Елордамызда осыдан бірнеше жыл бұрын ғана Қазақстан Республикасының Тұңғыш Президенті – Елбасы кітапханасы өз есігін айқара ашты. Осынау заманауи ғылыми, біліми және мәдени орталықта әр жылдарда Нұрсұлтан Әбішұлына әлемнің аймаңдай мықтылары, сонымен қатар, жай қарапайым адамдар сыйлаған кітаптар ерекше орын алады.
Баспасөз бетіне осы бір тосындау, бірақ қызықты тақырыпты мен алғаш рет шығара отырып, оны жекелеген мысалдар негізінде баяндамақпын.
Кітаптың ашылар бетіндегі автор қолтаңбасы немесе ондағы ілеспе хат – білмекке құштар әрі ойлы оқырман үшін кейде, тіпті, кейбір ұзын-сонар зерттеулерден де анағұрлым құнды ақпарат беретіні бар.
Көптеген білімдарлардың мына бір пайымға тоқайласуы тегін емес: қысқа үлгідегі сыяпаттық жазбада адамдардың жеке және қоғамдық байланыстарын білуге ғана емес, сонымен бірге, сол заманның немесе нақты ахуалдың ақиқат мәніне тереңірек бойлауға мүмкіндік беретін бірегей тарихи, мәдени һәм психологиялық тұрғыдағы ақпарат жатады.
«Президент Назарбаевқа ізгі тілектермен. Маргарет Тэтчер» – Ұлыбританияның аңызға айналған Премьер-министрі өзінің 1995 жылы шыққан «Билікке жол» атты ғұмырнамалық кітабын осылай деп жазып берді.
Мұның алдында олар бірнеше рет жүзбе-жүз жеке кездескен еді, соның ең алғашқысы Кеңес Одағы тұсында, 1991 жылдың жазында болған. Сол кездің өзінде-ақ «темір леди» көп адамдар үшін күтпеген жерден: «Қазір әлемде ірі және өте ықпалды 5-6 саясаткер бар, Нұрсұлтан Назарбаев солардың бел ортасында», деп кәміл сеніммен мәлімдеді.
КСРО тұсында отаршыл-өктемшілдіктен көз ашпаған әрі болашағы мүлдем бұлыңғыр көптеген одақтас республикалардың бірінің басшысы туралы осындай лебіз айту үшін аса сұңғыла адам болу керектігіне келісерсіздер деп ойлаймын.
Біршама уақыт өткеннен кейін Н.Ә.Назарбаевтың «Қазақстандық жол» атты кітабының ағылшынша басылымының алғысөзінде М.Тэтчер былай дейтін болады: «Мемлекеттердің негізін қалаушы-әкелері» әрқашан дарабоз тұлғалар болып келеді, Нұрсұлтан Назарбаев та толықтай нақ осы санатқа жатады. Президент Назарбаев Қазақстанды бүгінгі биігіне жеткізу үшін батылдық пен байыптылықты бірдей ұштастырып пайдалана білді. Коммунизм бұғауын сілкіп тастаған ел өзінің ерекше қазақтық қалыбын сақтап қалды. Президент Назарбаев экономика мен қоғамның ашықтығына, яғни өзінің кейбір көршілері байбаламдай бас тартқан нәрселерге ұмтылды, сөйтіп, ол халықаралық ұйымдарда Қазақстанға айтарлықтай бедел жинады...».
