Ізгі ниетті экспедиция

Астанадағы Ұлттық музейде «Жайық-Орал» халық­аралық тарихи-мәдени экологиялық экспедициясының мерейтойлық шарасы өтті. Мемлекеттік рәміздер күніне орай ұйымдастырылған бұл шараға Қазақстан хал­қы Ассамблеясы қолдау біл­дірді. Оған ҚХА мүше­лері, «Жайық-Орал» экспеди­ци­я­сының ардагерлері мен қаты­сушылары, ғылыми және шығармашыл зиялы қауымның өкілдері, этномәдени бірлес­тіктердің өкілдері қатысты. Басқосуда жиырма жылдық тарихы бар экспедицияның қызметі, жүріп өткен жолы тұрғысында кең көлемде айтылды. Ресейлік әріптестермен тығыз байланыста жұмыс іс­теп келе жатқан экспедиция 2001 жылдан бастап ха­лықаралық мәртебеге ие болыпты. Көп жылдар бойы экс­пе­диция құрамында Парла­мент Мәжілісінің депутаттары, саяси партиялардың, ат­қарушы биліктің өкілдері, мамандар, эколог ғалымдар, өлкетанушылар, археологтар, тарихшылар, журналистер, студенттер мен оқушылар жұмыс істейді екен. Шараның ашылуында сөз алған Қазақстан халқы Ас­самблеясы Төраға­сы­ның орынбасары, ҚХА Хатшылығының меңгерушісі Ералы Тоғжанов Қазақстандағы ынтымақ пен ел бірлігінің маңыздылығына тоқталып, әрі қарай да осы бағытта жұмыстарды жал­ғас­тыра беру керектігін айтты. – Биылғы жыл – мем­ле­ке­тіміз үшін ерекше жыл. Себебі, ел Тәуелсіздігіне 25 жыл толып отыр. Біз үшін Тәуелсіздіктен қымбат құндылық жоқ. Демек, оның қадіріне де жете білуіміз керек. Бүгінгі іс-шарамыздың басты мақсаты – қазіргі бірлігімізді одан әрі нығайту. Бірлік, достық, келісім болған жерде өркендеу де, даму да болады, – деді Е.Тоғжанов. Шара кезінде экспе­ди­цияның еліміз үшін маңызды Жайық өзені байссейнінің эко­жүйесін, бай тарихи-мәдени құндылықтарды сақтап қалу проблемаларын, спорт­ты, денешынықтыруды, сала­матты өмір салтын, пат­риоттық тәр­бие беруді, ұрпақтар сабақ­тас­тығын, транс­шека­ралық ын­ты­мақтастықты дамытуды наси­хаттауды өз миссиясы ретін­де қарастыратыны атап өтілді. Осы жылдар ішінде экс­пе­дицияға қатысушылар тек Жайық өзені ғана емес, сон­дай-ақ, Орал бассейніндегі Сақмар, Елек өзендері бойын­ша бірнеше мыңдаған шақы­рым жүзіп өтіпті. Соның нәти­жесінде ауқымды зерттеу жұмыстарын жүргізген көрі­неді. Сондай-ақ, экспедиция тарапынан кітаптар шыға­рылып, телевизиялық фильм­дер түсірілген және тағы бас­қа да жұмыстар жүзеге асы­рылған. Айта кетейік, жиын барысында экспе­дицияның 20 жылдық тарихын қамтитын «Жа­йық – достық өзені» атты фотосурет көрмесі ұсынылды. Жолдыбай БАЗАР, «Егемен Қазақстан»