Театр • 28 Қараша, 2022
Ертегі десе елең етер көрерменді желтоқсанның 4, 9, 10 және 11-і күндері «Астана Балет» театрында «Қар патшайымы» балетінің премьерасы күтеді. Даниялық жазушы Ганс Христиан Андерсен ертегісінің желісімен қойылатын спектакльдің режиссері – Ресейдің еңбек сіңірген өнер қайраткері, Татарстан Республикасының халық әртісі Георгий Ковтун. Спектакль маэстро Арман Оразғалиевтің жетекшілігіндегі симфониялық оркестрдің сүйемелдеуімен өтеді.
Сұхбат • 27 Қараша, 2022
Нұрқанат Жақыпбай, Мемлекеттік сыйлықтың лауреаты: Өмірімнің кредосы – шеңберден шығу
Астананың тағы бір ақ таңы атты. Таңғажайып театр таңы. Сахнада мүлгіген тыныштық. Жастар театрының ат шаптырым залында ноқаттай ғана қарайған бейне көзге шалынды. Оңашаға оқшауланып алған жалқы сұлба алысқа, тым-тым алысқа көз тігеді. Өзі осында болғанымен, ойы қиянда. Маңайында тіршілік барын әлдеқашан ұмытқан. Тіпті жанына жақындап барсаң да, селт етер емес. Иығына түскен ұзын шашын салалап қойып, терең ойдың құшағында отыр. Тіпті біздің қасына қалай келгенімізді де сезбеді білем, тосыннан шыққан үніміз ойын үркіткендей, сәл тосырқап қалды да, лезде өзін жинап ала қойды. Күлімсірей амандасып, бірден: «Жаңа қойылымның премьерасына дайындалып жатырмыз. У.Шекспирдің «Ромео-Жульеттасы». Бұл қойылым менің Шекспир драматургиясына жасаған тәжірибе-триптихымның түйіні десем де болады. Осыған дейін «Асауға тұсауы» мен «Гамлетін» сараптасам, ендігі кезек «Ромео мен Жульеттаға» келді. Көптен бері көңіл түкпірінде толғантып жүр еді, міне, енді көрерменімен қауышатын да сәт жақындап қалды. Бұйырса, ертең премьера. Спектакльдің сахнаға шығар күні жақындаған сайын менде де маза жоқ. Осылай елден бұрын келіп әуелі дайындық алдында өзім оңаша қалып ойланамын, бұған дейін жасалған жұмыстарға қайтадан көз жүгіртіп, ойша артық-кем тұсын екшеп аламын да, содан кейін актерлерімді шақырамын. Сөйтіп, өзімнің ойым мен олардың түнімен ізденіп дайындалған ізденісін бір арнаға тоғыстырып, содан ортақ шешімге келеміз» деп әңгімесін бастаған режиссер тағы да сахнадан көз алмай, үнсіз қалды. Премьераалды толғаныс һәм толқыныс екенін түсіндік. Санада сайрап тұрған сансыз сауалымызбен килігіп, ойын бөлгіміз келмеді.
Театр • 14 Қараша, 2022
«Жібек жолы» – өнер жәрмеңкесі
Елордада бекзат өнер жанкүйерлері асыға күткен «Жібек жолы» халықаралық музыкалық өнер фестивалі шымылдық түрді. Театр думаны Мұқан Төлебаевтың аңызға айналған «Біржан – Сара» операсымен ашылды.
Өнер • 08 Қараша, 2022
«Астана Балет» Грузияға аттанады
«Астана Балет» театрының Грузия еліне жоспарлаған гастрольдік сапары 14-15 қарашада Тбилисидегі З.Палиашвили атындағы Опера және балет театрының сахнасында өтеді. Гастроль аясында елордалық ұжым «Саломея», «A Fuego Lento» бір актілі балеттері мен «Ұлы Дала мұрасы» концерттік бағдарламасын грузиялық көрермен назарына ұсынады.
Кино • 03 Қараша, 2022
Өткен аптада әйгілі Елисей алабында Мәдениет және спорт министрлігінің тапсырысы бойынша Ұлттық киноны қолдау мемлекеттік орталығының көмегімен шығарылған фильмдердің көрсетілімі өтті. Іс-шара IV Франциядағы Қазақстан киносы фестивалінің аясында ұйымдастырылды.