Немесе таңғаларлық көрегендіктің тағы бір мысалына жүгінейік: «Президент Назарбаев – саясатта жаңа жарқырап келе жатқан жұлдыз... Егер ол республика тізгінін ұстап тұрса, Қазақстанның табысқа жету мүмкіндіктері еселеп артады». Бұл сөздер 1991 жылдың қыркүйегінде айтылған болатын және ол дүние жүзін сингапурлық «экономикалық керемет» туралы әңгіме қозғауға мәжбүр еткен, қазіргі Сингапурдың негізін қалаушы-әкесі әрі осы елдің бірінші Премьер-министрі Ли Куан Юдің аузынан шыққан. Нұрсұлтан Әбішұлы ол кісімен жиі кездесіп тұрды, оны өзінің жақсы досы санады, оның тәжірибесін зейін қоя зерттеді. Өз араларындағы тығыз байланыстардың басталуы туралы Елбасы былай деп еске алды: «1993 жылы мен Ли Куан Юді Қазақстанға шақырдым. Бір апта бойы үнемі қасында болдым. Кейде біз 5-6 сағаттап әңгімелесетінбіз, мен оны тыңдадым, жазып та алдым... Жаңадан білім алғандай болдым. Қайта отырып, нарықтық экономика, қаржы бойынша кітаптарды оқуға тура келді, банк жүйесін, экономиканы, саясатты, демократияны, сөз бостандығын зерделеп оқыдым, өйткені мен білімді мүлдем басқа жағдайларда алған едім».
Өз елдерін қысқа мерзім ішінде үшінші дүниеден алдыңғы қатарға алып шыққан екі көшбасшының достығына Сингапур абызының 2013 жылы: «Президент Нұрсұлтан Назарбаевқа құрметпен және игі тілекпен. Ли Куан Ю» деген ілтипатты қолтаңбамен сыйлаған Г.Аллисон, Р.Д.Блэквил және А.Вайнның «Ли Куан Ю. Ұлы шебердің Қытай, Құрама Штаттар және әлем бойынша көрегендіктері. Сұхбаттар мен топтамалар» атты кітабы нақты айғақ болатыны ақиқат.
Өз елін «Азия жолбарыстарының» біріне айналдырған Оңтүстік-Шығыс Азиядан шыққан тағы бір аса көрнекті реформатор, Малайзия Премьер-министрі Махатхир Мохамад 2001 жылдың сәуірінде Қазақстан көшбасшысының тәуелсіз Қазақстанды құру ісіндегі еңбегіне құрмет белгісі ретінде: «Жоғары мәртебелі Нұрсұлтан Назарбаевқа. Еліңіздің табыстарына менің құттықтауым деп ұғыңыз. Ыстық сәлемімді қабыл алғайсыз» деген сөздермен оған «Өз еліндегі доктор. Доктор Махатхир Мохамадтың мемуарлары» кітабын сыйға тартты.
Кітапхана тыныштығында кітап асылдарын ақтара отырып мен кенет кітаптардың адамдарға қарағанда өзгеше сирек қасиет еншілегені жайында ойладым: әртүрлі замандарды және қарама-қарсы көзқарас-пікірлерді паш ете отырып олар қатар жайғасып, бір кітап сөресінде тату-тәтті табыса алады. Мысалды алыстан іздеп әурелену керек емес. Өткен кездегі, жақындағы және бүгінгі Ресейдің үш көшбасшысының ғана кітаптарына зер салайықшы.
«Уақыт сын-қатерлеріне үн қата отырып. Қайта құрудың сыртқы саясаты: құжатты айғақтар» – КОКП Орталық Комитеті Саяси Бюросы материалдарының және М.С.Горбачевтің әлемдік державалар басшыларымен 1985-1991 жылдардағы келіссөздерінің осынау жинағына олардың басты кейіпкері былай деп жазып, қол қойған екен: «Нұрсұлтан Әбішұлына шуақты достық көңілден. Құшақтаймын, М.Горбачев. 07.04.2010».
Кітапханада Ресейдің Тұңғыш Президенті Б.Н.Ельциннің көзіндей естелік болып ол сыйлаған «Горбачев-Ельцин: саяси текетірестің 1500 күні», «Президент жазбалары», «Президент марафоны: толғаныстар, естеліктер, әсерлер» атты үш кітап жеке қолтаңбалармен сақталуда. Борис Николаевичтің қолтаңбалары өмірдің өзіндей шынайы, қарапайым болып келеді әрі рәсімшіл салтанаттылықтан ада: «Нұрсұлтан Әбішұлына махаббатпен. Б.Ельцин. 17.05.1992», «Нұрсұлтан Әбішұлына құрметпен автордан», «Нұрсұлтан Әбішұлына жеке достық қатынастарымыздың естелігі ретінде. 17.10.2000».
