Заманауи цифрлық кеңсе

Жуырда Шым қалада ХҚО қызметін одан сайын жетілдіре түсу мақсатында халыққа заманауи жүйеде қызмет көрсете­тін цифрлық кеңсе ашылды. Цифр­лық мазмұндағы бөлімшенің ресми ашылу салтанаты тәуелсіз директорлар кеңесінің мүшелері Зағипа Балиева мен Ерғали Бегімбетов, «Азаматтарға арналған үкімет» мемлекеттік корпора­ция­сының басшысы Сүйеніш Әбділдин және Шымкент қаласы әкімінің бірінші орынбасары Шыңғыс Мұқан мен филиал директоры Балмейір Сансызбайұлының қатысуымен өтті.

Цифрлық форматтағы кеңсе Кайд­зен тұжырымдамасы бойынша қыз­мет көрсе­теді. Сондай-ақ Шығыс әдіс­темесі негізінде жұмыс істейді. Яғни  мемле­кеттік қызмет көрсету сапасының, корпо­ративтік мәдениеттің және жұ­мыс өнімділігін арттыру мақсатын көздей­ді. Алдағы уақытта осы бағытта жүйелі жұмыс атқарылатын болады. Жаңа бөлімшенің тағы бір ерекшелігі, келушілер кеңседегі қызмет көрсету аумағын арнайы дизайнда жасалған түстер арқылы ажыратып біледі.

«Азаматтарға арналған үкімет» Шым­кент қалалық филиалының директоры Балмейір Сансызбайұлының мәлімдеуінше, шығыс үлгісіндегі кеңсе­нің құжатты қабылдау және оны тапсыру аймағында 38 жұмыс орны болады. Сонымен бірге мұнда 101 инспектор қызмет етеді.

– Бұдан бөлек Халыққа қызмет көрсе­ту цифрлық кеңселерінде түрлі қыз­мет аймағы қарастырылған. Олардың қатарында ресепшн, құжат беру, жылдам қызмет көрсететін аймағы, кеңес беру, өз-өзіне қызмет көрсету секілді өзге де орындарды атауға болады. Заманауи үлгідегі цифрлық кеңсе қаладағы Мәделі қожа көшесіндегі 1/16 мекенжайындағы ХҚО базасында орналасқан, – деді филиал басшысы Балмейір Сансызбайұлы.

Еске сала кеткен жөн, бүгінде Шым­кентте халыққа қызмет көрсететін 10 орталық жұмыс істейді. Оның ішінде 3 халыққа мамандандырылған қызмет көрсету орталығы да бар.

Сонымен қатар жыл басынан бері мегаполистегі ХҚО-ларда қала тұрғын­дарына 900 мыңнан астам қызмет көрсетілген. Жалпы, бүгінгі таңда «бір терезе» қағидаты аясында халыққа қызмет көрсету ісі әлдеқайда жеңілдеген. Тіпті цифрлық мүмкіндіктер арқылы азаматтар үйінде отырып-ақ көптеген мемлекеттік қызмет түрін өздері ала алады. Мәселен, кейбір анықтамалар мен құжаттарды алу үшін қазір Халық­қа қызмет көрсету орталығына келіп әуре болудың қажеті жоқ. Кез келген азаматтың оны смартфон көмегімен шығарып алуға мүмкіндігі бар.

Осы ретте Еңбек және халықты әлеу­меттік қорғау министрі Тамара Дүй­сенова Шымкент қаласындағы «Тең қоғам» әлеуметтік қорғау орталығында өткен кездесуде де цифрлық әлеуеттің мүмкіндіктері туралы мәлімдеген еді.

«Мемлекет басшысы Қасым-Жомарт Тоқаевтың тапсырмасына сәйкес отбасының цифрлық картасы түзілді. Енді Қазақстанның әрбір отбасы өзіне мемлекет тарапынан қандай кепілдендірілген көмек бар екенінен алдын ала хабардар болып отырады. Яғни белгіленген статусына қарай әлеуметтік көмекті жылдам алатын болады. Сондықтан бұрынғыдай әр әлеуметтік органға жүгіріп әуреге түспейді. Мәселен, көпбалалы ана немесе зейнеткер болса, «Сіздің 1 жасқа толмаған балаңыз бар. Осыған орай балаңыз 1,5 жасқа толғанға дейін әлеуметтік жәрдемақы ала аласыз» деген сынды хабарлама келіп тұрады», деді министр.

Алдағы кезде отбасының цифр­лық картасын қалыптастырған соң, мүмкін­дігі шектеулі азаматтарды да әр мемлекеттік орган арасында әуреге салмау үшін «бір терезе» қағидаты бо­йынша құжатын рәсімдеу қолға алын­бақ. Яғни емханаға барғанда тиісті мәлі­меттерді алып, құжатын сол жерде рәсім­дей алады.

ШЫМКЕНТ