Алматыдағы №4 қалалық клиникалық ауруханада халықаралық шеберлік сабағы өтіп, отандық травматологтер мен ортопедтер толық автоматтандырылған ортопедиялық жүйеде хирургиялық операция жасауға жаттықты. Тізе буындарында ауыр кеселі бар төрт бірдей науқасқа роботтың көмегімен эндопротездеу жасалды. Жүйе тізе буындарына артропластика жасауда стереотактикалық құрылғы ретінде қолданылды. Робот науқастың МРТ, КТ суреттерін пайдалану арқылы хирургке операция алдындағы дайындықты жоспарлауға көмектесіп, операция барысында сараптамалық ақпараттар беріп отырады.
Отандық медицинадағы айтулы сәт, роботпен алғашқылардың бірі болып тізе буындарына операция жасау бақыты №4 қалалық клиникалық ауруханасының бөлімше меңгерушісі Манарбек Әубәкіровке бұйырды. Операция кезінде С.Асфендияров атындағы ҚазҰМУ травматология және ортопедия кафедрасының профессорлық-оқытушылық құрамы мен аурухананың жетекші дәрігерлері кеңес беріп отырды.
«Тізе буынының 3-4 деңгейдегі деформациялық гонартрозымен 10 жылдан астам ауыратын науқасқа операция жасадық. Шын мәнінде 3 немесе 4 сатыдағы гонартрозды емдеудің жалғыз тиімді жолы – хирургиялық операция болғандықтан, алдын ала тізе буынының компьютерлік томографиясы жасалып, зерттеу деректері жүйеге жүктелді. Робот бізге тізедегі ауытқуларды, имплант өлшемін есептеп беріп, операция кезінде жүйе тапсырманы өзі орындағандай әсер қалдырды. Робот миллиметрлік дәлдікпен операциялық аймақты кесіп алғандықтан, оған мамандар араласқан жоқ. Яғни бұл жоғары мамандандырылған роботтандырылған технология, сондықтан, науқас аяғына тез тұрады, операциядан кейінгі ауырсыну белгілері де, жарақаты аз болады», дейді М.Әубәкіров.
№4 қалалық клиникалық аурухана жедел, жоспарлы хирургиялық, травматологиялық, нейрохирургиялық, кардиохирургиялық көмектің толық циклі бар мамандандырылған травматологиялық орталыққа айналып келеді. Ауруханада ревизиялық эндопротездеу жөніндегі шеберлік дәрістерімен қатар, жұқпалы асқыну мәселелері қаралып, талқыланып отырады. Аурухана – ірі буындарды ауыстыруда жетекші орталық, оған жыл сайын осы емханада жасалатын 2 мыңға жуық буын ауыстыру операциялары дәлел-дәйек. Бұған дейін мұнда жартылай автоматты жүйесі бар робот сынақтан өткен болатын.
АЛМАТЫ
