Отандық ғалымдар үлесі

Алматыда Ұлттық ғылым академиясының кезекті сессиясы болып өтті Отандық ғалымдардың басын қосқан келелі отырыстың есептік сессиясы Қа­зақ­стан Рес­публикасы Ұлттық ғылым академиясының құрылған кү­ніне орай, биылғы жылдың қа­зан айында атап өтілуі жоспарланып отырған 70 жылдық мерейтой мәселесін талқыға салу және ел ғылымына қатысты бір­қатар мәселелерді көпшілік назарына ұсынуға арналды. Отырыс барысында Ұлттық ғылым академиясының пре­зиденті Мұрат Жұрыновтың төралқаның есептік кезеңі мен қызметі және Қазақстан Рес­публикасындағы ғылымның одан әрі дамуы туралы ақпараттық есебі тыңдалды. Онда төралқаның есептік кезе­ңіндегі қызметі, алға қойған мақ­саттардың орындалуы мен отандық ғылымның даму келе­шектері мазмұндалған. Ака­демия президенті «Ғылым туралы» Қазақстан Республикасының Заңы бойынша Ұлт­тық ғылым академиясы елдегі ғылым дамуының басым бағыттарын анықтауға қатысатындығы және Мемлекет басшысына ұсыну үшін ғылым бойынша Ұлттық баяндама дайындауды жүзеге асыру құқығының мәр­тебесін еске салып, бұл үрдістің соңғы 10 жыл бойына тұрақты атқарылып келе жатқандығын түсіндірді және оны барлық ғалымдар бір ауыздан қолдады. Ұлттық ғылым академиясы елімізде және шетелдерге ер­кін тарайтын академиялық басылымдарды шығарып, симпозиумдар, конференциялар, көрмелер және ғылым мен техника саласында тағайындалған сыйақыларға конкурс өткізу арқылы ғылым жетістіктерін насихаттап, халықаралық ғы­лыми ынтымақтастық пен ин­новациялық қызметті дамытуға ықпал етуде, сондай-ақ, іргелі зерттеулер бойынша ғылыми сараптамаларды жүзеге асыруда. Ғылым академиясы жа­нынан 8 ғылыми журнал шығарылып, олар тұрақты түрде ТМД елдеріне, АҚШ, Ұлыбритания, Германия, Франция, Жапония және басқа да елдердің жетекші ғылыми кітапханаларына жіберіліп отыр. Қазақстан Республикасы Ұлттық ғылым академиясы – құрамында 140 толық мүше, 103 корреспондент-мүшелері, 78 құрметті және 13 шетелдік мүшелері бар еліміздегі жалғыз клас­сикалық әмбебап академия. «Бір елден – бір академия» қағидатымен құрылған барлық халықаралық классикалық ұлттық академиялар ассоциация­ларында Қазақстанды тек осы академия танытады. Сондықтан, Ұлттық ғылым академиясының қызметі әрдайым Елбасының тікелей назарында. Мемлекет тарапынан үлкен қолдауға ие болып, отандық ғылымды ілгері бас­тыру жолында атқа­рылып жатқан толассыз ең­бек нәтижесінде академик ға­лымдардың қатары әр кезде та­лантты жас ғалымдармен то­лығып отырады. Академияның үлкен залын­дағы дәстүрлі басқосуда Қа­зақ­стан Рес­пуб­ликасы Ұлттық ғылым академиясына 70 жыл толуына орай академияның арнаулы «Алтын» медалімен академик Сұлтан Сартаев, ал бірқатар ғалымдар Құрмет грам­отасымен марапатталды. Қанат ЕСКЕНДІР, «Егемен Қазақстан» АЛМАТЫ