Ресей Федерациясының Президенті В.В.Путин сыйлаған Н.Рахмановтың «Мәскеу» атты фотоальбомына ныспыхат ілескен және күні 2014 жылғы 5 наурыз деп көрсетілген.
Жалпы, Мемлекет басшысының атына келетін сый-лебіздер авторларының басым бөлігі ресейліктер екені атап өтерлік жағдай. «Көрші хақысы – тәңір ақысы» дейтін ескі мақалдың айғағы осы емес пе?..
Біздің халқымызды бауырлас Түркиямен де байланыстырып тұрған тығыз әрі жақын қатынастар осыдан бір кем емес. Туған республикамыз Тәуелсіздікті жариялағаннан кейін сол бір толқулы сәттерде оны бірінші болып Түркияның тануы да Қазақстанның жаңа тарихындағы айтулы оқиға болып табылады. Қос халықтың түбі бірге туысқандығы тамшы судағыдай мөлдіреп көрініс табатын бір ғана жайды келтірейін.
2000 жылы О.Мухарремнің «Сүлейман Демирел. Ұлы түрік мұратына арналған өмір» дейтін кітабы жарық көрді. Кітаптың бас кейіпкері өзінің қазақстандық әріптесіне сыйлаған данада мынадай жүрек елжіретерлік сөздер жазыпты: «Менің асыл текті досым, қымбатты бауырым, ұлы мемлекетшіл тұлға, түркі дүниесінің көшбасшысы, Президент Нұрсұлтан Назарбаевқа бақыт, береке және денсаулық тілегімен».
2015 жылдың мамырында, Саяси қуғын-сүргін құрбандарын еске алу күні қарсаңында Президент Әкімшілігіне белгілі қазақстандық тарихшы ғалым Ермұқан Бекмахановтың туыстарынан «Ноқталанған тарихшы» атты кітап келіп түсті. Ондағы қысқа ғана аңдатпада былай делінген: «Қазақстан Президенті мырзаға біздің әкеміз – есімі Отанымыздың шекарасынан әлдеқашан аттап кеткен Ермұқан Бекмаханов туралы ізгілікті естелік үшін. Құрметпен, Бекмахановтар отбасы».
Адамгершілік парызды өтеу және өзінің ғылыми сенімдері үшін зардап шеккен осынау адамның азаматтық әрі ғылыми ерлігін паш ету – КСРО Мемлекеттік қауіпсіздік комитетінің архивтерінен алынған бұрынғы жабық құжаттарға негізделген бұл кітаптың мақсат-мазмұны осындай. Кітап авторы – бұған дейін де қазақ халқының тамаша өкілдерінің бірнеше ғұмырнамасын шығарған Медеу Сәрсеке.
Ал Ілияс Есенберлиннің «Жан сырым: ойлар, нақыл сөздер, естеліктер» кітабы Президенттің жеке кітапханасында халықтың сүйіспеншілігі мен құрметіне бөленген майдангер жазушы Әзілхан Нұршайықовтың арқасында пайда болды. Өздерінің атақты хат алмасуларында айтылғандай, Нұрсұлтан Әбішұлымен сеніскен көңілдегі шуақты қатынаста болған ақсақал жаңа кітаптың алғы бетіндегі қысқа жазбада өз жағдайын емес, рухани өсиет сияқты маңызды іс туралы айтады: «Құрметті Нұреке! Менің Сізге Ілияс Есенберлин туралы хат жазарда тіліме тиек болған кітап осы... Ұмытылмас Ілекеңмен сыйлас, сырлас, ниеттес болған інілерінің бірі ретінде жолдап отырмын. Ә.Нұршайықов. 30.06.2001 ж.».
