Министр өз сөзінде жаңғырудың жаңа кезеңіндегі мемлекет пен діннің өзара әрекет етуінің қазақстандық үлгісін жасақтау ведомствоның алда тұрған негізгі басымдықтарының бірі екендігін айтты. Сонымен қатар, бұл үлгі ұлттық дәстүрлерге, заманауи талаптарға және мейірімділік, адамгершілік, бейбітшілік қағидаларына негізделу қажеттігін тілге тиек етті.
«Осы мақсаттарды жүзеге асыру үшін министрлік заңнамалық арнайы бастамалар әзірлеген болатын. Олардың арасында еліміздегі дін саласының 2017-2020 жылдарға арналған мемлекеттік Тұжырымдамасы да бар. Бұл құжат арқылы діни кертартпалық пен экстремизмге деген қоғамның иммунитетін нығайтуға бағытталған нақты шаралар ұсынылады. Сонымен қатар, тағы бір маңызды бастама ретінде «Қазақстан Республикасының кейбір заңнамалық актілеріне діни қызмет және діни бірлестіктер мәселелері бойынша өзгерістер мен толықтырулар енгізу туралы» заң жобасын әзірлеу үстіндеміз. Оның негізгі ережелерінде діни әдебиет пен діни сараптаманы өткізу тәжірибесін жетілдіруі қарастырылуда», – деді Н.Ермекбаев.
Бүгінде министрлік мамандарының бастамасымен діни экстремизмнің алдын алу бойынша жұмыстар жалғасу үстінде. Атап айтқанда, дінді деструктивті мақсатта қолдануды болдырмас үшін заңсыз діни материалдарды таратуды бақылау мен радикалды көзқарасты ұстанатын топ өкілдерімен жұмыс жүргізіліп, азаматтардың діни сауаттылығы арттырылуда.
«Біз зайырлы мемлекетте өмір сүреміз. Сондықтан да, мемлекет талаптарын сақтау – негізгі мақсатымыз. Зайырлы мемлекет – көпконфессиялы ортада тұрақтылықты сақтаудың жалғыз жолы болып табылады. Қазіргі таңда мемлекет бойынша 306 арнайы теологиялық және ақпараттық топтар жұмыс істеуде. Олардың құрамында – 3,5 мыңнан астам дінтанушылар мен діни ұйымдардың өкілдері бар. Жалпы, жүзеге асырылып отырған шаралар діни саладағы жағдайды жақсартуға септігін тигізеді», – деді министр Н.Ермекбаев.
Алқа кеңесінде министрліктің үкіметтік емес ұйымдармен бірлесе отырып, азаматтық қоғам саласында заңнаманы жетілдіру бойынша жұмыстарды атқарып келе жатқаны да назардан тыс қалмады. Сол мақсатта «Коммерциялық емес ұйымдар қызметінің мәселелері бойынша заңнамалық актілерге өзгерістер енгізу туралы» заңды жетілдіріп, соның аясында үкіметтік емес ұйымдарға грант беру ережесін қайта қарау көзделіп жатқаны мәлім болды. Ондағы мақсат – тәртіптің ашықтығын қамтамасыз ету.
Іс-шара барысында Парламент Сенатының депутаты Ж.Ерғалиев, Қоғамдық Кеңестің төрағасы Т.Сүлейменов, Дінтанушылар конгресінің мүшесі, Мәдениеттер мен діндердің халықаралық орталығының директоры А.Әбуов, «Қаһарман ұрпақ» ҚҚ төрағасы К.Елубаев, Республикалық бірыңғай «Жас ұлан» балалар және жасөспірімдер ұйымының төрағасы Д.Сәдуәқасова сынды сала мамандары сөз алып, министрдің баяндамасында айтылған мәселелерді қызу талқылады.
Жиында министрлік мамандары осы жыл ішінде жастар ұйымдарымен диалог құру арқылы ұрпақтың патриоттық тәрбиесі, әлеуметтенуі мен шығармашылық дамуы бойынша жаңа жалпыұлттық жоба әзірлейтіндігі айтылды. Ал ведомство басшысы бұл конкурсқа азаматтарды белсенді қатысуға шақырды.
Нұрлыбек ДОСЫБАЙ,
«Егемен Қазақстан»