Мұнайлы өлкенің өршіл өрені

Мәжілістің алтыншы шақырылымында сайланған жаңа депутаттардың бірі – Тарас Хитуов. Есіміне қарап-ақ оның ук­раин кобзары атанған Тарас Шевченко айдау­да болған Маңғыстау өңірінде дүниеге кел­генін сезуге болады. Қазақ жақсы адам­ның есімін ұлтына, дініне қарамай-ақ ежел­ден қабылдай берген ғой... Біз оқырман­дары­мызды жаңа депутатпен таныстыра отыру мақсатында оны әңгімеге тартқан едік. – Мен қазыналы түбектегі шежірелі Форт-Шевченко қаласында мұнайшының от­басында 1964 жылы өмірге кел­дім, – деп бастады әңгімесін депутат. – Мұнайшы болған соң әкемнің қызмет орны жиі ауысып тұрды. Мен мектеп жасына жеткенде ол кісінің қыз­меті бұрын Ералиев, қазір Құрық аталатын кентке ауысқан еді. Сондықтан, сол жерде мек­теп есігін аштым. Алайда, бас­тауыш сыныптарды Жаңаөзен қаласында бітірдім. Ал жалпы орта білім беретін мектепті Ақтау қаласында аяқтап, 1981 жылы Қазақ политехникалық инс­титуты филиалының осындағы мұнайшылар дайындайтын факуль­тетіне оқуға түстім. Мұн­­дағы тәртіп бойынша екі жыл оқы­ған соң студенттерді Алматы­­дағы институттың негізгі бөлі­міне ауыстыратын. Сөйтіп, үшін­ші курстан бастап оқуымды Алматыда жалғастырдым. – Сіздің бокстан Қазақстан құрамасының сапында жақсы өнер көрсеткеніңізді білеміз. Онымен қай жылдары, қайда айналыса бастаған едіңіз? – Бокс қолғабын алғаш рет Ақтау қаласындағы спорт мек­тебінде кидім. Жас­тар ара­сын­дағы КСРО чемпионы, КСРО Кубогының жеңім­пазы, Қазақ­станның еңбек сіңірген спорт шебері Асылбек Қилымовпен бала кезден доспын. Екеуміз алтын­шы сыныптан бастап бокспен айна­лысуды бір залда бастадық. Дос­ты­ғымыз әлі күнге жалғасып келеді. – Асылбек Қилымовтың есі­мін қазақстандықтар жақсы біледі. Оның 75 кг салмақта Еуро­паның ең үздік боксшысы атан­ғаны да ұмытыла қойған жоқ. Гүрзі жұдырықты нокаут­тер болып, ол талай қазақ баласының намысын жаныған еді. Ал өзіңіздің спорт­тағы жетістіктеріңіз қандай? – Мен де «спорт шебері» нор­ма­­тивін орындадым. Сту­дент­­тер­дің бүкілодақтық «Буревест­ник» спорт қоғамының екі дүр­кін чемпионы болдым. Қазақ­стан­нан қазіргі Қарағанды ун­ивер­ситетінің доценті болып жүр­ген досым, спорт шебері Боран­құл Нұрпейісовпен бірге «Буре­вес­т­никтің» бар­лық жарыс­­тарынан, универсиа­да­лары­­нан қалмайтын едік. Ол «Буревестниктің» үш дүркін чем­пио­ны атанды. Қазір сол достары­мыз­бен жақын аралас­пасақ та, телефон арқылы хабарласып тұрамыз. – Қызмет жолыңыз жайында айта отырсаңыз. – Институтты бітірген соң еңбек жолымды 1986 жылы Ақ­тау қаласындағы пластмасса зауы­тының аппаратура жөндеу цехында бастадым. Бұл бүкіл Еуразия бойынша санаулылардың қатарына жататын бірегей зауыт­тардың бірі еді. 1988 жылдан осы зауыттың ауысым ше­бері, техникалық қадағалау бөлі­мінің жетекші инженері секілді қызметтер атқардым. 1990-жылдардың басынан енген экономикалық дағдарыстың салдарынан зауыттың жағдайы қиынға айналып, өндірісі төмендеп кетті. Жұмыс орындары да қысқарып, еңбекақы төлеу тұ­рақ­сыздық халіне жетті. Көп­те­ген мамандар басқа жұмыстарға ауы­сып жатты. Соның бірі болып мен де қаладағы «Ақ жол» ЖШС-іне технолог болып ауыстым. Одан жекеменшік салаға кетіп, 1991-1993 жылдары «Маңғыстау» бизнес-орталығында менеджер болып істедім. 2000 жылы мен өз мамандығым бойынша Пав­­ло­дардағы мұнай-химия зауытына қызметке шақырылдым. Алайда, мұнда көп істемей, қайтадан Ақ­тау­ға ауысып, қала әкімінің орын­басары қызметіне тағайындалдым. Еліміз тәуелсіздігін алған соң бұрынғы Шевченко ауданы Түпқараған болып қайта құрыл­ған еді. Аудан орталығы – өзім өмірге келген Форт-Шев­ченко қаласы. 2003 жылы осы аудан­­ның әкімі қызметіне шақы­ры­лып, сонда ауыстым. Одан об­лыс­тық Денешынықтыру және спорт басқармасының бастығы қыз­метінде бірнеше жыл істе­дім. 2008 жылы Маңғыстау облы­сы әкімі­нің әлеуметтік сала жөнін­дегі орын­басары қызметіне тағайындалдым. Ал депутаттыққа сайланған­ға дейінгі қызметтерім мұнай сала­сымен тығыз байла­ныс­ты болды. Алдымен «ҚазМұнайГаз» Барлау-Өндіру» АҚ, одан «Өзенмұнайгаз» АҚ, «Қаражамбасмұнай» АҚ әлеуметтік мәселелер, кадр жөнін­дегі вице-президенті қызмет­терін атқардым. «Нұр Отан» пар­тиясынан депутаттыққа канди­дат­тардың тізіміне енгізіл­генде «Қаражамбасмұнай» АҚ ап­паратының басшысы қыз­ме­тін атқарып жүрген едім. Сөй­тіп, Маңғыстау өңірінен «Қазатомөнеркәсіп» ҰАҚ ұзақ жыл­дар басқарушылық қызметтер атқар­ған Сәкен Өтебаев екеуміз депу­таттыққа сайландық. Қазір Эко­но­микалық реформа және өңір­лік даму комитетінің мүш­е­сі­мін. Заң шығару жұмыс­тары­на ептеп үйреніп келе жатырмыз. – Отбасылық жағдайыңыз қалай? Бос уақытыңызды қалай өткізесіз? – Отбасымда үш балам бар. Үлкен ұлымнан әзірге бір немере көрдім. Олар Ақтауда тұрады. Шынымды айтсам, немеремді қатты сағынып жүрмін. Бұрын бос уақытымда кітап оқитын едім, қазір бос уақыт деген көп бола да бермейді. Депутаттарды түрлі қоғамдық жұмыстарға да тартады екен. Мен де сондай қоғам­дардың бір-екеуіне мүше болып ендім. Олардың жұмыс­тары да жеткілікті. Өзі­міздің өңірдегі проблемаларды да жақсы білемін, олармен хабарласып, төтенше мәселелердің шешілуіне атсалысамын.  Әңгімелескен Жақсыбай САМРАТ, «Егемен Қазақстан»