Тірі кезінде-ақ әлемнің әр елдеріндегі оқырмандар жүрегін жаулап алған кең ауқымды эпикалық полотнолардың хас шебері Ілияс Есенберлиннің жеке тұлғасы мен таңдаулы туындыларына деген Елбасы ықыласы туралы көп мысалдар келтіруге болады. Бірақ, мен бұл арада тек бір ғана ғибратты жәйтпен шектелмекпін. Бір жолы ел Президенттігіне үміткер ретінде мемлекеттік тілді білуден емтихан тапсырған кезде Н.Ә.Назарбаев жазбаша тапсырманы «Біздің күшіміз бірлікте» тақырыбына жазды, ауызша толғамды «Бабалар мұрасы – даналық көзі» тақырыбында баяндады, ал әдеби оқу машықтарын І.Есенберлин шығармасынан үзінді оқу арқылы танытты. Өз туындысы арқылы ең жоғарғы мемлекеттік лауазымға үміткердің білім деңгейі тексерілсе, жазушы үшін бұдан артық абырой-атақ бар ма?!
«Қалам шеберлері, сіздер кіммен біргесіздер?» – зиялы қауымға осы сұрақты қандай да бір пішінде әрбір заманның, әрбір қоғамдық құрылыстың, әрбір бетбұрысты кезеңнің қойып тұруы заңды. 1991 жылы тоталитаризм шеңгелінен құтылған кезде көпұлтты Қазақстан әдебиетінің көптеген өкілдері бұған еш жалтақтамай, қобалжымай бірден жауап берді: олар тәуелсіздікті жан-жүрегімен қабыл алып, өз таланттарын сол ұлы мұрат жолына арнады.
Прозашы әрі аудармашы Морис Симашко мұны арнайы дәлелдемесе де болар еді. Өйткені, ол коммунистік идеялар салтанат құрып тұрған шақта-ақ өзінің бүкіл өмір жолымен және әдеби еңбектерімен бостандық, демократия үшін, адамдар, халықтар мен елдер арасындағы ізгі ниетті өзара түсіністік үшін әлдеқашан «дауыс» беріп қойған болатын. Кейбір көбік сөзді талғамсыз жазушылардан өзгешелігі сол, осынау үлкен де дара сөз зергері, нақылға сай, аз жазса да саз қылып, оқырманын мәз қылып жазатын. Оның үстіне, қаламгердің әрбір мәтіні, ақын Н.Некрасовтың дана өсиетіне орай, «сөзге – сараң, ойға-жомарт» болып келетін. Ал ол жазған, бір қарағанда, жұқалтаң көрінетін кітаптар бірнеше жазушылық өмірге жетіп тұрар еді. Соған қарамастан, жас Қазақстан мемлекеті қалыптасуының аса қиын соққан алғашқы жылдарында жаңа ауқымды ой-мақсаттармен жігерленіп, өз хатында Президентке сыр ақтарды:
«Аса құрметті Нұрсұлтан Әбішұлы! Мен жазып жатқан кітап біздің өзімізден гөрі, шетелдік қалың оқырманға арналған. Ол жақта Қазақстан мен оның Президентіне деген қызығушылық айрықша үлкен. Атап айтқанда, шетелдік агенттіктер мен баспалардың маған осы тақырыпқа жазып беру жөнінде жиі өтініш жасауы да осыны айғақтайды. Сол жағдай мына кітапты қолға алуыма себепші болды. Әлбетте, егер Орталық Азияның тарихымен, сондай-ақ, соңғы жарты ғасырдағы мұндағы саясат тәжірибесімен таныс бола тұра, Сіздің саясатыңызды түсінбесем және жаныма жақын тұтпасам, оны іске асырудағы барлық қиындықтарды және Сіздің осыған қажетті саяси һәм адами ақыл-парасатыңыз бен ержүректігіңізді көрмесем, мен бұлай істемеген болар едім.
