Жастар газеті болғандықтан шығар, біздің редакцияға өндірістік іс-тәжірибеден өтуге келетін студенттер қатары өте көп. Тіпті, қайбір жылы сонау Астанадан бір студент қыз арнайы келіп, қазақ тілін тереңірек білу мақсатында екі айдай жұмыс істеп кетті. Қазір де редакциямызға оннан астам студенттер күнделікті келіп, тәжірибе жинақтауда. Негізінен М.Х. Дулати атындағы Тараз мемлекеттік университетінің студенттері және Л.Н.Гумилев атындағы Еуразия ұлттық университетінен келген бір студент бар. Олар осы маусым айының аяғына дейін жұмыс істейді. Араларында өте белсенді, мамандығын жан-тәнімен сүйетін, болашағынан үміт күттіретін жастар бар.
Жалпы, бұл үрдіс болашақта журналист болсам деген жастар үшін өте пайдалы. Шынын айту керек, тәжірибеден өтуге келген студенттер арасында редакция мен баспахананы айыра алмайтын, газеттің дайындалу, басылу үдерісін мүлдем білмейтіндері де баршылық. Өзімнің жеке пікірім, журналистика мамандығын оқытатын оқу орындары өз студенттерін алғашқы курстарда міндетті түрде газетте іс-тәжірибеден өтуді міндеттеу керек сияқты. Бұл телеарна ұжымы жас журналистерге бағыт-бағдар бере алмайды деген сөз емес. Телеарнаның да студенттердің біліктілігін арттырудағы рөлі өте зор. Бірақ, енді қалыптасып келе жатқан жас тілші ақпарат дайындауда оператор, монтажер, режиссерге тәуелді болмай, дербес жұмыс істеп, өз ойын, өз пікірін тиянақтап, дамытуды үйренуі қажет.
Жасыратыны жоқ, қазір барлық ақпарат құралдарында өндірістік іс-тәжірибеден өтуге келген жастарға ешқандай жалақы төленбейді. Тіпті, қаламақы төлейтіндері де некен-саяқ. Бұл енді өте қиын мәселе. Қазір журналист мамандығын даярлайтын оқу орындары көп. Жалақы төлеймін десеңіз, солардың барлығы өз студенттерін арнайы жолдамамен қаптатайын деп отырғаны анық. Әрине, жалақы төлеу студенттердің қызығушылығын арттыратыны сөзсіз. Екі ай ішінде олар кәдімгі штаттағы қызметкер сияқты еңбек етіп, осы салада күн көріп кете алатынына сенімдері беки түсер еді. Бәлкім, мемлекеттік тапсырыспен бе, әлде бюджет арқылы бөлу керек пе, әйтеуір, жыл сайын әр редакцияда ең болмағанда 4-5 студенттің тәжірибеден өтуіне қаржы қарастыру керек сияқты. Мүмкін, бұл қаржыны сол оқу орындарына бөлу қажет шығар. Сонда сол лимитке ілігу үшін студенттердің өз мамандықтарына деген құлшыныстары арта түсер еді. Әрине, оқу орнының басшылығы ол қаржыны журналистика саласында талаптанып жүрген ең үздік студенттерге беруі тиіс.
Дәулет ТӨЛЕНДІ,
Жамбыл облыстық «Арай» жастар газеті бас редакторының орынбасары
Жамбыл облысы