Қомақты саяси табыс
Қазақстан бірінші рет БҰҰ Қауіпсіздік Кеңесінің тұрақты емес мүшелігіне сайланып отыр. Аталған Ұйымның Бас Ассамблеясында 138 мемлекеттің Қазақстанды қолдап дауыс бергенінің өзі еліміздің халықаралық деңгейдегі беделін көрсетеді.
Еліміздің маңызды осы ұйымға мүше болғандығын ел тұрғындары үлкен жаңалық ретінде қабыл алды. Бұл тәуелсіздігіміздің 25 жылдығы қарсаңында болып отырған айтарлықтай оқиға екені анық. Ширек ғасырдың ішінде мемлекетті қалыптастырудың барлық кезеңінен өттік және елдің іргетасын нығайта білдік. Енді дамыған елдердің қатарына қосылу мақсатын алға қойып отырмыз. Әлемнің 150-ден астам мемлекетімен достық-экономикалық қарым-қатынас орнаттық. Көрші елдермен мәңгілік достық туралы шарт жасастық. Әлемдік қоғамдастықтың толыққанды мүшесі болдық.
Енді міне, БҰҰ Қауіпсіздік Кеңесінің мүшелігіне сайлануымыз үлкен маңызға ие екенін аңғаруымыз керек. Өйткені, БҰҰ Қауіпсіздік Кеңесінің бес тұрақты және он тұрақты емес мүшесі бар. Аталған кеңеске мүше болған 15 ел әлем тағдырын айқындайды десек, артық болмас.
Қазақстан 25 жыл бұрын өз алдына қойған мақсатына кезең-кезеңмен, табысты жетіп келе жатқанын әлем жұртшылығы көріп отыр. Қабылдаған бағдарламаларды орындадық. БҰҰ Декларациялары, бейбітшілікті қолдау жолындағы әлемдік маңызы бар басқа да халықаралық құжаттарды қабылдадық. Қандай мәселеге де үлкен маңыз беріп қарадық. Мұның сыртында, біздің Елбасымыз – Қазақстан Президенті Нұрсұлтан Назарбаев «Әлем. XXI ғасыр» атты манифесін дүниежүзінің назарына ұсынды. Онда ядролық қауіпсіздік мәселелері түгел қамтылған болатын. Елбасы халықаралық қарусыздану үдерістерін жаңа тарихи жағдайларға бейімдеу, соғыстар мен жанжалдардың алдын алу, орнықты әлемнің географиясын қалыптастыру қажет екенін атап көрсетті. Жер шарын ядролық қарудан азат құрлыққа айналдыру мақсатын алға қойды.
Мемлекет басшысының атап көрсеткеніндей, бүгінгі таңдағы ең маңызды мәселе – ядролық және басқа да жаппай-қырып жоятын қарудан толықтай азат әлемге қарай дәйектілікпен ілгерілеу. Бұл бағытта маңызды қадам қазірдің өзінде жасалып отыр. 2015 жылдың 7 желтоқсанында БҰҰ Бас Ассамблеясы Қазақстанның бастамасы бойынша Ядролық қарудан азат әлем құру туралы жалпыға ортақ декларация қабылдады. Бұл соғыс қаруларынан азат әлемге қарай жасалған қадамның бірі болмақ. 1991 жылы әлемде алғаш болып Қазақстан Семей ядролық сынақ полигонын жапты. Біздің елдің бұл қадамын бейбітшілікті қолдайтын әлем жұртшылығы жоғары бағалап отыр.
Осы орайда, Елбасы ұсынған манифесте қамтылған кешенді мәселелер БҰҰ Қауіпсіздік Кеңесінің мақсат-мүддесімен толықтай сәйкес келіп отырғанын атап өтер едім.
Егер біз бәріміз күн сайын Президенттің өзі бастап, барлық ұйымдар, барлық саяси партиялар, біздің қоғамдық институттар болып, ел тұрғындарының бірлігін сақтау жолында еңбек етпеген болсақ, Қазақстандағы тұрақтылық туралы айтудың өзі мүмкін болмас еді.
Біз бүгін қалыптасқан мемлекет болдық деп сенімді түрде мәлімдеп отырмыз. Сонымен бірге, бірлігі мықты халық болып қалыптастық деп те мақтанышпен айта аламыз. Біз қандай мақсат жолында алға басып бара жатқанымызды айқын білеміз. Мәңгілік Ел құру жолында қандай қадамдар жасайтынымызды анықтадық және оны қандай құқықтық кеңістікте жүзеге асыратынымызды да нақтылап алдық. Өйткені, Парламент біздің барлық реформаларымыздың заңнамалық тұрғыда қамтамасыз етілуі үшін қызмет жасап келеді.
Тәуелсіздіктің 25 жылдығы ішінде біз ішкі тұтастығымызды сақтай отырып, жаһандық мәселелерге араласа алатынымызға бірінші кезекте өзіміздің көзімізді жеткіздік, сондай-ақ халқымыздың және әлем жұртшылығының көзін жеткізе білдік. Елбасымыздың әлем алдындағы беделі өте жоғары екенін әлемнің танымал саясаткерлері жаһандық мәселелердің барлық параметрлері бойынша кеңесіп отыратынынан-ақ анық көруге болады. Әлемнің қайбір түкпірінде дау, жанжалдар мен қақтығыстар болып, саяси дағдарыстар туындай қалған жағдайда, Нұрсұлтан Әбішұлының кемеңгерлік кеңесіне жүгінеді. Оны өмірде көріп жүрміз, Айталық, Украина мен Ресей, Ресей мен Түркия және басқа да аймақтар арасындағы саяси дағдарыстар мен түсініспеушіліктер болғанда, оларды тоқтам жасауға, барлық мәселені бейбіт жолмен шешуге шақырған біздің елдің Президенті Нұрсұлтан Назарбаев болатын.