Сізге кітаптың бірінші, кіріспе тарауын (жұмыс данасы) және Индонезия сапары туралы жарияланған қорытынды тараудың бір бөлігін (ол басқа материалдар есебінен кеңейтіледі) жіберіп отырмын. Кітаппен одан әрі жұмыс істеу үшін бұларға байланысты Сіздің ескертпелеріңіз пайдалы әрі қажет болмақ. Кітаптың негізгі, ортаңғы бөлігі – барлық ой-толғаныстарымен, күмәндарымен және үміт сәулесімен қоса көрсетілген саясаткер және адам ретіндегі Сіздің өміріңіз. Бұдан бұрын да жазғанымдай, Сізбен тым құрса бір-екі рет бетпе-бет кездесіп, әңгіме-дүкен құрмайынша, кітап көп-көрім жұтаңдау шықпақ, әрі жаңсақтықтар кетуі де мүмкін. Әңгіме кезінде бізге ешкім кедергі жасамауы тиіс.
Сіздің жұмысыңыздың көптігін түсінемін және бұл жайында Сізге өтініш айтуға мәжбүрлігім үшін күні бұрын ғафу өтінемін. Меніңше, осындай кітап қазір өте қажет сияқты.
Енді кітаптың атауы туралы. Бұл Киелі кітап сюжеттерімен сабақтас. Сайтан Мәсіхті шөл далада: билікпен, байлықпен, басқа пәни дүние рахаттарымен қызықтырды. Хадистерге сәйкес, мұндай арбауларға Мұхаммед те берілмеген. Сайтанмен жекпе-жекте олардың құдіретті рухы жеңіп шыққан.
20.09.95 Сіздің М.Д.Симашко.
Хатқа машинкада басылған 23 беттік «Экватордан өткен жол немесе Президенттің арбалуы» қолжазбасы мен «1995 жылдың маусым-шілдесі» деп уақыты көрсетілген «Экватордан өткен жол» (жазушының қойын дәптерінен)» газеттік жарияланымының ксерокөшірмесі қоса жіберілді».
Президент өзімен бірге еріп баруға шақырған Израиль сапарын шығармашылық ой елегінен өткізіп, бір жылдан соң ол жаңа ғана басылып шыққан «Қасиетті жерге бастаған жол» кітабының сүйінші данасына мынадай сүйінішті сөздер жазды: «Қымбатты Нұрсұлтан Әбішұлына оның мәртебелі тарихи миссиясына деген зор ықылас және мүмкіндігінше үлес қосқандық сезімімен... 27.09.1996 ж.».
Өкінішке қарай, жасының ұлғаюы және науқасы Морис Давыдовичке осы топтаманы жалғастырып жұмыс жасауға мүмкіндік бермеді. Сірә, бостандықтың, былайша айтқанда, тұтас бір өмірге кешігіп жеткенін дәл осы жағдай аңғартса керек.
Кешірім Бозтаев атақты сөз зергерлерінің қатарынан емес еді. Ол өз замандастарына металлургиялық өндірістің қатардағы шеберінен Қазақстан Компартиясы Семей обкомының бірінші хатшысына дейінгі жолдан өткен қайраткер ретінде белгілі болды. Сол себептен де бұл кісінің қолына қалам алып, Семей ядролық полигонына байланысты сұмдық қасірет туралы алғашқылардың бірі болып дабыл қаққан күрескерлігі әсіресе қымбат. 90-жылдары ол «Семей полигоны», «Қайнар синдромы» және «29 тамыз» атты үш кітап шығарды. 1992 жылы жарық көрген солардың біріншісін ол: «Терең құрмет белгісі ретінде» деген қысқа қолтаңбамен сыйлады.
Қазақстан Республикасының Тұңғыш Президенті Н.Ә.Назарбаевтың Семей ядролық полигонын жабу туралы Жарлығы қабылдануына орай шын мәнінде кең қанат жайған және кейіннен Елбасының «Бейбітшілік кіндігі» атты кітабында жан-жақты зерделенген ғаламдық ауқымдағы іске қосқан оның жеке үлесі осындай болды.
