Парламент Мәжілісіндегі «Нұр Отан» партиясы фракциясы жанындағы Өңірлік саясат және мәслихаттармен жұмыс жөніндегі кеңестің, Парламент Мәжілісіндегі Қазақстан халқы Ассамблеясы депутаттық тобының және «Нұр Отан» партиясы жанындағы Құқықтық кеңестің бірлескен отырысында Қоғамдық кеңестерді құру және қызметін жетілдіру мәселелері талқыланды.
Бейнеконференция пішімінде өткен отырысты Парламент Мәжілісі Заңнама және сот-құқықтық реформасы комитетінің төрағасы, «Нұр Отан» партиясы жанындағы Құқықтық кеңестің төрағасы Нұрлан Әбдіров ашты. Сондай-ақ, шара барысында «Нұр Отан» партиясының Хатшысы Фархад Қуанғанов, Парламент Мәжілісінің депутаттары – партия фракциясы жанындағы Өңірлік саясат және мәслихаттармен жұмыс жөніндегі кеңестің төрағасы Серік Сейдуманов, Қазақстан Президенті жанындағы Адам құқығы жөніндегі комиссияның төрағасы, депутат Қуаныш Сұлтанов, Парламент Мәжілісіндегі ҚХА депутаттық тобының жетекшісі, Білім, ғылым, жастар саясаты және балалар құқығын қорғау жөніндегі қоғамдық кеңес төралқасының мүшесі Сауытбек Абдрахманов, Мемлекеттік қызмет істері жөніндегі органдардың іс-әрекет мәселелері жөніндегі қоғамдық кеңестің төрағасы Оралбай Әбдікәрімов, Мәдениет және спорт вице-министрі Марат Әзілханов, Атырау облысындағы қоғамдық кеңестің төрағасы Мұрат Өтешев сөз сөйледі.
Мәжіліс депутаты, Қазақстан халқы Ассамблеясы депутаттық тобының жетекшісі Сауытбек Абдрахманов өз сөзінде қоғамдық кеңестер атқаратын жұмыс ауқымды екенін айта келіп, барша халықтың өміріне қатысы болатындай маңызды мәселелерде жеті рет өлшеп, бір рет кесетіндей салиқалылық қажет болатынын жеткізді. «Білім және ғылым министрлігі қоғамдық кеңесінің мүшесі ретінде кеңестің отырыстарында іскерлік әңгіме айтпақпын. Сонымен бірге үш тілде оқыту, 12 жылдық мектеп, бес күндік оқу аптасы сияқты күрмеулі, күрделі түйіндерді тарқатуға эволюциялық жолмен қарау керектігі де күмәнсіз. Мысалы, министрлік орыс тілді мектептерде «Қазақстан тарихы» пәнін қазақ тілінде оқытуды қолға алмақшы. Идеяның өзі әбден қолдауға тұрарлық екені, мұның мемлекеттік тілдің мерейін асыратыны, түптің-түбінде қазақшаны игеруге септесетіні талассыз. Бар мәселе оған дайындықтың деңгейінде. Сол мектептердегі оқушылар қазақша сабақты түсінетіндей, қазақша оқулықты пайдаланып, жауабын қазақша айта алатындай болып жатқанда айтар әңгіме жоқ, ал олай болмай тұрғанда айтар әңгіме бар. Мұның аяғы сабақ бергенсуге, жауап алғансуға тірелсе одан тілдің беделі биіктемейді, қайта қазақ тілінің қадірі кетеді. Сондықтан бұл жұмыс ол мектептерде қазақ тілін оқыту сапасын жақсартумен қоса қабат жүргені, жаңа талаптың енгізілетін мерзімі нақты жағдайды ескере отырып белгіленгені жөн. Қоғамдық кеңес осындай жайларды ұдайы назарда ұстайтын болады», деді Сауытбек Абдрахманов.
Шараға қатысушылар «100 нақты қадам» Ұлт Жоспарының 99-қадамын, қоғамдық кеңестерді құру және қызметін жетілдіруді жүзеге асыру мәселелерін талқылады. Отырыста аталып өтілгендей, қазіргі таңда республика бойынша 225 қоғамдық кеңес құрылды. Оның ішінде 12-сі – республикалық, 16-сы – облыстық және Астана, Алматы қалалары, 197-сі қалалық және аудандық деңгейлерде. Бүгінде оларда 3791 адам жұмыс істесе, 70 пайыздан астамын конкурстық негізде қабылданған азаматтық қоғам өкілдері құрайды.
Қоғамдық кеңестердің мүшелері қатарына Парламент депутаттары Нұрлан Оразалин, Георгий Ким, Бірғаным Әйтімова, Қуаныш Сұлтанов, Гүлжан Қарақұсова, Артур Платонов, Бекболат Тілеухан, қоғам қайраткерлері Оралбай Әбдікәрімов, Мырзатай Жолдасбеков, Кенжеғали Сағадиев, Анатолий Башмаков, Мэлс Елеусізов, Зинаида Федотова, Әлихан Тойбаев, ҮЕҰ басшылары Нұрлан Ерімбетов, Еңлік Нұрғалиева, Марат Башимов, Елена Дмитриенко және басқалары енді.
Бірлескен отырыс қорытындысында бірқатар ұсыныс қабылданды.
Сәулебек БІРЖАН