық және бухгалтерлік есепті жүргізудің сапасын жақсарту, салық төлеушілерге биыл күшіне енген салық заңнамасындағы өзгерістерді түсіндіру. Акция аясында облыс орталықтарындағы, сондай-ақ Астана, Алматы, Шымкент қалаларындағы Мемлекеттік кірістер департаментінің бөлімшелерінде азаматтарға тегін жеке кеңес беру ұйымдастырылды. Кеңес беруді кәсіби бухгалтерлер мен мемлекеттік кірістер органдарының қызметкерлері жүргізді. Акцияға жалпы 120-дан астам аккредитациядан өткен кәсіби бухгалтерлер қатысты. Алты айдың ішінде бұл акция сұранысқа ие, кәсіби бухгалтерлер қауымдастығы мен бизнес секторы арасындағы мемлекеттің ашық диалог алаңына айналды.
Акция нәтижесінде: 60 мыңнан астам салық төлеушілер тегін кеңес алды, 3247 ашық есік күні іс-шарасы өткізілді, жергілікті деңгейде 2928 семинар ұйымдастырылды, 512 сұхбат пен сараптамалық түсініктемелер дайындалды, БАҚ, теледидар, радио және әлеуметтік желілерде 10 мыңнан астам мақала жарияланды, ақпараттық роликтер радиостансаларда 45 мыңнан астам рет шығарылды, Zakon.kz ақпараттық қолдауымен акция материалдары, соның ішінде төрт вебинар 500 мыңнан астам қаралым жинады.
Тәжірибе көрсеткендей, кәсіпкерлер арасында тікелей өзара әрекеттесу форматына сұраныс айтарлықтай жоғары. Қатысушылар жаңа Салық кодексін қолдану, оңтайлы салық режімін таңдау, өтпелі кезеңнің ерекшеліктері, салық жеңілдіктері мен шегерімдері, ҚҚС бойынша тіркеу мен есептен шығару, арнаулы салық режімдерін қолдану, электронды шот-фактураларды рәсімдеу, ақпараттық жүйелерді пайдалану, өзін-өзі жұмыспен қамтыған жеке тұлғаларды есепке алу және олардың қызметіне қатысты мәселелер туралы сараптамалық түсініктемелер алды. Акцияның ерекше құнды аспектісі кәсіпкерлердің тәжірибелі кәсіби бухгалтерлерден және мемлекеттік кірістер органдарының қызметкерлерінен тікелей жеке кеңес алуы болды. Бұл оларға нақты жағдайлардың шешімін тез табуға әрі салық міндеттемелерін орындау кезінде ықтимал қателердің алдын алуға мүмкіндік берді. «Халық бухгалтері» салық туралы сауаттылықты арттыруға, салықтық міндеттемелерді ерікті орындау мәдениетіне тәрбиелеуге, қолайлы бизнес-ортаны құруға бағытталған мемлекет пен кәсіби қоғамдастық арасындағы ынтымақтастықтың тиімді үлгісіне айналды. Тегін кәсіби көмек мыңдаған кәсіпкерге заңнамалық өзгерістерге сенімдірек бейімделуге және ең өзекті сұрақтарына дер кезінде жауап алуға мүмкіндік берді.
Осы тәжірибе әрі қарай да өз жалғасын тауып, жергілікті мемлекеттік кірістер базасында ай сайын, бухгалтерлік ұйымдармен бірлесе отырып, салық заңнамасын түсіндіруге бағытталған «Ашық есік күндері» өткізіледі.