Айтқандай, Президенттің осы кітабы туралы қатардағы оқырмандардан да, сараптамалық қоғамдастықтар өкілдерінен де: баяндау мәнері, проблеманы ғылыми тұрғыдан қамту сапасы және автордың өз ұстанымын білдіруі бойынша оны Нұрсұлтан Назарбаевтың таңдаулы шығармаларының бірі деп тану керектігі жөнінде сүйінішті пікір-лебіздер жиі естіліп жатады.
2012 жылдың қарашасында Голландиядан Мемлекет басшысының атына Нидерланд Пен-клубының мүшесі Джоб Дегенаардың «Іch bin І am» атты өлеңдер жинағы келіп түсті. Оған қосылған ілеспе хатта былай делінген:
«Құрметті Назарбаев мырза! Голландиядағы сіздердің елшілігіңізден мен «Бейбітшілік кіндігі» деген кітабыңызды алдым. Сүйсіне оқып шығып, Сіздің пікір-пайымыңызға және әлемді ядролық қарудан азат етуге құлшынған ізгі ниетіңізге тәнті болдым.
Мен Сізге өз елімнен кәдесый ретінде – кішкентай кітапшамды, поэзиямның таңдамалысын тартқым келеді.
...Мен Сізге және Сіздің еліңізге бүкіл жақсылықтарды тілеймін! Дж.Дегенаар».
«Өлеңге әркімнің де бар таласы» деген екен ұлы Абай. 2008 жылдың маусымында Мемлекет басшысына Оңтүстік Қазақстан облысының Түлкібас ауданынан Надежда Викторовна Корончук өзінің «Көне ертегілердің жаңаша баяны» атты өлеңдер кітабын жіберді.
«Құрметті Президент Нұрсұлтан Әбішұлы! Біздің тыныш әрі бейбітшіл елде өмір сүріп жатқанымыз үшін Сізге басымды иемін... Мен көз жанарым бойынша мүгедекпін. 2007 жылы өзімнің барлық шығармаларыма авторлық құқығымды рәсімдедім.
Мен сияқты әлі жас әйелді әлпештеп отырған өз еліме масыл болмай өмір кешіп, сонымен бірге, республикамның өнеріне үлес қосып жүргенім үшін өте қуаныштымын», – деп жазады ол өзінің Отанға және туған өлкенің қайталанбас табиғатына деген нұрлы сүйіспеншілікке толы өлеңдерін таныстыра отырып.
Бұл жағдайдан тағдырдың барлық қиындықтары мен сынақтарына қарамастан өмір сүруге және тұлғалық тұрғыдан өзін танытуға ерік-жігер таба білген «кішкентай» адам ұлылығының нақты мысалын көреміз.
2014 жылдың ақпанында Ұлы Отан соғысының ардагері, Қазақстан халқы Ассамблеясының мүшесі, Алматы облысының құрметті азаматы, бірнеше өлең және проза кітаптарының авторы Л.Ю.Гирш Президентке «Өмір парақтары» кітабын сыйлады. Ондағы ілеспе хатта былай делінген:
«Аса құрметті Нұрсұлтан Әбішұлы! Сіздің көңіл бөлуіңізге қатты толқыдым және менің 90 жылдық мерейжасыма байланысты құттықтауыңыз үшін шынайы алғысымды қабыл алуыңызды сұраймын. Өмірімнің 55 жылы Қазақстанда өтті, оны өзімнің екінші Отаным деп санаймын, менің немерелерім мен шөберелерім осында дүниеге келді.
...Ұлы Отан соғысының ардагері және «Нұр Отан» партиясының мүшесі ретінде жас ұрпақты қазақстандық патриотизм және өз еліне – Қазақстан Республикасына адалдық рухында тәрбиелеуге атсалысуды өзімнің борышым деп есептеймін.
