Баспана, ауыз су, жол, жарық...

Ауылдағы басты мәселелер депутатпен кездесуде сөз болды Шығыс Қазақстан облысындағы Жарма аудандық ардагерлер кеңесінің төрағасы Нұрлыбек Есболовтың айтуынша, өңірдегі жол, су, тұрғын үй мәселелері өткір күйде қалып отыр. Себебі, бүгінгі таңда тұрғын үй мәселесі кезек күттір­мейтін шаруаға айналған. Жар­ма өңірінде жалғызілікті қарт­тар мен дипломын қолына алып, ауылға келген жастарға баспана керек. Ауылда осыған орай екі 16 пәтерлі үйдің жобалау-сметалық құжаттары дайын екен. – Енді осы жоба биылға жос­парланғандықтан қаржы бөлсе­ңіздер деп отырмыз, – деді Нұр­лыбек Есполов ауылдың жағдайын сұрап арнайы іссапармен келген Парламент Мәжілісінің депутаты Нұртай Сабильяновқа өтініш жасап. Өйткені, елді мекендерде инфрақұрылымдарды жөндеу халықтың көптен бері келе жатқан проблемасы. Ал Аягөз – облыстағы ғана емес, еліміздегі әлеуеті зор шағын қала­ның бірі. Қала халқы негізі­нен темір жолда және аумақта орналас­қан бес әскери қалашықта жұмыс істей­ді. Жұмыссыздық проблемасы жоқ, бірақ ауыз судың азабын аягөз­діктер бір кісідей тартып келеді. Тұрғындардың 60 пайызы ауыз суға зәру, су және жылу құбырлары ескіріп, тозып кеткен. Тұрғын үй де қат мәселе, қалада сонау 1930 жылы тұрғызылған 117 үй бар. Оны сүріп тастап, орнына екі бес қабатты үйді тұрғызу қолға енді ғана алынған іс. – Шығыс Қазақстан облысында «Ақбұлақ» бағдарламасы бойынша ауыз су мәселесін шешуде 30-дан артық жоба қаржыландырылды, бұйырса ауыз су келіп қалар. Сондай-ақ, жұрт жиырма шақты жылдан бері күткен «Шар – Қалбатау» ара­сындағы жол салынады. Ол үшін республикалық бюджеттен 2 млрд 650 млн теңге көлемінде қаражат бөлінді. Жұмыстар ақпан айынан басталады, – деді депутат Нұртай Сабильянов өңірдегі кездесуінде. Жол мәселесінің оң шешімін табатынына Аягөз, Жарма аудан­дарындағы бірқатар ауылдар мен Шар қаласының тұрғындары риза­шылық білдірді. Бірақ, халық бұл іс сәтімен аяқталса және жолға кеткен қаржы тиісті орнына жұмсалса деген­ді айтты. Себебі, жолды сал­ған­мен, екі ай өтпей жатып, ол шұрқ тесіліп, жүруге жарамай қала­ды. Бұған мысал ретінде Семей қала­сын­дағы жыл сайын қаржы бөлі­ніп, жөнделетін, бірақ сапасыз болған­дықтан, халықтың көңілі толмайтын жолдарды айта кетуге болады. Сондай-ақ, алдағы уақытта Семей қаласының инфра­құры­лымын дамытуға көңіл бөлінеді. Бұл да болса қала шетінде ауыз сусыз, жарықсыз отырған халық­қа игі көмектің бірі. Нақты айт­қан­да, электр жарығын тартуға, көше­лерді жөндеуге тиісті қаражат бөлініпті. Бірақ сол өз мақсатында жүзеге асса, соған орай халық риза болып жатса, құба-құп. Әйтпесе, қаражат бөлініп, содан оның қайда кеткендігін майшам алып іздеу, сотқа жүгіну күнделікті көрініске айналып барады. Сондықтан да, бөлінген қаражатты тиімді, мақ­сатына сай жұмсайтын болса, әр елді мекенде орын алып отырған өт­кір мәселелерді шешуге болады. Раушан НҰҒМАНБЕКОВА Шығыс Қазақстан облысы