Сұхбат • 29 Қыркүйек, 2020

Шектеулі мүмкіндіктің шексіз әлемі

11 рет көрсетілді

Волонтерлік тек мұқтаж жан­дарға көмек көрсету емес, бұл – өмір салты, үлкен мәдениет. Әдетте әр еріктінің осы жолға келуінің өз тарихы, хикаясы бар. Бүгінде «Өмір лимон берсе, лимонад жасап ал» деген пәлсапа жиі айтылады. Тағдырдың жа­зыл­ғанына көніп, қарап қалмай, өзі өмір сүріп жатқан қоғамды жақсартуға тырысып жүрген адамдарды көргенде болашаққа үмітпен қарайсың. Бүгінгі кейіп­керіміз Гүлден Өтебалиева жолдасымен бірге спорт мектебін ашып, Атырау облысы Махамбет ауданындағы мүмкіндігі шектеу­лі адамдардың спортпен айналысуына жағдай жасап жүр. Гүлден спорттың мүмкіндігі шектеулі жандар үшін маңызы мен спортқа құштарлықтың адам өміріне әсері туралы әңгімелеп берді.

– Гүлден, былай қарасаңыз, бір спорт клубы түгел бір аудан­ға қызмет етіп отыр. Ес­туі­мізше, сабақтарыңыз да тегін. Бұл жоба қалай басталды? 

– Негізі әуелден спорт мекте­бін ашсақ деген арманымыз бар еді. Күйеуім Мұхадия Қуангереев – ІІ топтағы мүгедек. 2006 жылы инсульт алып, сол қол, сол аяғына зақым келді. Содан кейін өзі сияқты тағдырлас жандарды іздеп, араласа бастады. Атырау облысында мүмкіндігі шектеулі жандарға арналған спорттық секциялар іздеп, «Мүгедектер» спорт клубын тапты. Аяқ-қолы жоқ азаматтардың спортпен айналысып жүргенін көріп, өзі де спортпен айналысуды мақсат етті. 2007 жылы аталған спорт клубына жұмысқа орналасып, Махамбет ауданы бойынша тоғызқұмалақтан әдіскер болып қызмет ете бастады.  Мен 2006 жылдан бері осы ауданда жұмыс істеймін, талай шәкірт тәрбиелеген ұстазбын. 2008 жылы отбасын құрдық. Арманымыз шындыққа айналып, 2018 жылы «Ержүректер» қоғамдық қорын құрып, спорт мектебінің  жұмысын бастадық. Екі жылдың ішінде біраз жетістікке жеттік.

– Спорт мектебінде қандай секциялар бар?

– Қазіргі таңда тоғыз­құмалақ, дойбы, шахмат, жеңіл атлетика, үстел теннисі секциялары жұмыс істейді. Барлық сабақ тегін. Қаты­сушыларымыз мүгедектігін растайтын анықтама алып келуі керек. Оларды даяр­лап, аудандық, облыстық, республикалық жа­рыс­тар­ға қатыстырамыз. Спорт шеберлігін қорғаған шәкірт­теріміз де біраз. Көптен озып шыққан жүйріктердің жарыс­тарға кететін шығынын көтеруге облыс  әкімдігі атсалысады. 

Өзіміз тұрып жатқан аудан­мен шектеліп қалмай, қасы­мыздағы елді мекендегі азамат­тарға да мүмкіндік берейік деген оймен басқа ауылдардағы балаларға да мектеп ашқымыз келіп Британ кеңесі мен Chevron энергетикалық компаниясы ұйымдастырған конкурсқа қатысып, әлеуметтік startup жобасын жүзеге асыруға 3 мың АҚШ доллары көлемінде грант жеңіп алдық. Бүгінде алыс-жақын ауылдардағы мүмкіндігі шектеулі жандардың спорт мектебіне келіп-кетуіне жағдай жасап отырмыз.

– Спорт мектебіне кез келген адам келіп, жаттыға ала ма?