БҰҰ Қауіпсіздік Кеңесі қабылдаған кез келген шешімді, айқындаған міндеттерді енді біз де орындай аламыз. Ол үшін біздің тәжірибеміз де, барлық мүмкіндігіміз де бар.
Қазақстанның БҰҰ Қауіпсіздік Кеңесінің тұрақты емес мүшелігіне сайлануы біртұтас халқымыздың толымды табысы және жарқын жетістігі дер едім. Бұл – қомақты саяси табыс. Бұл Қазақстан Президенті Нұрсұлтан Назарбаевтың әлемдік саясаттағы рөлі мен еңбегін жоғары бағалау деп білемін. Бұл – Қазақстан халқының рөлі мен орнын танып-білуі. Қазақстанды әлемдегі ең жоғары халықаралық деңгейдегі тең құқықты саяси рөлі зор ел ретінде тануы екенін баса айтар едім.
Сондықтан мен еліміздің барша халқын осы бір айрықша оқиғамен құттықтаймын. Кім Қазақстанды өз Отаным деп сүйетін болса, сол үшін бұл үлкен мәртебе деп есептеймін.
Ахмет МҰРАДОВ,
Парламент Мәжілісінің
депутаты, Қазақстан халқы Ассамблеясы кеңесінің мүшесі
Белестер биіктей береді
Қазақстан Тәуелсіздігінің ширек ғасырына қадам басқан сайын еліміздің ұлықтығын дәріптейтін оқиғалар легі қалыңдай түсуде. Біз мақтанатындай жағдайлар бар. Оны әлем қауымдастығы мойындап отыр. Қазақстан Республикасы Азия тобы мемлекеттерінің атынан Біріккен Ұлттар Ұйымы Қауіпсіздік Кеңесінің 2017-2018 жылдарға тұрақты емес мүшесі болып сайлануын мерей тізбесінің биігіне қосамыз. Тарихымызда бұрын болмаған оқиға кешегі 28 маусымда, Нью-Йоркте, БҰҰ Бас Ассамблеясында өткен дауыс берудің нәтижесінде мәлім болды.
Қазақстан Республикасының Президенті Нұрсұлтан Назарбаев осынау оқиғаға қатысты халқымызға арнаған Үндеуінде: «Бұл Кеңес – Біріккен Ұлттар Ұйымының Жарғысымен «халықаралық бейбітшілік пен қауіпсіздіктің басты жауапкершілігі» жүктелген, тұрақты жұмыс жасайтын орган. Еліміздің оған сайлануы – Қазақстанның халықаралық аренадағы беделі мен еңбегінің мойындалуы деген сөз», деп айрықша атап көрсетті.
Мұның астарында елімізді аспандататын да, тұңғиық ойларға бойлататын да мәселелер жатқандығы белгілі. Өйткені, ұлан-ғайыр мерейге әлем тынысындағы аласапыран сәттер тізбегінде жетіп отырмыз. Біздің еліміз бейбітшілікті, қауіпсіздікті және орнықты дамуды жақтайтынын тәуелсіздік жылдарының бәрінде өзінің нақты істерімен дәлелдеп келеді. Бұл ғаламтор төріндегі жауапкершілігімізді еселей түспек. Яғни, Қазақстан ғажапстан дәуіріндегі ұмтылыстарымен көзге түсетін шақ туды. Бізге әлемдік қоғамдастықтың мұндай сенім көрсетуі мемлекетіміздің қарқынды дамуына және береке-бірлігімізге тікелей байланысты болмақ.
Қазір бейқам отыратын жағдай емес. Әлемдік қауымдастық сенім мандатын жайдан-жай бере қоймайды. Қазақстанның БҰҰ Қауіпсіздік Кеңесінің мүшелігіне сайлануы халық тағдырындағы құбылыс түріндегі оқиға. Бұл Елбасының сөзімен айтқанда, тек біздің еліміздің ғана емес, сондай-ақ, бұған дейін ешқашан халықаралық бейбітшілік пен қауіпсіздікке жауап беретін органда өкілеттілік етпеген бүкіл Орталық Азия субөңірінің де табысы.
Ендігі жерде Қазақ елі жаһандық проблемаларды шешудің жолдарын іздестіруге сүбелі үлес қосатын болады. Тұрақты және қауіпсіз әлем – бұл азаматтарымыз бен балаларымыз үшін аса қажетті құндылық. «Нақ сондықтан Қазақстан болашақ қазіргіден де сенімдірек және игіліктірек болуы үшін өзіне берілген мүмкіндікті пайдаланып қалуға ұмтылатын болады. Біз жаһандық қоғамдастықтың назарын бұған дейінгі көкейкесті бастамаларымызға аудару ниетіндеміз. Олар ядролық қару мен соғыс вирустарынан және жанжалдардан азат әлем құруға бағытталған». Нұрсұлтан Әбішұлының осынау сөздері Қазақстан халқының жүрегінен шыққан пәтуәлі пікір деп санаймын. Осының барлығы әркімге де қатысы бар толғақты мәселелер екендігі анық.
«Еліміз осынау зор сенімнің үдесінен шығып, Қазақстанның әлемдік аренадағы абыройы асқақтай түсеріне кәміл сенемін!», дейді біздің Президентіміз. Аталы сөздің асқақтататын ауанындағы халқымыз белестер биігінен көріне беретіні күмәнсіз.
Боранбай БЕГАЛИН, мемлекеттік қызметкерлер кәсіподағы
Ақмола облыстық комитетінің төрағасы, қалалық мәслихат депутаты
КӨКШЕТАУ