Табысты мемлекет, табысты ел

Қазақстан бұдан 25 жыл бұрын тәуелсіздік алып, даңғыл даму жолына түсті. Алғаш рет әлемдік қоғамдастық мойындаған, ресми ресімделген егемен мемлекет мәртебесін алды. Тәуелсіз Қазақстанның негізін қалаушы Тұңғыш Президент – Елбасы Нұрсұлтан Назарбаев. Осынау елеулі дәуір оқиғасы ата-баба мен талай ұрпақтың орындалған үміт-армандары еді. Тәуелсіздіктен кейінгі жылдарда Қазақстан әлемнің бәсекеге барынша қабілетті 50 елінің қатарына кірді. «Қазақстан-2030» Стратегиясын мерзімінен бұрын орындап, 5 институттық реформаның «100 нақты қадам» Ұлт Жоспары мен болашаққа бағдарланған «Мәңгілік Ел» жалпыұлттық патриоттық идея­сын орындауға кірісті. Қазақстан Республикасының Тұңғыш Президенті – Елбасының қоры мен БҒМ ҒК Мемлекет тарихы институты бірлесіп өткізген «Қа­зақстан Республикасы Тәуел­сізді­гінің 25 жылдығы: табысты мем­лекет, табысты ел» атты халық­аралық ғылыми-практикалық конфе­ренциясы осының айқын дәлелі болды. Конференция барысында Поль­­­шаның Қазақстандағы бұ­рын­­ғы елшісі Владыслав Соко­ловс­кидің ғылыми редакциясымен дай­ын­далған «Хандықтан республикаға дейін: Қазақстан мемлекеттілігінің тарихи және заманауи шарттары» атты кітабының тұсаукесері өтті. Жиынды тарих ғылымдарының докторы, профессор Бүркітбай Аяған жүргізіп отырды. Аталған шара Қазақстан Рес­публикасының Тұңғыш Президенті – Елбасы қорының атқарушы директоры Сағындық Нұрахановтың құттықтау сөзімен ашылды. Содан соң Қазақстан Респуб­ликасының Тұңғыш Президенті – Елбасы кітапханасының атқарушы директоры Бейсембай Жұмабеков, Парламент Сенатының депутаты Жабал Ерғалиев, Парламент Мәжілісінің депутаты Абай Тас­болатов, Ұлттық мұрағаттың бас директоры Марат Әбсеметов, шетелдік қонақтар қатысып, аталған тақырып аясында сөз сөйледі. Конференцияға жетекші ше­телдік ғалымдар: Назарбаев Уни­верситеттің Гуманитарлық және әлеуметтік ғылымдар мектебі сая­саттану және халықаралық қатынастар кафедрасының ассо­ци­ацияланған профессоры, PhD докторы Чарльз Салливан (АҚШ); Мәскеу мемлекеттік облыстық университеті Стратегия және талдау институтының директоры, тарих ғылымдарының докторы, профессор Виталий Ершов (Ресей); И.Джавахишвили атындағы Тби­лиси мемлекеттік университеті жанындағы Тарих және этнография институтының директоры, тарих ғылымдарының докторы, профессор Важа Кикнадзе (Грузия); Қырғыз Республикасы Президенті жанындағы Мемлекеттік басқару академиясының профессоры, тарих ғылымдарының докторы Айдарбек Кочкунов (Қырғызстан); Гази университеті Гуманитарлық ғылымдар факультеті қазіргі түрік зерттеулері департаменті солтүстік-батыс (қазақ-қырғыз) зерттеулері бөлімінің профессоры, ғылым докторы Гүлжанат Ерджиласун (Түркия); Корвинус университеті Халықаралық қатынастардың көп пәнді докторлық мектебінің (Будапешт) ғылым докторы Михай Добрович қатысты. Түпкі мақсат – елдің 25 жылдан бергі толағай табыстарын түйіндеу; Мемлекет басшысы Н.Назарбаевтың Қазақстан мемлекеттілігін құру мен нығайтудағы, республиканың көпбағытты саясатын жасау мен жүзеге асырудағы, «Мәңгілік Ел» ұлт­тық идеясын қалыптастырудағы, Қа­зақстанның тарих ғылымын жан­дандырудағы рөлін зерттеу; тарих ғылымының өзекті және қазір­гі ұлттық тарихнаманың түйін­ді мә­се­лелерін «Мәңгілік Ел» жалпы­ұлт­тық идеясының аясында зерделеу. Конференция 2 секциядан тұ­рады: «Қазақстан Респуб­ли­ка­сының Тұңғыш Президенті және оның Қазақстан мемлекеттілігін қалып­тастырудағы рөлі»; «Қазақ­стан Республикасы Тәуелсіздігінің 25 жылдығы және отандық тарих ғылымын жаңғырту». Раушан ТӘУІРХАНҚЫЗЫ, «Егемен Қазақстан»