Үнемдеуді үйренуіміз керек

Қазақстан жаһандық үдеріс шаңына жұтылып кетпей, тарих жылна­масынан өз орнын ой­ып тұрып алуы керек. Ол үшін жасайтын жұ­мыстар жеткілікті. Ең бастысы, елімізді тура жолдан адастырмайтын, жаһандық сын-қатерлерге ұрын­дыр­май­­тын, дағдарысқа қарсы бағ­дарламаларды қамтитын Ұлт Жоспарымыз бар. Осындай жағдайда Парламент Мәжілісі депутаттарының өз өкілеттіктерін мерзімінен бұрын тоқтатуын сұраған үндеуін қа­былдап, Жарлыққа қол қойған Мемлекет басшысы Нұрсұлтан Назарбаев «мен депутаттардың бастамасын Қазақстан мен қа­зақстандықтардың тағдырына отаншылдық тұрғыдан қамқор­лық танытудың көрінісі деп қабылдаймын», деді. Бұрынғы Парламент Мәжілі­сі депутат­тарының Пар­­ла­мент­тен бөлек түрлі дең­гейдегі мәслихаттар сайлауларын артық қаржы шы­ғынсыз бір мезгілде өткізуге үн­дегені де елдің қамы деп түсіндік. Біз шикізаттан тү­сетін та­бысқа малдана бермей оның бағасы төмен жағдайда да өмір сүруге талпы­нуымыз керек. Әлем­де табиғи қазба бай­лықтары жоққа тән болса да шекесінен шеруен атып, ғылым мен жаңа техно­логиялар­дың арқасында байлыққа батып отыр­­ған мемлекеттер бар. Біздің елде де жаңаша ойлай алатын, әлемдік ғылыми жаңа­лықтардың иесі, идеяларын өнді­ріске қол­данса үлкен табысқа ке­нел­тетін ғалымдарымыз жеткі­лікті. Қазақстанның келешегі ша­ғын және орта бизнесте. Ұлан-ғайыр жеріміз мың­ғырған мал өсіруге де, бау-бақша, көкөніс, астық егуімізге де молынан жетеді. Бұл туралы Елбасымыз талай рет айтқан. Жа­йы­­лымдыққа жер таппай отырған мемлекеттер де бар. Мәселен, жоғары сұрыпты сиыр етін дайындаумен аты шыққан, күреп табыс тауып отырған Оңтүстік Корея мемлекеті мал бордақылау концерн­деріне азықтық жем дайындау үшін қажет шөп, дақылдарды Амери­кадан бастап біраз шетелдерден тасымалдайды. Өзінде жер жетпейді. Қазір оңтүстіккореялық кәсіпкерлер Сарыағаш ауданында жылыжай салу, бау-бақ­ша өнімдерін өсіру жөнінде әкімдікпен келісімшарт жасасып, инвестиция салып жатыр. Мемлекет басшысы Парламент Мә­жілісі депутаттарының кезектен тыс сай­лауын тағайындауға байланыс­ты халыққа үндеуін­де индустрияланды­руды алға бас­­тырып, шағын және орта бизнесті дамыту керектігін айтты. Бұл бағытта облыс басшысы Бейбіт Атамқұлов толымды жұмыс жасап жатқан­дығын айту керек. Мемлекет басшысы «Қазақстандағы үшінші қала Шымкент» деп баға берген шаһар әкімі Ғабидулла Әбдірахимов те Шымкенттің сәулетін арттыратын, байлығын еселейтін, халықтың әл-ауқатын көтеретін жобалар дайындап, үлкен инвес­тициялардың құйылуына ұйытқы болып отыр. Қазіргідей қиын жағдайда ысырапсыз өмір сүріп, ресурстарды үнемдеп, жұмыс орындарын сақтамасқа болмайды. «Қазір елдің әрбір азаматының пат­риот­тығы сынға түсуде. Бізде тағдырға мойынсұнып, әйтеуір бір уақыттары бәрі орнына келетініне, мұнай бағасы көтеріліп, жағ­дайдың жақсаратынына үміттеніп отыруға уақыт жоқ. Бүгінде кез келген жаһандық сын-қатерге үнемі жүйелі әрі алдын ала жауап беру және тиісті шаралар қабылдау маңызды. Бізге «Қазақстан-2050» Стра­тегиясының бағытын жал­ғас­тырып, дағдарысқа қарсы бағ­дарламаны іске асыру, Ұлт Жос­парын орындау керек. Мың­даған азаматтарымызға жұмыс бере отырып, «Нұрлы Жол» бағ­дарламасын белсенді жүзеге асыру қажет. Үкімет, министрлер мен барлық деңгейдегі әкімдер бұрынғы дағдарыс тәжірибесі мен ин­фрақұрылымдық құрылыс мүм­кіндіктерін пайдалана отырып, жұмыс орындарын ұсыну арқылы шығындарды қысқарту, аппаратты оңтайландыру үшін резервтер іздестіруі тиіс», деді Ел­басы. Біз осы үдеден табылуға тиіс­тіміз.  Бейсенбек ЖАНБОСЫНОВ, Шымкент қаласы әкімінің орынбасары.  Оңтүстік Қазақстан облысы.