Сұхбат • 02 Қараша, 2022
Роза Аманова: Қазақ елін ерекше қадірлеймін
«Мен сені сағынғым келеді». Осы бір сыршыл да әуезді әні арқылы тыңдарманның жүрегіне жол тауып, талай жанның рухани жақынына айналған Роза Аманова тек қырғыз елінің ғана емес, қазақ халқының да шексіз махаббатына бөленіп келе жатқан бақытты әнші. Қазақтың «Сегіз қырлы, бір сырлы» деген теңеуі де дәл осы жанға қаратып айтылғандай. Қырғыз Республикасының халық әртісі, Тоқтағұл атындағы Қырғыз мемлекеттік сыйлығының лауреаты, Қазақстанның еңбек сіңірген әртісі, этномузыкатанушы, өнертану докторы, профессор, Қырғызстан бойынша әйелдер арасындағы жалғыз дастаншы, қомызшы, сазгер, әнші, мемлекеттік және халықаралық деңгейдегі байқаулардың жеңімпазы – бір басына мың-сан өнерді тоғыстырған талантты тұлғаның жүрек қылын шертер тағылымды әңгімелері де әсерлі. Астанада өткен Қырғызстанның Қазақстандағы мәдениет күндері аясында талайды тамсандырған өнер иесімен сұхбаттасудың сәті түсті. Әңгімеміздің әлқиссасын да әнші төскейде малы, төсекте басы қосылған бауырлас қос мемлекеттің мызғымас достығы мен тереңнен тамыр тартар тіні бұзылмас туыстығынан бастады.
Қазақстан • 02 Қараша, 2022
Umai: мүсін жеңімпазы анықталды
Қазақстан Республикасы Мәдениет және спорт министрлігі тағайындаған еліміздегі алғашқы Umai ұлттық сыйлығы – бұл театрлық «Оскардың» аналогі. Үш ай бойы Қазақстанның атақты суретшілері Umai сыйлығы мүсіншесі сызбасының авторы болу құқығы үшін таласты. Сыйлықты өткізу алаңына айналған «Астана Опера» театрының көркемдік кеңесі үздіктердің үздігін анықтады.
Өнер • 01 Қараша, 2022
«Күләшпен кездесу – әнмен кездесу еді» депті қазақтың бұлбұл әншісі Күләш Байсейітова жайлы толғанғанда композитор Латиф Хамиди. Олай деуіне себеп те, дәлел де мол. Өйткені әншінің бойындағы саф алтындай жарқыраған тума талант қай кезде де оның даралығын танытып тұратын. Күләштің әнін бір тыңдаған жан балға арбалған арадай үн құдіретіне мас болып, әншіні қайта-қайта тыңдауға бейілді еді. Ал талайды тамсандырған сол дауыс оқу-тоқусыз, табиғаттың өзімен әнші бойына дарыған айрықша дарын екенін білген музыка мамандары сол кездің өзінде-ақ әншінің көмейіне ұя салған көркем үнді құбылысқа балайтын. Әйтпесе театрға алғаш жұмысқа қабылданған жылы операның не екенін білмеген жанның арада жылға жуық уақыт өтпей сахнаның нағыз бұлбұлына айналғаны құбылыс емей немене?!
Өнер • 30 Қазан, 2022
«Астана Опера» театрында «қазақтың бұлбұлы» атанған опера сахнасының аңызы, Қазақстанның еңбек сіңірген әртісі, КСРО Халық әртісі, Мемлекеттік сыйлықтардың лауреаты Күләш Байсейітованың 110 жылдығына орай «Қазақстан вокалистер одағы» республикалық қоғамдық бірлестігінің ұйымдастыруымен «Күләштің әні» вокалдық музыка кеші өтті. Тұлға есімін ұлықтауға арналған тағылымды концертте, сондай-ақ ұлы әншінің шығармашылығын насихаттап жүрген орындаушыларды салтанатты марапаттау рәсімі болды.
Театр • 26 Қазан, 2022
Елордада өтіп жатқан Қазақстан драма театрларының Шолпан Жандарбекова атындағы республикалық XXVIII фестивалі аясында тұлға жайлы қос бірдей тағылымды еңбек жарыққа шықты. Оның алғашқысы Қазақстанның халық әртісі Қадыр Жетпісбаев туралы естеліктер жинағы мен «Бала мерген» драмалық шығармалар екі томдығы болса, екіншісі – «Алаштың Ақтоқтысы» атанған аңыз актриса, театр мен кино жұлдызы, КСРО халық әртісі, Қазақстан Мемлекеттік сыйлығының лауреаты Шолпан Жандарбекова жайлы «Шолпан жұлдыз» кітабының оқырманмен қауышуы. Қазақ театр тарихына теңдессіз тарту болып қосылған атаулы еңбектің қай-қайсысы да ұлттық өнеріміз үшін өлшеусіз олжа екені даусыз.
