Болашақ депутаттар жетекке ілесіп жүре бермеуі керек

Қасымбек Медиев кезінде Қарағанды облыстық мәслихатын сегіз жылдай басқарды. Одан беріде «Қазақстан мәслихаттары депутаттарының бірлестігі» республикалық қоғамдық бірлестігін құрып, аталған ұйымның алғашқы төрағасы болды. Бүгінде жасы жетпістің сегізіне келген ақсақал әлі тың, қоғамда болып жатқан өзгерістерді жіті қадағалап отырады. Сол себепті, Елбасы Нұрсұлтан Назарбаев Қазақстан Республикасы Парламенті Мәжілісі мен барлық деңгейдегі мәслихаттар депутаттарының сайлауын кезектен тыс өткізу туралы Жарлыққа қол қойғаннан кейін кеш те болса қоғам қайраткері Қасымбек МЕДИЕВке жолығып, бірнеше сұрақ қойып, ой-пікірін білген едік. – Қасымбек Медиұлы, Мем­­лекет басшысы Мәжіліс депутаттарының үндеуін қол­дап, елімізде кезектен тыс сайлау өткізу туралы Жарлыққа қол қой­ды. Оны жаңа ғана өзіңіз теледидардан естідіңіз. Сіз Мәжіліске сайланатын болашақ депутаттардан қандай іс-қимыл күтесіз? – Мемлекет басшысының Мәжіліс депутаттарының кезектен тыс сайлауын өткізу туралы Жарлыққа қол қоюын ел­­дің болашағына алаңдаған жанашырлықтан туған батыл қадам деп бағалаймын. Жаңа депутаттар экономи­ка мәселесіне ерекше ден қой­ғаны жөн деп санаймын. Өз ойларын ашық білдіріп, жетекке жүре бермесе екен деп ті­леймін. Болашақ депутаттар елімізді тығырықтан алып шығу жолында қоғамға қозғау салатын ықпалы зор күш болуы керек. Жалпы, біздің жеріміздің асты да, үсті де байлыққа тұнып тұр. Осыны халықтың игілігіне ұқыпты түрде жарата білу жолында депутаттардың белсен­ді әрекеті, табанды ұстанымы өте маңызды рөл атқарады. Біз ши­кізатқа жүгіне бермей, өндіріс саласын дамытуға ден қоюымыз керек. Өзгеден сатып ала бермей, өзімізде жасап, шығарғанымыз абзал. Мына дағдарыстың өзі біздің осы олқылығымызды көзге шұқып көрсетті емес пе?! – Қазіргі таңда болашақ Мәжілістің құрамында жас­­­тар­дың көбірек болғаны дұрыс деген пікірлер бар. Бұған сіз қалай қарайсыз? – Мәжіліске жастарды тартқан дұрыс, әрине. Дегенмен, оларға ақыл айтып, жөн сілтеп отыратын аға буын өкілдерінің басым болғаны жөн. Ал енді жаңашыл жастар өмірден көрген-түйгені көп ағаларының ақылын алып, олардың бай тәжірибесіне сүйенер болса – одан біз еш ұтылмаймыз. Егер де шылғи жасқа тізгін беріп қояр болсақ, онда ісіміз де шикі болып шығуы мүмкін. Сондықтан таразының басын тең ұстау керек. – Жергілікті мәслихат де­путат­­­тарының алдында қандай мін­­деттер тұр деп ойлайсыз? – Жергілікті мәслихат де­путаттары халыққа мейлінше жақын, былайша айтқанда, елдің ішінде жүреді. Жұрттың талап-тілегін, жоқ-жітігін жақсы біледі. Бүгінгі мәслихат депутат­тары ауылға баса көңіл бөлуі қажет деп ойлаймын. Неге де­сеңіз, қа­зіргі дағдарыстың қыс­­па­ғынан ауыл шаруашылы­ғын дамытпайынша шығын­сыз шыға алуымыз екіталай. Қазіргі таңда жастар ауылдан қалаға қашып жатыр. Бұл үрдісті тоқтатпайынша болмайды. Баяғыда біз қызмет істеп жүргенде тері-терсек, жүн-жұр­қаның бағасы қандай еді?! Қазір осылар аяқ астында шіріп жатыр. Депутаттар осыны айтып, мәселе ретінде көтере білсе нұр үстіне нұр. Сол себепті де, жергілікті мәслихат депутат­та­ры ауыл шаруашылығының дамуына, ауылдық жерлердегі биз­нес­тің өсіп-өркендеуіне жанын салып қызмет етулері керек. Сондықтан, мәслихат­тар­­­ға да дұрыс адамдардың кел­ге­нін ойластырған жөн. – Қазіргі таңда жергілікті мәслихаттардың рөлі мен абы­рой-беделін көтеру үшін не істеу керек деп санайсыз? – 2007 жылы мәслихаттардың мәселесі бойынша Елбасының қабылдауында болдым. Сонда мен көптеген мәселелерді кө­тер­дім. Мәселен, жергілікті мәслихаттар рөлінің төмендеп, олар тек бюджетті бекітумен ғана айналысып жүргенін, облыстық мәслихаттар хатшыларының мар­дымсыз жалақы алатынын айттым. Осы және басқа да қор­даланып қалған мәселелер төңірегінде ашық түрде әңгіме қозғадым. Әсіресе, жергілікті округтердің санын арттырып, депутаттардың санын көбейту туралы ұсынысымды жеткіздім. Бұл жөнінде кейбір аудандағы мәс­лихат депутаттары санының 11-ден аспайтынын мысал ретінде келтірдім. Елбасымен арада болған осы әңгімеден кейін мәслихаттардың рөлін көтеру бойынша едәуір ша­руалар іске асты. Дегенмен, жергілікті мәслихаттар институтын дамыту бойынша жұмыстар жалғасын таба беруі керек. – Әңгімеңізге рахмет. Әңгімелескен Қайрат ӘБІЛДИНОВ, «Егемен Қазақстан». ҚАРАҒАНДЫ.