Еліміздегі гендерлік саясат

жөніндегі ұлттық комиссияның кезекті отырысы өтті Кеше Мемлекеттік хатшы Гүл­шара Әбдіқалықованың жетек­шілігімен Қазақстан Прези­денті жанындағы Әйел­дер істері және отбасылық-демо­графия­лық сая­сат жөніндегі ұлттық комис­сия­ның кезекті отырысы болып өтті. Онда Мем­лекеттік хатшы Президент Нұрсұлтан Назарбаев ұсынған «100 нақты қадам» – Ұлт Жос­парын іске асыру шең­берінде басты жалпыұлттық құн­ды­лық­­тар­ды айқындап берген «Мәңгілік Ел» патриоттық актісі қабылданғанын айтты. – Бүгінгі таңда гендерлік бюджеттеу әлеуметтік даму­дың 2030 жылға дейінгі тұжырым­дамасын, білім беру және ғы­лым­ды дамытудың 2016-2019 жылдарға арналған, денсаулық саласындағы 2016-2019 жылдар­ға арналған «Денсаулық», «Жұ­мыс­пен қамтудың жол картасы-2020» және «Бизнестің жол картасы-2020» бағдарламаларын іске асыру шеңберінде әйелдердің іскерлік белсенділігін арттыру, халықты жұмыспен қамту, ана мен баланы әлеуметтік қорғауды көздейтін шаралар арқылы ілгері дамуда, – деді Г. Әбдіқалықова. Мұнан соң Мемлекеттік хат­­шы елімізде жүзеге асып отыр­­ған гендерлік теңдік сая­саты­на тоқталды. Оның айтуын­ша, республика көлемінде 28 тұрмыстық зорлық-зомбылық құрбандарына арналған дағдарыс орталықтары жұмыс жасайды. Өткен 2015 жылы отбасылық зорлық-зомбылыққа ұшыраған 16 мың 800 әйелге 211 маман түрлі бағытта кеңес берген. Жиында Атырау облысы әкімінің жанынан құрылған әйелдер істері және отбасылық-демографиялық саясат жөніндегі комиссияның төрайымы Айгүл Әжіғалиева сөз алып, аталған аймақтағы гендерлік теңдік са­я­саты, комиссияның 4 айда атқар­ған жұмысы жайлы баяндады. – Атырауда 2012 жылдан бері тұрмыстық зорлық-зомбылық құрбандарын бауырына басып, қамқор болатын дағдарыс орта­лығы жұмыс жасайды. Бүгінгі күнге дейін орталықтың қызмет­керлері 107 әйел мен 205 балаға көмек көрсетті. Бұлардың дені – отбасында күйеуінен зорлық көріп, барар жер, басар тауы жоқтар. Сондықтан да мамандар мұндай жандарға барынша психологиялық қолдау көрсетіп, кеңес береді, – деді ол. Комиссия отырысында от­басы­лық ахуал мен бүгінгі қоғам­дағы ер-азаматтардың ден­саулығы төңірегіндегі ауру­лар айтылды. Денсаулық сақтау және әлеуметтік даму ми­нистр­лігінің ақпараты бойын­ша, еліміз әлемде ұрпақты болу жүйесі аурулары, тыныс алу, қан айналымы, ас қорыту ауру­­ларының кең таралуынан төртін­ші орында. Осыған орай Гүлшара Әбдіқалықова тиісті орындардың басшыларына Қазақстандағы отбасылық-демография­лық сая­саттың жүзе­ге асырылу жолында нақты тап­сырмалар жүктеді. Талғат РАЙЫМБЕК, «Егемен Қазақстан»