– Иә, спортпен айналысамын деген ынтасы бар кез келген ауыл тұрғынына есігіміз ашық. Біз тек спортқа баулып қана қоймай, олардың әлеуметтенуіне де мүмкіндік жасаймыз. Жұмысқа орналастыруға, оқуға түсіруге тырысамыз. Мүмкіндігі шектеулі жандар көбіне қоғамнан қол үзіп қалады, көпшілік жиналған жерге барудан тартынады. Мәселен, Махамбет ауданының Жалғансай ауылында бір замандасымыз 14 жыл бойы үйінен шықпай, қоғамдық өмірден қол үзіп қалған екен. Біздің спорт мектебімізге келіп, адамдармен араласа бас­тады. Тоғызқұмалақтан түрлі чемпионатқа қатысып, спорт шеберлігіне үміткер атағын ал­ды. Оқуға түсті, бүгінде аудармашы болып жұмыс істейді. Қазан айында Ақтау қаласында өтетін тірек-қимыл аппараты за­қым­данған жандар арасындағы чемпионатқа жолдама алып отыр.

– Яғни мектебіңіз арқылы мүмкіндігі шектеулі жандарға жаңа мүмкіндіктер ашуды мақсат еттіңіз?

– Мүмкіндігі шектеулі жан­дарға қоғаммен байланыс ма­ңызды. Спорт – денсаулық кепілі, бірақ спорт адамдарды да өзара  байланыстырады. Мысалы, біз осы спорттың арқа­­сында отбасылы болдық. Аудан­ның қоғамдық өміріне де араласқымыз келеді. Былтыр аудандық жұмыспен қамту бө­лімінен мемлекеттік тапсырыс алып, 160 мүмкіндігі шектеулі балаға мерекелік ер­теңгілік өткіздік.

– Спорт үлкен өмірге жолдама береді дейсіз ғой?

– Мектебімізде тәрбиеленген, өзін жақсы қырынан көрсете алған шәкірттеріміз жаттықтырушылар қатарын толықтырады. Яғни олар түрлі жарыстарға қатысып, ысылып, белгілі деңгейлерден өткеннен кейін жұмысқа орналасады. Мысалы, мектебімізге 7 жыл бұрын келген шәкіртіміз Айна Байсанбаева осы уақытқа дейін түрлі республикалық жа­рыс­тың жеңімпазы атанып, тоғызқұмалақтан спорт шебер­лігіне үміткер атанды. Жақында оны Есбол ауылына бапкер ретінде жұмысқа орналастырдық. Мұндай мысалдар аз емес.

Жалпы, мүмкіндігі шектеу­лі жандардың спортпен айналы­суына көңіл бөлінсе деген тілек бар. Үлкен компаниялар да қол­дау білдірсе нұр үстіне нұр болар еді. Мәселен, жолдасымның спортқа келуіне себепші болған Атырау облыстық «Мүгедектер» спорт клубы мүмкіндігі шектеулі жандарға арналған республика бойынша ашылған алғашқы мектеп. Оның негізін қалаушы Сарайшық ауылының тумасы Бауыржан Тақауов ағамыз бүгінде волейболды отырып ойнау федерациясының президенті. Спорт – өмір сапасын арттыруға, адамдардың көңіл күйін көте­руге қажет бірден-бір құрал. Сон­дықтан спорт волонтерлігі де назарға алатын дүние.

 

Әңгімелескен

Светлана ҒАЛЫМЖАНҚЫЗЫ,

«Egemen Qazaqstan»

 

Соңғы жаңалықтар

Жоғалған бала 12 сағатта табылды

Аймақтар • Бүгін, 14:38

Крипто ақшаның жаңа дәуірі

Экономика • Бүгін, 10:29

Тыңғылықты дайындық бар

Қоғам • Бүгін, 08:26

Тұтынушыларға тікелей сата алады

Экономика • Бүгін, 08:17

Аймақта діни ахуал тұрақты

Аймақтар • Бүгін, 07:33

Сүйем сені, беу өмір!..

Руханият • Бүгін, 07:25

Құдықсай ауылы көмір тасып алды

Аймақтар • Бүгін, 07:24

Көпбалалы ананың кір сабыны

Экономика • Бүгін, 07:23

Ұқсас жаңалықтар