Мен әрқашан Сіздің саяси бағытыңыздың адал жақтаушысы болып келдім және солай бола бермек. ...Сізге – Ұлт Көшбасшысына Қазақстан Республикасының гүлденуі мен ұлы болашағы жолындағы барлық ізгі мақсаттарға жетуіңізді тілеймін. Шынайы құрметпен, гвардия полковнигі, Алматы облысының құрметті азаматы Леонид Гирш».
Жоғарыда мен кітаптар сый-сыяпаттық, естелік-жаднамалық, ілтипат-ізеттік және арнаулық лебізді жолдаулардың дәстүрлісі және негізгісі болғанымен, бірден-бір жалғыз арқауы еместігін атап өттім.
2009 жылдың тамызында Мемлекет басшысының атына «Минги-тау» қарашай-балқар орталығы жіберген, сөзін де, сазын да А.Узденов жазған «Нұрсұлтан» әнінің дискісі келіп түсті. Ән сипатын баяндап айту абыройлы іс болмаса керек. Сондықтан, Қазақ ұлттық аграрлық университетінің студенті Фаризат Хаджиеваның Қазақстан халқы Ассамблеясының «Тәуелсіздік. Келісім. Болашағы біртұтас ұлт» тақырыбымен өткен XXIV сессиясында айтқан сөздері бұған тамаша түсіндірме болар еді деп білемін:
«Мен бүгін бұл сахнаға отбасымның аманатын өтеу үшін шығып тұрмын. Жер аудару жылдарында менің атамның отбасын қайырымды қазақ отбасы паналатыпты. Мен Сіздің отбасыңыз – Әбіш атаның отбасы паналатқан Хызыр Хаджиевтің немересі, Азрет Хаджиевтің шөбересімін. Сол адамгершілік, сол кеңпейілдік, сол қамқорлық үшін сіздің ата-бабаларыңызға, сіздің отбасыңызға айтар алғысымыз, ақ тілегіміз шексіз. Балқар халқының ақсақалдары: «Барлық мұсылман қауымының қасиетті жері Мекке мен Медине болса, жер аударылған адамдардың қасиетті де құтты мекені – Қазақстан. Басымызды сәждеге игенде – Қазақстанның болашағы жарқын, жұртының аман болуын тілейміз», – дейді. Мен де Қазақ елінің перзенті ретінде елімді Мәңгі етуге өз үлесімді қосамын!».
Осы қысқа ғана әңгімені аяқтай келе, Нұрсұлтан Әбішұлының туған күндерінің бірінде өздері сыйлаған сағатқа қыздарының жазып берген мына бірер өлең жолдарын келтіре кетпей тұра алмадым.
«В этот цех угодить, где расплавилось время,
Что уж там говорить, – непосильное бремя.
Но из сданного в лом предыдущего царства
Всем напастям назло – сотворить государство!
Вот достойный венец!
С днем рождения, отец!».
Өлең орыс тілінде жазылған екен. Мен ақын емеспін ғой, бірақ мағынасын беруге талпынып көрсем, шамасы, былай болып шығар ма еді деп ойлаймын:
Дәуірді балқытқан сынға да түстіңіз,
Айтатын несі бар, қиындық кештіңіз.
Қираған патшалық қаңқасын жалғаған,
Күмәнмен күресіп – мемлекет сомдаған!
Міне, бұл – нағыз мәртебе!
Туған күніңмен, ардақты әке!
«Өнер мәңгілік, өмір қысқа», – дейді халықтың көне даналығы. Бұл нағыз шығармашылықтың әрбір актісіне адамдар өз өмірінің сәулелі шақтарын арнап, оған өзінің өлмес жанының бір бөлшегін сыйлайтындығынан болар.
Өзінің соңына ұзаққа баратын игі іс қалдыру немесе із-түзсіз жоғалып кету – бұл енді әркім өзі шешетін мәселе.
Махмұт ҚАСЫМБЕКОВ,
Қазақстан Республикасы Президенті Кеңсесінің бастығы